ເພື່ອ​ລະນຶກ​ເຖິງ​ບຸນຄຸນ ​ແລະ ຄຸນງາມຄວາມດີຂອງ​ນັກຮົບ​ປະຕິວັດ ທີ່​ໄດ້​ເສຍສະຫຼະ​ເລືອດ​ເນື້ອ​ເພື່ອ​ປະ​ເທດ​ຊາດ ແລະ ເປັນການສຶກສາອົບຮົມການເມືອງແນວຄິດໃຫ້ພະນັກງານ-ສະມາຊິກພັກເຂົ້າໃຈຢ່າງເລິກເຊິ່ງຕໍ່ວັນຢຶດອຳນາດ 23 ສິງຫາ ຄົບຮອບ 74 ປີ ແລະ ຄົບຮອບ 44 ປີ.


ດັ່ງນັ້ນ ມາໃນວັນທີ 23 ສິງຫາ 2019 ເຊິ່ງກົງກັບວັນຄົບຮອບພໍດີ ທີ່ຄະນະໂຄສະນາອົບຮົມແຂວງ ອັດຕະປື ໄດ້ຈັດຕັ້ງໂຄສະນາ-ປາຖະກະຖາລະນຶກວັນຢືດອຳນາດ ແລະ ວັນປະກາດເອກະລາດ ທົ່ວປະເທດ ສປປ ລາວ (23/8/1945 ແລະ 23/8/1975-23/8/2019) ຄົບຮອບ 74 ປີ ແລະ ຄົບຮອບ 44 ປີ ເພື່ອເຮັດໃຫ້ຄະນະພັກ, ພະແນກການ, ກົມກອງ ແລະ ຮາກຖານຕ່າງໆ ໄດ້ຊັບຊາບກ່ຽວກັບມູນເຊື້ອຂອງວັນຢຶດອຳນາດ 23 ສິງຫາ ດ້ວຍຮູບການຕ່າງໆໃຫ້ກວ້າງຂວາງເລິກເຊິ່ງ.


ຕໍ່ວັນສຳຄັນດັ່ງກ່າວ ສະຫາຍ ນາງ ມີນາພອນ ໄຊສົມພູ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ ໄດ້ຍົກໃຫ້ເຫັນເຖິງໄຊຊະນະຂອງວັນດັ່ງກ່າວວ່າ: ນີ້ແມ່ນແນວທາງ ປະຕິວັດອັນຖືກຕ້ອງ ແລະ ການນຳພາ ອັນສະຫຼາດສ່ອງໃສຂອງພັກ ທີ່ຮູ້ໜູນໃຊ້ລັດທິມາກ-ເລນິນເຂົ້າໃນພຶດຕິກຳໂຕຈິງ ຂອງການປະຕິວັດລາວ ຢ່າງປະດິດສ້າງ, ມັນແມ່ນໄຊຊະນະ ຂອງກຳລັງແຮງ ແຫ່ງຄວາມສາມັກຄີ ເປັນຈິດໜຶ່ງໃຈດຽວກັນ ຂອງປວງຊົນທັງຊາດຄວາມເປັນອັນໜຶ່ງອັນດຽວກັນ ຂອງກອງທັບແລະປະຊາຊົນລາວບັນດາເຜົ່າ ຕະຫຼອດໄລຍະ ການປະຕິວັດ ປົດປ່ອຍຊາດ ໃນເມື່ອກ່ອນກໍຄືໃນພາລະກິດປົກປັກຮັກສາແລະສ້າງສາພັດທະນາປະເທດຊາດ ໃນປັດຈຸບັນ.
ໂດຍ: ມາລາທິບ