ທ່ານ ທອງລຸນ ສີສຸລິດ ນາຍົກລັດຖະມົນຕີພ້ອມດ້ວຍ ຄະນະສະເພາະກິດ ໄດ້ໄປ ຢ້ຽມຢາມ ແລະ ກວດກາເບິ່ງສະພາບຄວາມເປັນຈິງໃນການປະຕິບັດໜ້າທີ່ຂອງພາກສ່ວນ ທີ່ກ່ຽວຂ້ອງ ກໍຄືກົນໄກການ ປະຕິບັດວຽກງານ, ລວມທັງ ໂຄງລ່າງພື້ນຖານ, ເຕັກນິກ ແລະ ອຸປະກອນຮັບໃຊ້ຕ່າງໆ ຢູ່ດ່ານສາກົນ ຂົວມິດຕະພາບ ລາວ-ໄທ ແຫ່ງທີ 3 ຄໍາມ່ວນ- ນະຄອນພະນົມ ໃນການຮອງ ຮັບຜູ້ຄົນເຂົ້າດ່ານສາກົນດັ່ງກ່າວ.

ພ້ອມທັງໄປຢ້ຽມຢາມສູນກັກບໍລິເວນຊົ່ວຄາວໂຮງຮຽນມັດທະຍົມຕົ້ນນາໂບ, ເມືອງ ທ່າແຂກ, ແຂວງຄຳມ່ວນ ໃນ ວັນທີ26 ມີນານີ້. ສຳລັບຢູ່ດ່ານສາກົນ ຂົວມິດຕະພາບລາວ-ໄທແຫ່ງທີ 3 ນີ້ນັບແຕ່ວັນທີ 20 ຫາ 25 ມີນາ 2020 ມີຄົນເຂົ້າຜ່ານດ່ານທັງ ໝົດ7.300 ກວ່າຄົນ, ໃນນັ້ນມີ ຄົນຫວຽດນາມ 2.008 ຄົນ,ຄົນ ລາວ 4.07 2ຄົນ,ຄົນໄທ 1.230 ຄົນ, ຄົນຈີນ 4 ຄົນ. ສຳລັບ ຄົນລາວທີ່ເຂົ້າມານັ້ນ ແມ່ນຢູ່ແຂວງຄຳມ່ວນ ມີຈຳນວນ 3.993 ຄົນ, ບໍລິຄຳໄຊ 41 ຄົນ, ສະຫວັນນະເຂດ 33 ຄົນ, ຈຳປາສັກ ແລະ ນະຄອນຫຼວງວຽງຈັນ ພາກສ່ວນລະ 2 ຄົນ ແລະ ໄຊຍະບູລີ 1 ຄົນ.

ຕໍ່ກັບຄົນທີ່ເຂົ້າຜ່ານດ່ານດັ່ງກ່າວ ແມ່ນ ໄດ້ມີການກວດສຸຂະພາບ, ຖ້າພົບກໍລະນີສົງໄສ ແມ່ນສົ່ງໄປ ຕິດຕາມອາການ ຢູ່ຫ້ອງແຍກ ປ່ຽວໂຮງໝໍແຂວງຄຳມ່ວນ, ສ່ວນຜູ້ທີ່ບໍ່ມີໄຂ້ແຕ່ເດີນທາງເຂົ້າມາ ແມ່ນເຈົ້າໜ້າທີ່ ໄດ້ນຳ ເຂົ້າໄປກັກກັນຢູ່ຕາມສູນຕ່າງໆຂອງບັນດາເມືອງໃນຈຳນວນ 78 ສູນ ໃນທົ່ວແຂວງ, ສ່ວນຄົນຫວຽດນາມ ແມ່ນໄດ້ກວດສຸຂະພາບ ແລະ ສົ່ງຕໍ່ໄປຍັງປະເທດຫວຽດນາມ. ຜ່ານມາໄດ້ກັກຕົວຜູ້ທີ່ໄດ້ ເຂົ້າກັບນິຍາມ ອາດຕິດເຊື້ອພະຍາດ COVID-19 ຈໍານວນ 4ກໍລະນີ, ຜົນໄດ້ຮັບ3ກໍລະນີບໍ່ພົບເຊື້ອ ແລະ ອີກ1ຕົວຢ່າງຍັງລໍຖ້າຜົນກວດມາຮອດປັດຈຸບັນ ທົ່ວແຂວງຄຳມ່ວນ ຍັງບໍ່ພົບກໍລະນີຜູ້ຕິດເຊື້ອ COVID-19 ເທື່ອ.

ໃນໂອກາດນີ້, ທ່ານນາຍົກລັດຖະມົນຕີ ໄດ້ສະແດງຄວາມຊົມເຊີຍຕໍ່ເຈົ້າໜ້າທີ່, ພະນັກງານແພດໝໍ ແລະ ພາກສ່ວນທີ່ກ່ຽວຂ້ອງ ທີ່ ໄດ້ເອົາໃຈໃສ່ປະຕິບັດມາດຕະການຕ່າງໆ ກໍຄືໜ້າທີ່ ແລະ ຄວາມຮັບຜິດຊອບຂອງຕົນຢ່າງເຂັ້ມງວດ, ພ້ອມທັງ ຮຽກຮ້ອງໃຫ້ຜູ້ທີ່ຜ່ານດ່ານສາກົນ ຂົວມິດຕະພາບ ລາວ- ໄທ ແຫ່ງທີ 3 ແລະ ຜູ້ທີ່ຢູ່ສູນກັກບໍລິເວນຊົ່ວຄາວ ໂຮງຮຽນ ມັດທະຍົມຕົ້ນນາໂບ ຈົ່ງພ້ອມ ກັນອົດທົນເຝົ້າລະວັງ ແລະ ຕິດຕາມອາການຂອງຕົນຕາມລະບຽບຫຼັກການຂອງທາງການ ແພດ 14 ວັນ, ສິ່ງສຳຄັນແມ່ນ ຄວາມເປັນເຈົ້າການໃຫ້ການຮ່ວມມືກັບເຈົ້າໜ້າທີ່, ເຫັນແກ່ຜົນປະໂຫຍດສ່ວນລວມ, ມີຄວາມຮັບຜິດຊອບຕໍ່ຕົນເອງ, ຄອບຄົວ ແລະ ສັງຄົມ.

Medialaos MMD