ກອງປະຊຸມໃຫຍ່ຄັ້ງທີ VII ຂອງໜ່ວຍພັກດັ່ງກ່າວ ໄດ້ຈັດຂຶ້ນໃນວັນທີ 10 ມີນາ 2020 ຜ່ານມາ, ໂດຍການເປັນກຽດເຂົ້າຮ່ວມຂອງ ສະຫາຍ ດາວເຮືອງ ນັນທະວົງ ຄະນະປະຈຳພັກແຂວງ, ຮອງເຈົ້າແຂວງໆວຽງຈັນ, ມີຄະນະຮັບຜິດຊອບກອງປະຊຸມໃຫຍ່ 3 ຂັ້ນຂອງແຂວງ, ມີເລຂາໜ່ວຍພັກອ້ອມຂ້າງ, ພ້ອມດ້ວຍສະມາຊິກພັກພາຍໃນໜ່ວຍເຂົ້າຮ່ວມ.

ໃນປະຊຸມ ສະຫາຍ ອານຸມັດ ພັນທະວົງ ຄະນະໜ່ວຍພັກທະນາຄານສົ່ງເສີມກະສິກຳສາຂາແຂວງວຽງໄດ້ກ່າວໃນບົດລາຍງານການເມືອງບາງຕອນນວ່າ: ໃນຕະຫຼອດໄລຍະເວລາ 5 ປີຜ່ານມາ, ພາຍໃຕ້ຄວາມເອົາໃຈໃສ່ໃກ້ຊິດຕິດແທດຂອງອົງຄະນະພັກແຂວງວຽງຈັນ ແລະ ຍ້ອນການເອົາໃຈໃສ່ຊີ້ນຳ-ນຳພາຂອງຄະນະໜ່ວຍພັກ, ບວກກັບຄວາມເປັນເຈົ້າການຂອງສະມາຊິກພັກ, ພະນັກງານ ແລະ ການປະສານສົມທົບກັບອໍານາດລັດ, ຄະນະພັກຈຶ່ງເຕີບໃຫຍ່ເຂັ້ມແຂງດ້ານກົງຈັກຂອງພັກ, ມີຄວາມໜັກແໜ້ນທາງດ້ານການເມືອງ-ແນວຄິດ, ມີແບບແຜນວິທີເຮັດວຽກດີ,ອົງການຈັດຕັ້ງມະຫາຊົນເປັນກຳລັງຕົ້ນຕໍຂອງພັກ ຈຶ່ງສາມາດຍາດໄດ້ຜົນສຳເລັດດ້ານວຽກງານວິຊາສະເພາະ ແລະ ກໍໄດ້ມີການພັດທະນາດີຂຶ້ນຫລາຍດ້ານ ເປັນຕົ້ນແມ່ນວຽກງານບັນຊີ-ໄອທີ

ໃນເມື່ອກ່ອນແຍກກັນແຕ່ລະວຽກງງານ ໂດຍມີການຊີ້ນຳປະຕິບັດໜ້າວຽກງານຂອງໃຜລາວແຕ່ເນື່ອງຈາກວຽກງານນີ້ມີຄວາມສຳຄັນເຊັ່ນກັນໃນການຫັນເປັນທັນສະໄໝ ເພື່ອໃຫ້ບໍລິການລູກຄ້າທີ່ມາໃຊ້ບໍລິການ ໃຫ້ມີຄວາວ່ອງໄວ, ທັນກັບສະພາບການ ປະຈຸບັນສາມາດອອນລາຍໄດ້ທົ່ວລະບົບ ທະນາຄານສົ່ງເສີມກະສິກຳ ແລະ ນຳໃຊ້ APP Quick,SMS banking, ATM ທີ່ທັນສະໄໝຊ່ວຍບໍລິການໄດ້ຢ່າງແຂງແຮງເຮັດໃຫ້ການຝາກເງິນ-ຖອນເງິນ, ໂອນເງິນພາຍໃນ ແລະ ຕ່າງປະເທດ, ການຂາຍປະກັນໄພ, ເສຍຄ່າທາງ ແລະ ການບໍລິການອື່ນໆ ຊຶ່ງສ້າງຄວາມເພິ່ງພໍໃຈໃຫ້ແກ່ລູກຄ້າ, ນັກທຸລະກິດ, ທະຫານ, ຕຳຫຼວດ ແລະ ປະຊາຊົນບັນດາເຜົ່າ ທີ່ເຂົ້າມາໃຊ້ບໍລິການ, ລະດົມແຫຼ່ງທຶນ ເພື່ອສະໜອງການປ່ອຍກູ້ໃຫ້ແກ່ການຂະຫຍາຍສິນເຊື່ອໄດ້ຕາມຄວາມຕ້ອງການ ແລະ ຍັງຮັກສາສະພາບຂອງສາຂາໄດ້ປັນຢ່າງດີ ຊຶ່ງສະແດງໃຫ້ເຫັນຕົວເລກການເຕີບໂຕດ້ານຊັບສິນ ມາຮອດປີ 2020 ເພີ້ມຂຶ້ນເປັນ 459 ຕື້ກວ່າກີບ, ທຽບເທົ່າ 50,92% ຂອງຍອດຊັບສິນ.ດ້ານໜີ້ສິນ ມາຮອດປີ 2020 ເພີ້ມຂື້ນເປັນ 465 ຕື້ກວ່າກີບ, ທຽບເທົ່າ 55,93% ຂອງຍອດໜີ້ສິນ.ດ້ານແຫຼ່ງທຶນມາຮອດປີ 2020 ເພີ້ມຂຶ້ນເປັນ 42.692 ບັນຊີ, ເປັນຈຳນວນເງິນ 458 ຕື້ກວ່າກີບ, ທຽບເທົ່າ 42,24% ຂອງຍອດເງິນຝາກ, ມາຮອດປີ 2020 ບັນຊີບັດ ATM ເພີ່ມຂຶ້ນ 14.879 ບັດ.

