ກອງປະຊຸມໃຫຍ່ຄັ້ງທີ XIII ຂອງອົງຄະນະພັກເມືອງຊານໄຊ ແຂວງອັດຕະປື ໄດ້ໄຂຂຶ້ນຢ່າງເປັນທາງການໃນວັນທີ 17 ກຸມພາ 2020 ທີ່ສະໂມສອນຂອງເມືອງຊານໄຊ ໂດຍການເປັນປະທານຂອງ ສະຫາຍ ສຸວັນສີ ແກ້ວວິເສີດ ເລຂາພັກເມືອງ ເຈົ້າເມືອງ-ເມືອງຊານໄຊ ເປັນກຽດເຂົ້າຮ່ວມຂອງສະຫາຍ ເລັດ ໄຊຍະພອນ ເລຂາພັກແຂວງ ເຈົ້າແຂວງແຂວງອັດຕະປື ມີສະຫາຍ ນ ມີນາພອນ ໄຊຊົມພູ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ ມີຄະນະປະຈຳພັກແຂວງ ກຳມະການພັກແຂວງ ຄະນະປະຈຳພັກເມືອງ ກຳມະການພັກເມືອງ ມີພະນັກງານອາວຸໂສບຳນານນັກທຸລະກິດ ຜູ້ປະກອບການ ແຂກຮັບເຊີນຈາກເມືອງອ້ອມຂ້າງເຂົ້າຮ່ວມ.

ກອງປະຊຸມໃຫຍ່ ເທື່ອນີ້ ມີຜູ້ແທນສົມບູນທີ່ມາຈາກຄະນະພັກຮາກຖານ ແລະ ໜ່ວຍພັກທົ່ວເມືອງ 117 ສະຫາຍ, ຍິງ 7 ສະຫາຍ, ທີ່ເປັນຕົວແທນໃຫ້ແກ່ສະມາຊິກພັກທັງໝົດໃນທົ່ວເມືອງ 1.232 ສະຫາຍ ຍີງ 251 ສະຫາຍ,ໃນວາລະດໍາເນີນກອງປະຊຸມສະຫາຍ ສຸວັນສີ ແກ້ວວິເສີດ ເຈົ້າເມືອງ ໄດ້ກ່າວໄຂກອງປະຊຸມຢ່າງເປັນທາງການ ພ້ອມທັງຜ່ານຮ່າງບົດລາຍງານການເມືອງທັງສອງພາກ ຊຶ່ງໄດ້ທົບທວນ ແລະ ຕີລາຄາຄືນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XII ໂດຍຍົກໃຫ້ເຫັນເຖິງຜົນສຳເລັດ,ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ຈາກການປະຕິບັດໜ້າວຽກຕົວຈິງ,ພ້ອມທັງໄດ້ກໍານົດທິດທາງ ແລະ ຄາດໝາຍສູ້ຊົນ 5 ປີຕໍ່ໜ້າ 2019 -2024 ໄລຍະຜ່ານມາທົ່ວເມືອງຊານໄຊ ຍັງຮັກສາໄດ້ສະຖຽນລະພາບທາງດ້ານການເມືອງ ສັງຄົມມີຄວາມສະຫງົບໂດຍພື້ນຖານ ເສດຖະກິດໄດ້ຮັບການຂະຫຍາຍຕົວຢ່າງຕໍ່ເນື່ອງ ອັດຕາເຕີບໂຕເສດຖະກິດສະເລ່ຍໃນລະດັບ 5.47% ຕໍ່ປີ,

ລວມຍອດລາຍຮັບ ບັນລຸໄດ້ສະເລ່ຍ(GDP)ຈີດີພີ 4.871.000 ກີບຕໍ່ຄົນຕໍ່ປີທຽບໃສ່ 2014 ເພີ້ມຂື້ນ 766.000 ກີບ,ທຽບໃສ່ແຜນບັນລຸໄດ້ 68.21 % ຂະແໜງກະສິກຳ-ປ່າໄມ້ ບັນລຸໄດ້ 86.20 ຕື້ກວ່າກີບ ກວມເອົາ 28.86 % ຂະແໜງອຸດສະຫະກໍາບັນລຸໄດ້ 10.16 ຕື້ກວ່າກີບ ກວມເອົາ 25.50% ຂອງ (GDP) ຂະແໜງບໍລິການບັນລຸໄດ້ 23.08 ຕື້ກວ່າກີບ ກວມເອົາ 27.34% ຂອງ(GDP) ສະເລ່ຍລາຍຮັບຕໍ່ຫົວຄົນບັນລຸໄດ້ 573 ໂດລາສະຫະລັດ ຕໍ່ຄົນຕໍ່ປີ,ທຽບໃສ່ປີ 2014 ເຫັນໄດ້ວ່າຊີວິດການເປັນຢູ່ຂອງປະຊາຊົນດີຂຶ້ນ ແລະ ທຽບໃສ່ແຜນການ 5 ປີປະຕິບັດໄດ້ບັນລຸຕາມຄາດໝາຍ ປີ 2015 ອີງໃສ່ການປະເມີນບ້ານພົ້ນທຸກປະຕິບັດໄດ້ 82% ຂອງຈໍານວນບ້ານທັງໝົດ ,ຄອບຄົວທຸກຍາກຍັງເຫຼືອ 13.46%ຂອງຈໍານວນຄອບຄົວທັງໝົດທຽບໃສ່ປີ 2014 ຫຼຸດລົງ 7.39% ສ່ວນວຽກງານດ້ານອື່ນໆກໍ່ໄດ້ຮັບການພັດທະນາດີຂື້ນເປັນກ້າວໆ.

ກອງປະຊຸມໃຫຍ່ ອົງຄະນະພັກເມືອງ ຊານໄຊ ຍັງຈະໄດ້ພ້ອມກັນຄົ້ນຄ້ວາ ແລະ ຮັບຮອງເອົາບັນດາເອກະສານສຳຄັນທີ່ເປັນຍຸດທະສາດຂອງຄະນະບໍລິຫານງານພັກເມືອງ ຄັ້ງທີ XIII ຮັບຟັງການປະກອບຄໍາຄິດຄໍາເຫັນ ຂອງບັນດາຫ້ອງການ, ກົມກອງ,ຕົວແບບດ້ານຕ່າງໆ ແລະ ກອງປະຊຸມໃຫ່ຍອົງຄະນະເມືອງຊານໄຊ ຄັ້ງທີ VIII ຈະໄດ້ດຳເນີນໄປເປັນເວລາ 2 ວັນ ຈິ່ງຈະສຳເລັດ.

ໂດຍ: ມະນີວອນ ວຽງໄຊ