ກະຊວງສາທະລະນະສຸກ ຢືນຢັນຢ່າງໜັກແໜ້ນວ່າ: ເຄື່ອງກວດຫາເຊື້ອ ພະຍາດໂຄວິດ-19 ແບບໄວ(Rapid Test) ທີ່ຫລາຍຄົນກໍາລັງໃຫ້ຄວາມສົນໃຈ ໃນໂລກອອນລາຍໃນປັດຈຸບັນນີ້ ແມ່ນຍັງບໍ່ທັນໄດ້ຖືກ ຮັບຮອງຈາກ ອົງການອະນາໄມໂລກ ກໍຄືຈາກກະຊວງສາທາ ລະນະສຸກຂອງລາວ ເພາະຜົນກວດອອກມາ ຍັງບໍ່ທັນແນ່ນອນ, ຖ້າບຸກຄົນ, ນິຕິບຸກຄົນໃດນຳເຂົ້າ ຫລື ມີໄວ້ຄອບຄອງ ແມ່ນຜິດກົດໝາຍ ຂອງ ສປປ ລາວ.

ດຣ. ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໃຫ້ສຳພາດ ໃນວັນທີ 17 ມີນາ ນີ້ວ່າ: ປັດຈຸນີ້ ມີບາງກຸ່ມຄົນພະຍາຍາມ ຈະເອົາເຄື່ອງດັ່ງກ່າວເຂົ້າມາ ສປປ ລາວ ເພື່ອຂາຍ ຫລື ນຳເຂົ້າເພື່ອມາບໍລິການກວດຫາເຊື້ອ ໂຄວິດ-19, ໃນຄວາມເປັນຈິງແລ້ວ ເຄື່ອງດັ່ງກ່າວ ຍັງບໍ່ທັນໄດ້ຂຶ້ນທະບຽນຢູ່ໃນ ສປປ ລາວ ເທື່ອ. ເຖິງວ່າທ່ານໄດ້ເຄື່ອງມາແລ້ວກໍຕາມ ກໍຖືວ່າບໍ່ຖືກຕ້ອງຕາມກົດໝາຍ. ດ້ວຍເຫດນັ້ນ, ຜົນກວດທີ່ອອກມາ ຈະບໍ່ມີຄວາມແນ່ນອນ 100%, ໝາຍຄວາມວ່າ ບາງເທື່ອຄົນເຈັບມີເຊື້ອ ແຕ່ວ່າຜົນບອກວ່າບໍ່ມີເຊື້ອ ຫລື ວ່າບຸກຄົນນັ້ນບໍ່ມີເຊື້ອ ຜົນພັດບອກວ່າພົບເຊື້ອ ອັນນີ້ແມ່ນອັນຕະລາຍທີ່ສຸດ. ສຳລັບການ ຢັ້ງຢືນຜົນກວດຫາເຊື້ອ ໂຄວິດ-19 ມີພຽງແຕ່ 4 ສູນເທົ່ານັ້ນທີຖືວ່າ ເປັນທາງການ ແລະ ສາກົນຍອມຮັບ ຄື: ສູນວິເຄາະ ແລະ ລະບາດວິທະຍາແຫ່ງຊາດ, ຫ້ອງວິເຄາະສະຖາບັນປັດສະເຕີລາວ, ຫ້ອງວິເຄາະ LOMWRU ໂຮງໝໍມະໂຫສົດ ແລະ ສູນວິໄຈພະຍາດ ຊຶມເຊື້ອເມລີເອີ.

ດຣ. ຣັດຕະນະໄຊ ເພັດສຸວັນ ຢ້ຳຕື່ມວ່າ: ເຄື່ອງກວດຫາເຊື້ອ ໂຄວິດ-19 ແບບໄວ ຍັງມີສິ່ງຈໍາກັດຫລາຍຢ່າງໃນການນໍາໃຊ້ຕົວຈິງ ເພື່ອບົ່ງມະຕິພະຍາດ ເນື່ອງຈາກວ່າຄວາມໄວໃນ ການກວດພົບເຊື້ອບໍ່ສູງ ເຮັດໃຫ້ການອອກ ຜົນເປັນລົບທີ່ຜິດພາດ ແລະ ມີຄວາມຈໍາບໍ່ສູງ ອັນເປັນສາເຫດໃຫ້ເກີດມີປະຕິກິລິຍາກັບພູມຄຸ້ມກັນ ອື່ນທີ່ຄ້າຍຄຽງກັນ ແລະ ເກີດການອອກຜົນບວກຜິດພາດ. ດັ່ງນັ້ນ ລັດຖະມົນຕີ ກະຊວງສາທາລະນະສຸກ ຈຶ່ງໄດ້ອອກຄໍາສັ່ງ ເລກທີ 0246/ສທ ລົງວັນທີ 3 ມີນາ 2020 ຫ້າມບຸກຄົນ ຫລື ນິຕິບຸກຄົນ ນໍາເຂົ້າ, ຈໍລະຈອນຈໍາໜ່າຍ ແລະ ນໍາໃຊ້ເຄື່ອງທົດສອບແບບໄວ ເພື່ອວິເຄາະຊອກຫາ ການຕິດເຊື້ອພະຍາດ ໂຄວິດ-19 ມາຈໍາໜ່າຍຢູ່ໃນ ສປປ ລາວ ຢ່າງເດັດຂາດ.

ໃນຂະນະດຽວກັນ ຍັງຫ້າມບັນດາສະຖານທີ່ ບໍລິການສາທາລະນະສຸກແຕ່ລະຂັ້ນ ນັບທັງພາກລັດ ແລະ ເອກະຊົນ ໃນຂອບເຂດທົ່ວປະເທດ ນໍາໃຊ້ເຄື່ອງທົດສອບແບບໄວດັ່ງກ່າວ ເພື່ອວິເຄາະຊອກຫາ ການຕິດເຊື້ອພະຍາດ ໂຄວິດ-19 ຢ່າງເດັດຂາດ. ຖ້າບຸກຄົນໃດ ຫລື ພາກສ່ວນໃດລະເມີດ ຄໍາສັ່ງສະບັບນີ້ ຈະຖືກກ່າວເຕືອນ ແລະ ລົງໂທດຕາມລະບຽບກົດໝາຍ. ໃນກໍລະນີພົບເຫັນການ ນໍາໃຊ້ເຄື່ອງທົດສອບແບບໄວດັ່ງກ່າວ ໃນສະຖານທີ່ໃດກໍຕາມ ໃຫ້ແຈ້ງມາຍັງກະຊວງສາທາລະນະສຸກ ຫລື ລາຍງານໃຫ້ສາຍດ່ວນ 166 ຮັບຊາບດ້ວຍ.

Medialaos MMD