ການແຜ່ລະບາດເຊື້ອພະຍາດໂຄວິດ-19 ສົ່ງຜົນກະທົບຕໍ່ໂຄງສ້າງເສດຖະກິດແຫ່ງຊາດໂດຍລວມຫລາຍຢ່າງ ໂດຍສະເພາະ ການຈັດເກັບລາຍຮັບເຂົ້າງົບປະມານແຫ່ງລັດຂອງຂະແໜງ ສ່ວຍສາອາກອນ, ຊຶ່ງອີງຕາມການຄາດຄະເນລາຍຮັບ 6 ເດືອນຕົ້ນປີ 2021 ທົ່ວປະເທດອາດບໍ່ບັນລຸຕາມແຜນການທີ່ກໍານົດໄວ້ ຫລື ປະຕິບັດໄດ້ພຽງແຕ່ 4.642,1 ຕື້ກີບເທົ່າກັບ 38,3% ຂອງແຜນ ການປີ.ອີງຕາມລາຍງານຂອງ ທ່ານ ພູທະນູເພັດ ໄຊສົມບັດ ຫົວໜ້າກົມສ່ວຍສາອາກອນ ກະຊວງການເງິນ ຕໍ່ກອງປະຊຸມສະຫລຸບການຈັດຕັ້ງປະຕິບັດ 5 ເດືອນຕົ້ນປີ ແລະ ຄາດຄະເນແຜນການໝົດປີ 2021 ຂອງຂະແໜງການເງິນຜ່ານລະບົບ VDO Conference, ຊຶ່ງໄດ້ຈັດຂຶ້ນໃນທ້າຍອາທິດຜ່ານມາ, ໂດຍການເປັນປະທານຂອງ ທ່ານ ບຸນໂຈມ ອຸບົນປະເສີດ ລັດຖະມົນຕີ ກະຊວງການເງິນໃນປີ 2021 ຂະແໜງສ່ວຍສາອາກອນ, ໄດ້ຮັບຕົວເລກແຜນການຈັດເກັບລາຍຮັບທັງໝົດ 12.112 ຕື້ກີບ.

ໃນນີ້, ກົມສ່ວຍສາອາກອນຈໍານວນ 7.068,97 ຕື້ກີບ ແລະ ທ້ອງຖິ່ນຈໍານວນ 5.043,03 ຕື້ກີບ. ຜ່ານການຈັດຕັ້ງປະຕິບັດລາຍຮັບໃນໄລຍະ 4 ເດືອນ ປີ 2021 ສາມາດປະຕິບັດໄດ້ 3.250,4 ຕື້ກີບ ເທົ່າກັບ 26,9% ຂອງແຜນການປີ ແລະ ຄາດຄະເນລາຍຮັບໃນ 6 ເດືອນຕົ້ນປີ 2021 ຈະສາມາດປະຕິບັດໄດ້ພຽງແຕ່ 4.642,1 ຕື້ກີບ ຫລື ເທົ່າກັບ 38,3% ຂອງແຜນການປີ, ແຕ່ຖ້າທຽບໃສ່ໄລຍະດຽວກັນຂອງປີຜ່ານມາ (2020) ເຫັນວ່າ ເພີ່ມຂຶ້ນ 11,1% ຄິດເປັນເງິນປະມານ 465,2 ຕື້ກີບ. ທັງນີ້, ກໍ່ຍ້ອນລາຍຮັບຈາກອາກອນປົກກະຕິ (ອາກອນເງິນເດືອນ, ອາກອນກໍາໄລ, ອາກອນມູນຄ່າເພີ່ມ, ອາກອນຊົມໃຊ້).

ເຖິງແມ່ນວ່າການເກັບລາຍຮັບຈາກຈາກອາກອນປົກກະຕິເພີ່ມຂຶ້ນ ແຕ່ຖ້າທຽບຕົວເລກລາຍຮັບ 6 ເດືອນຕົ້ນປີ ບໍ່ສາມາດບັນລຸຕາມແຜນການທີ່ກໍານົດໄວ້, ປັດໄຈຫລັກເກີດຈາກການລະບາດຂອງພະຍາດໂຄວິດ-19, ຊຶ່ງນັບແຕ່ຕົ້ນປີ 2020 ເປັນຕົ້ນມາ, ໂຄງສ້າງເສດຖະກິດຂອງປະເທດລາວ ທີ່ມີການຢຸດສະງັກ, ລວມທັງການປະຕິບັດມາດຕະການເພື່ອສະກັດກັ້ນ ແລະ ເຝົ້າລະວັງຕາມຄໍາສັ່ງຂອງທ່ານນາຍົກລັດຖະມົນຕີເລກທີ 15/ນຍ ແລະ ມີການຂະຫຍາຍເວລາສະກັດກັ້ນ ແລະ ເຝົ້າລະວັງຕື່ມອີກ, ຊຶ່ງໄດ້ສົ່ງຜົນກະທົບຕໍ່ການຂະຫຍາຍຕົວຂອງເສດຖະກິດປະເທດໂດຍລວມເປັນຕົ້ນບັນດາແຂວງໃຫຍ່ ທີ່ມີຖານຫົວໜ່ວຍທຸລະກິດທີ່ສໍາຄັນ ຄື: ນະຄອນຫລວງວຽງຈັນ, ແຂວງຫລວງພະບາງ, ແຂວງຈໍາປາສັກ, ແຂວງສະຫວັນນະເຂດ, ແຂວງວຽງຈັນ, ແຂວງບໍ່ແກ້ວ (ເຂດເສດຖະກິດພິເສດ), ຊຶ່ງມີຫລາຍວິສາຫະກິດໄດ້ຢຸດເຊົາກິດຈະການ ຫລື ມີການຢຸດການເຄື່ອນໄຫວທຸລະກິດຊົ່ວຄາວ ໂດຍສະເພາະແມ່ນຂະແໜງການທ່ອງທ່ຽວ, ໂຮງແຮມ, ຮ້ານອາຫານ, ຮ້ານບັນເທີງ ແລະ ຂະແໜງການທີ່ກ່ຽວຂ້ອງຕ່າງໆ.ອີງຕາມຄາດຄະເນໝົດປີເບື້ອງຕົ້ນ ລາຍຮັບຈະປະຕິບັດໄດ້ 10.096,5 ຕື້ກີບເທົ່າກັບ 83,4% ຂອງແຜນການປີ.

ໃນນັ້ນ, ກົມສ່ວຍສາອາກອນຄາດຄະເນຈະປະຕິບັດໄດ້ 6.145,4 ຕື້ກີບເທົ່າກັບ 86,9% ຂອງແຜນການປີ ແລະ ທ້ອງຖີ່ນຄາດຄະເນຈະປະຕິບັດໄດ້ 3.951,1 ຕື້ກີບເທົ່າກັບ 78,3% ຂອງແຜນການປີ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)