ຄະນະໜ່ວຍພັກ ໄດ້ຖືວຽກງານສິນເຊື່່ອເປັນບູລິມະສິດທີ່ໜຶ່ງໃນການບໍລິຫານຂະແຫນງການນີ້ໃຫ້ມີຄວາມຄ່ອງຕົວ ໃນການປ່ອຍສິນເຊື່ອ ແລະ ການແກ້ໄຂໜີ້ສິນໃຫ້ຢູ່ເກນທີ່ຂັ້ນເທິງກໍານົດໃຫ້ໂດຍສະເພາະແມ່ນປ່ອຍກູ້ເຂົ້າໃນຂະແໜງກະສິກຳ ໃຫ້ບັນລຸ80% ຂຶ້ນໄປ ຂອງຍອດສິນເຊື່ອທັງໝົດ, ຜ່ານການຈັດຕັ້ງປະຕິບັດມາຮອດປີ 2020 ສາມາດປ່ອຍສິນເຊື່ອໃນຂະແໜງກະສິກຳ ບັນລຸ 81,37%, ຂອງຍອດສິນເຊື່ອ ແລະ ການຂະຫຍາຍເງິນກູ້ລາຍໃໝ່ບໍ່ໃຫ້ເກີດເປັນໜີ້ສິນ NPL ເກີນ 3% ຕາມຂໍ້ກຳນົດ, ຜ່ານການຈັດຕັ້ງປະຕິບັດໄດ້ 1,85% ທັງໝົດນີ້, ສະແດງໃຫ້ເຫັນດ້ານຕົວເລກການຂະຫຍາຍສິນເຊື່ອ ມາຮອດເດືອນປີ2020 ມີຍອດສິນເຊື່ອທັງໝົດ 228 ຕື້ກວ່າກີບ, ໃນນີ້, ເກີດເປັນໜີ້ NPL ໃນໃບລາຍງານຖານະການເງິນ ລຸດລົງຍັງເຫຼືອ 0,9% ແລະ ໜີ້ NPL ນອກໃບລາຍງານຖານະການເງິນ ລຸດລົງຍັງເຫຼືອ 13%.

ໃນກອງປະຊຸມບັນດາຜູ້ແທນສົມບູນ ຈຳນວນ 34 ສະຫາຍ ໄດ້ໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະໜ່ວຍພັກທະນາຄານສົ່ງເສີມກະສິກຳ ສາຂາແຂວງວຽງຈັນ ຊຸດໃໝ່ 3 ສະຫາຍ. ໃນກອງປະຊຸມຄັ້ງປະຖົມມະລຶກ ໄດ້ເປັນເອກະພາບເລືອກເອົາ ສະຫາຍ ຄຳພວງ ເພົ້າບົວວົງ ເປັນເລຂາໜ່ວຍພັກ, ສະຫາຍ ສຸວັນໄຊ ແສງຈັນດາລາ ເປັນຮອງເລຂາໜ່ວຍພັກ, ທັງເປັນຜູ້ກວດກາໜ່ວຍພັກ ແລະ ເລືອກເອົາ ສະຫາຍ ນາງ ພອນສະຫວັນ ຄຳພິລາວົງ ເປັນຄະນະໜ່ວຍພັກຊຸດໃໝ່ ເພຶ່ອສືບຕໍ່ຊີ້ນຳ-ນຳພາໃນການຈັດຕັ້ງປະຕິບັດວຽກງານຂອງທະນາຄານສົ່ງເສີມກະສິກຳສາຂາແຂວງວຽງຈັນຕໍ່ໄປ. ພ້ອມທັງເລືອກເອົາຜູ້ແທນສົມບູນ 1 ສະຫາຍ ແລະ ສຳຮອງ 1 ສະຫາຍ ໄປຮ່ວມກອງປະຊຸມໃຫຍ່ຄັ້ງທີ VI ຂອງອົງຄະນະພັກແຂວງວຽງຈັນ ຕື່ມອີກ.

ພາບ-ຂ່າວ ໂດຍ: ບຸນມາ ແກ້ວບຸດດາ
medialao