ມີເດຍລາວແຂວງຄຳມ່ວນ ຕາມການລາຍງານຂອງ ທ່ານ ປ.ອ ສົມສະອາດ ອຸ່ນສີດາ ຮອງເຈົ້າແຂວງໆ ຄຳມ່ວນ, ທັງເປັນຫົວໜ້າພະແນກການເງິນແຂວງ ຕໍ່ກອງປະຊຸມສະຫລຸບວຽກງານການຈັດຕັ້ງພັກ ແລະ ວຽກງານວິຊາສະເພາະໄລຍະ 06 ເດືອນ 2021.

ຜ່ານມາການເກັບລາຍຮັບເຂົ້າງົບປະມານ ແຜນການປີ 756,18 ຕື້ກີບ, ສາມາດປະຕິບັດການຈັດເກັບລາຍຮັບໄດ້ທັງໝົດ 332,98 ຕື້ກີບ ເທົ່າກັບ 44,03% ຂອງແຜນການ, ທຽບໃສ່ໄລຍະດຽວກັນຂອງປີ2020 ແມ່ນເພີີ່ມຂື້ນ 55,03 ຕື້ກີບ ຫລື ເທົ່າກັບ 19,79%, (ພູດສູນກາງປະຕິບັດໄດ້ 39,64% ແລະ ພູດ ທ້ອງຖິ່ນປະຕິບັດໄດ້ 50,51%), ດ້ານລາຍຈ່າຍ ແຜນປີ 482,79 ຕື້ກີບ, ປະຕິບັດໄດ້ 187,44 ຕື້ກີບ ເທົ່າກັບ 38,82% ຂອງແຜນການ, ທຽບໃສ່ໄລຍະດຽວກັນຂອງປີຜ່ານມາ ແມ່ນຫຼຸດລົງ 11,04 ຕື້ກີບ ຫຼື ເທົ່າກັບ 5,89%, ສາມາດເບີກຈ່າຍເງິນເດືອນໃຫ້ພະນັກງານ – ລັດຖະກອນຂັ້ນແຂວງ ແລະ ຂັ້ນເມືອງໄດ້ເປັນປົກກະຕິ, ສ່ວນເງິນບໍລິຫານ ແລະ ຮ່ວງອື່ນໆ ກໍ່ໄດ້ສືບຕໍ່ແກ້ໄຂຕາມເງື່ອນໄຂຄວາມຈໍາເປັນ ແລະ ຄວາມສາມາດໃນການສະໜອງໄດ້.

ພ້ອມດຽວກັນນັ້ນຍັງຍົກໃຫ້ເຫັນບັນຫາດ້ານອ່ອນຂໍ້ຄົງຄ້າງ, ສາເຫດທີ່ພາໃຫ້ມີຈຸດດີ – ຈຸດອ່ອນ ແລະ ບົດຮຽນທີ່ຖອດຖອນໄດ້ໃນໄລຍະຜ່ານມາ ຕະຫຼອດຮອດທິດທາງແຜນການ 6 ເດືອນທ້າຍ ແລະ ໝົດປີ 2021 ດ້ານລາຍຮັບທັງໝົດຄາດຄະເນຈະໄດ້ 658,45 ຕື້ກີບ ເທົ່າກັບ 87,07% ໃນນັ້ນ, ລາຍ ຮັບສູນກາງຄາດວ່າຈະໄດ້ 380,68 ຕື້ກີບ ເທົ່າກັບ 84,48% ແລະ ລາຍຮັບທ້ອງຖິ່ນ 227,76 ຕື້ກີບ ເທົ່່າກັບ 90,89%, ດ້ານລາຍຈ່າຍຄາດວ່າປະຕິບັດໄດ້ 100%.

ກອງປະຊຸມສະຫລຸບວຽກງານການຈັດຕັ້ງພັກ ແລະ ສະຫລຸບວຽກງານການຈັດເກັບລາຍຮັບ ແລະ ຄຸ້ມຄອງລາຍຈ່າຍໄດ້ຈັດຂຶ້ນໃນວັນທີ 22 ມີຖຸນາ 2021 ທີ່ພະແນກການເງິນແຂວງຄຳມ່ວນ. ມີບັນດາທ່ານໃນຄະນະພັກ, ຄະນະພະແນກ, ບັນດາຫົວໜ້າຫ້ອງການ – ການເງິນປະຈໍາເມືອງ, ພ້ອມດ້ວຍສະມາຊິກພັກ, ພະນັກງານພາຍໃນພະແນກເຂົ້າຮ່ວມ.

ສຳລັບການຈັດຕັ້ງປະຕິບັດວຽກງານນຳພາຊີ້ນຳຂົງເຂດພັກ – ພະນັກງານ ເຊິ່ງຄະນະພັກພະແນກການເງິນໄດ້ຖືສໍາຄັນວຽກງານສຶກສາອົບຮົມການເມືອງ – ແນວຄິດ ໃຫ້ສະມາຊິກພັກ – ພະນັກງານ – ລັດຖະກອນທີ່ຢູ່ໃນຄວາມຮັບຜິດຊອບຂອງຕົນ ເພື່ອເຮັດໃຫ້ ສະມາຊິກພັກ – ພະນັກງານ ມີແນວຄິດ ຫລັກໝັ້ນການເມືອງໜັກແໜ້ນ, ເຊື່ອໝັ້ນຕໍ່ການນໍາພາຂອງພັກຕັ້ງໜ້າປະຕິບັດມະຕິຄໍາສັ່ງ, ກົດລະບຽບພັກ, ກົດໝາຍຂອງລັດ ແລະ ຕ້ານປະກົດການຫຍໍ້ທໍ້ທີຈະເກີດຂື້ນ ເປັນເອກະພາບສູງກັບແນວທາງນະໂຍບາຍຂອງພັກ – ລັດ ປະຕິບັດໜ້າທີ່ວຽກງານທີ່ຖືກມອບໝາຍມີຜົນສໍາເລັດເປັນຢ່າງດີ. ປະຈຸບັນໜ່ວຍພັກພະແນກການເງິນມີສະມາຊິກພັກພັກສົມບູນໜົດ 52 ສະ ຫາຍ, ຍິງ 19 ສະຫາຍ.