ມິເດຍລາວແຂວງຄຳມ່ວນ ຂ່າວ: ກອງຄຳ ສະຖາບັນສື່ມວນຊົນ, ວັດທະນະທຳ ແລະ ທ່ອງທ່ຽວ ຮ່ວມກັບພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງຄຳມ່ວນ ຈັດຊຸດຝຶກອົບຮົມໃນຫົວຂໍ້ “ສົ່ງເສີມວັດທະນະທຳເພື່ອການທ່ອງທ່ຽວ” ໃຫ້ແກ່ນັກສຳມະນາກອນຜູ້ທີ່ເຮັດວຽກຄຸ້ມຄອງວັດທະນະທຳ 06 ແຂວງພາກກາງ-ພາກໃຕ້ຄື: ຄຳມ່ວນ, ສະຫວັນນະເຂດ, ສາລະວັນ, ເຊກອງ, ອັດຕະປື ແລະ ຈຳປາສັກ ເຊິ່ງຈັດຂຶ້ນໃນວັນທີ 09 ມີນາ 2021 ທີ່ພະແນກ ຖວທ ແຂວງຄຳມ່ວນ ໂດຍມີທ່ານ ຄຳຫຼ້າ ຍອຍສາຍຄຳ ວ່າການຫົວໜ້າສະຖາບັນສື່ມວນຊົນ, ວັດທະນະທຳ ແລະ ທ່ອງທ່ຽວ ກະຊວງ ຖວທ, ທ່ານ ແສງມະນີ ສີລາເພັດ ຮອງຫົວໜ້າພະແນກ ຖວທ ແຂວງຄຳມ່ວນ, ມີນັກວິທະຍາກອນຈາກ ສະຖາບັນສື່ມວນຊົນ, ວັດທະນະທຳ ແລະ ທ່ອງທ່ຽວ (ສສວທ), ນັກສຳມະນາກອນທີ່ມາບັນດາແຂວງພາກກາງ-ພາກໃຕ້, ມາຈາກບັນດາພະແນກການອ້ອມຂ້າງແຂວງ ແລະ ຫ້ອງການ ຖວທ 10 ຕົວເມືອງໃນທົ່ວແຂວງຄຳມ່ວນເຂົ້າຮ່ວມ.

ຊຸດຝຶກອົບຮົມຄັ້ງນີ້ ບັນດານັກສຳມະນາກອນຈະໄດ້ຮັບຟັງກາຍເຜີຍແຜ່ກ່ຽວກັບ ການສົ່ງເສີມພູມປັນຍາທ້ອງຖິ່ນເພື່ອການທ່ອງທ່ຽວ, ວັດທະນະທຳຕິດພັນກັບການທ່ອງທ່ຽວ, ການຄຸ້ມຄອງວັດທະນະທຳ ນາມມະທຳ, ການຄຸ້ມຄອງງານບຸນປະເພນີ ແລະ ວຽກງານສີລະປະການສະແດງ ທັງນີ້ກໍ່ເພື່ອສ້າງຄວາມພ້ອມໃຫ້ແກ່ການປະຕິບັດແຜນພັດທະນາວຽກງານຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເວົ້າສະເພາະແຜນຍຸດທະສາດວຽກງານວັດທະນະທຳ ແຕ່ນີ້ຮອດປີ 2025 ແລະ ວິໃສທັດ ຮອດປີ 2030 ໃຫ້ໄດ້ຮັບການຈັດຕັ້ງປະຕິບັດ ເປັນແຕ່ລະບາດກ້າວດ້ວຍຄວາມຕັ້ງໜ້າຢ່າງໜັກແໜ້ນ.


ທ່ານ ຄຳຫຼ້າ ຍອຍສາຍຄຳ ວ່າການຫົວໜ້າສະຖາບັນສື່ມວນຊົນ, ວັດທະນະທຳ ແລະ ທ່ອງທ່ຽວ ກະຊວງ ຖວທ ກ່າວມີຄຳເຫັນຕໍ່ພິທີເປີດຊຸດຝຶກອົບຮົມຄັ້ງນີ້ວ່າ: ວຽກງານວັດທະນະທຳ ເປັນວຽກງານໜຶ່ງທີ່ສຳຄັນທີ່ສຸດ ໃນການພັດທະນາປະເທດຊາດ ມັນຈຶ່ງຮຽກຮ້ອງໃຫ້ພະນັກງານ-ວິຊາການ ທີ່ເຮັດວຽກໃນຂົງເຂດດັ່ງກ່າວ ທັງຂັ້ນສູນກາງ ແລະ ທ້ອງຖິ່ນ ຕ້ອງເປັນຜູ້ທີ່ມີຄວາມຮູ້, ຄວາມສາມາດ, ມີຄວາມເຂົ້າໃຈຕໍ່ວຽກງານ ແລະ ໝັ່ນຍົກສູງຄວາມຮູ້ໃຫ້ສົມຄູ່ກັບພາລະບົດບາດ ໃນການປົກປັກຮັກສາ ແລະ ພັດທະນາໃນຂົງເຂດວັດທະນະທຳ ໃຫ້ຢູ່ຄູ່ກັບຄົນລາວເຮົາຕະຫຼອດໄປ. ການຈັດຝຶກອົບຮົມຄັ້ງນີ້ຈະສາມາດຕອບສະໜອງຄວາມຮຽກຮ້ອງຕ້ອງການໃຫ້ບັນດາທ່ານທີ່ເຂົ້າຮ່ວມ ສາມາດເຄື່ອນໄຫວວຽກງານວັດທະນະທຳໃຫ້ໄດ້ດີຂຶ້ນ ແລະ ຊຸດຝຶກອົບຮົມດັ່ງກ່າວແມ່ນຈະໄດ້ດຳເນີນເປັນເວລາ 03 ວັນ (09-11 ມີນາ 2021) ຈຶ່ງຈະສໍາເລັດ.