ກອງປະຊຸມເຜີຍແຜ່ກົດໝາຍວ່າດ້ວຍປ້າຍໄດ້ຈັດຂຶ້ນໃນຕອນເຊົ້າວັນທີ 12 ມີນາ 2020 ຢູ່ທີ່ຫ້ອງປະຊຸມພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງສະຫວັນນະເຂດໂດຍໃຫ້ກຽດເຂົ້າຮ່ວມເປັນປະທານຂອງ ທ່ານ ບົວເງິນ ຊາພູວົງ ຮອງລັດຖະມົນຕີກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ, ມີຄະນະພະແນກ ຖວທຈາກ 6 ແຂວງພາກໃຕ້ຄື: ແຂວງສະຫວັນນະເຂດ, ຄຳມ່ວນ, ສາລະວັນ,ຈຳປາສັກ , ເຊກອງ ແລະ ແຂວງອັດຕະປື , ພ້ອມມີບັນຫົວໜ້າຫ້ອງການ ຖວທ ຈາກ14ເມືອງ1ນະຄອນ ຂອງແຂວງສະຫວັນນະເຂດ, ພະນັກງານຈາກກະຊວງ ຖວທ ,ຜູ້ປະກອບການກ່ຽວກັບປ້າຍຈໍານວນໜຶ່ງເຂົ້າຮ່ວມ.

ທ່ານ ປອ ວຽງພອນ ສຸກຂະວົງ ຫົວໜ້າພະແນກຄຸ້ມຄອງປ້າຍ ແລະ ສວນສາທາລະນະກົມວັດທະນະທຳມະຫາຊົນ ກະຊວງ ຖວທ ກໍ່ໄດ້ໃຫ້ກຽດເຜີຍແຜ່ກົດໝາຍວ່າດ້ວຍປ້າຍເຊິ່ງກົດໝາຍດັ່ງກ່າວໄດ້ກຳນົດ ຫຼັກການ,ລະບຽບການແລະມາດຕະການກ່ຽວກັບການຄຸ້ມຄອງແລະການຕິດຕາມກວດກາປ້າຍເພື່ອໃຫ້ມີຄວາມຖືກຕ້ອງ,ມີປະສິດທິພາບ,ມີລັກສະນະຊາດ, ກ້າວໜ້າແລະມະຫາຊົນແນໃສ່ຮັບປະກັນຄວາມເປັນລະບຽບຮຽບຮ້ອຍຂອງສັງຄົມ, ຄວາມໝັ້ນຄົງຂອງຊາດສາມາດເຊື່ອມໂຍງກັບພາກພື້ນ ແລະ ສາກົນປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ. ປ້າຍແມ່ນ: ຜະລິດຕະພັນສື່ປະເພດໜຶ່ງ ທີ່ສ້າງຂຶ້ນ ດ້ວຍຕົວໜັງສື, ຕົວເລກ, ຮູບພາບ, ຮູບແຕ້ມ, ການປັ້ນ, ການຫຼໍ່, ການຄວັດ ຫຼື ແກະສະຫຼັກ ແລະ ແສງສີ ເພື່ອບົ່ງບອກ, ສຶກສາອົບຮົມ ແລະ ໂຄສະນາ ໃຫ້ສັງຄົມຮັບຮູ້ ແລະ ເຂົ້າໃຈ, ກົດໝາຍທີ່ເຜີຍແຜ່ໃນຄັ້ງນີ້ມີທັງໝົດ 12 ພາກ 6 ໝວດ ແລະ ມີ 64 ມາດຕາ, ພາກທີ1ເວົ້າເຖິງບົດບັນຍັດທົ່ວໄປ, ພາກທີ 2 ເວົ້າເຖິງປະເພດແລະຊະນິດປ້າຍ, ພາກທີ 3 ເວົ້າເຖິງເນື້ອໃນ, ສີພື້ນ, ສີຕົວໜັງສືແລະຄວາມຮຸ່ງແຈ້ງຂອງປ້າຍ, ພາກທີ 4 ເວົ້າເຖິງການດຳເນີນທຸລະກິດກ່ຽວກັບປ້າຍ, ພາກທີ 5 ເວົ້າເຖິງການຂໍອະນຸຍາດອອກປ້າຍ, ຂະໜາດ, ການຕິດຕັ້ງ ແລະ ການກຳນົດເວລານຳໃຊ້, ພາກທີ 6 ແມ່ນເວົ້າເຖິງສິດ ແລະ ພັນທະຂອງພົນລະເມືອງ ແລະ ຜູ້ດຳເນີນທຸລະກິດກ່ຽວກັບປ້າຍ, ພາກທີ 7 ເວົ້າເຖິງການປ່ຽນແປງ, ການໂຈະຊົ່ວຄາວ ແລະ ການຍົກເລີກການດຳເນີນທຸລະກິດກ່ຽວກັບປ້າຍ, ພາກທີ 8 ເວົ້າເຖິງຂໍ້ຫ້າມ, ພາກທີ9ເວົ້າເຖິງການແກ້ໄຂຂໍ້ຂັດແຍ່ງ, ພາກທີ 10 ເວົ້າເຖິງການຄຸ້ມຄອງແລະກວດກາວຽກງານກ່ຽວກັບປ້າຍ, ພາກທີ11ເວົ້າເຖິງນະໂຍບາຍຕໍ່ຜູ້ມີຜົນງານແລະມາດຕະການຕໍ່ຜູ້ລະເມີດແລະພາກທີ 12ແມ່ນເວົ້າເຖິງບົດບັນຍັດສຸດທ້າຍ.

ຈາກນັ້ນໃນກອງປະຊຸມກໍ່ໄດ້ມີການສົນທະນາແລກປ່ຽນຄຳຄິດເຫັນກ່ຽວກັບປ້າຍ ແລະ ຈະໄດ້ຮັບການຊີ້ນຳມີຄຳເຫັນຈາກປະທານກອງປະຊຸມຕື່ມອີກ.

savannakhet medialaos