ຫາກເພື່ອນຜູ້ອ່ານຕິດຕາມຂ່າວສານ-ບ້ານເມືອງຈະເຫັນວ່າໃນຊຸມມື້ມໍ່ໆມານີ້ ທົ່ວປະເທດເຮົາ ໂດຍສະເພາະຢູ່ນະຄອນຫຼວງວຽງຈັນເຈົ້າໜ້າທີ່ເພີ່ນເຂັ້ມງວດ-ກວດຂັນຫຼາຍຂື້ນ ໃນການສູ້ຢັນກັບການລະບາດພະຍາດ Covid-19.

        ບັນດາຄຳຂັວນ: ຢູ່ເຮືອນ-ຢຸດເຊື້ອ-ເພື່ອຊາດ ຕ້ານການລະບາດຂອງພະຍາດ Covid-19 ໄດ້ດັງກ້ອງໄປທົ່ວສັງຄົມ ແລະ ໂປໂລຖີ່ຂື້ນໃນໜ້າເຟສບຸກ.

        ມີຫຼາຍຂະບວນການທີ່ດີເດັ່ນ ໜ້າຍ້ອງຍໍສັນລະເສີນທີ່ປະກອບສ່ວນເຂົ້າໃນເຫດການຄັ້ງນີ້ ເປັນຕົ້ນແມ່ນກອງກຳລັງນັກຮົບເສື້ອຂາວ ເຊີ່ງຜູ້ຂຽນມີໂອກາດອ່ານເຫັນບາງຂໍ້ຄວາມໃນເຟສບຸກເຊັ່ນວ່າ: ນັ່ງກວດຄົນເຈັບບາງມື້ນໍ້າຕາໄຫຼເອົາຊື່ໆ; ຂໍໃຫ້ທ່ານຢູ່ກັບເຮືອນກາພໍ ຂໍຈົ່ງຢ່າໄດ້ເພີ້ມພາລະໃຫ້ພວກເຮົາຈົນເກີນຄວາມຈຳເປັນ; ພວກເຮົາສັນຍາວ່າຈະເຮັດໜ້າທີ່ເພື່ອພວກທ່ານເຕັມກຳລັງ.

        ບໍ່ທໍ່ນັ້ນ ຖ້າຕິດຕາມຂ່າວຈະເຫັນວ່າ ຢູ່ໂຮງໝໍມິດຕະພາບ 150 ຕຽງ… ຄະນະແພດໝໍທີ່ເຂົ້າຕິດຕາມຜູ້ຕິດເຊື້ອ Covid-19 ນັ້ນຕ້ອງໄດ້ປະຈຳການຕະຫຼອດ 24 ຊົ່ວໂມງ ເປັນເວລາ 1 ອາທິດ ຫຼັງຈາກສຳເລັດໜ້າທີ່ແລ້ວ ແທນທີ່ຈະໄດ້ກັບເຮືອນຫາຄອບຄົວ ພວກເພີ່ນຕ້ອງເສຍເວລາກັກກັນຕົວເອງອີກ 14 ວັນ… ໜ້າເຫັນໃຈພວກເພີ່ນແທ້ໆ ນໍ້າໃຈເສຍສະຫຼະສູງສົ່ງເໝືອນດັ່ງບົດເພງ ²ແພດປະຕິວັດ².

        ສ່ວນຄະນະສະເພາະກິດຂັ້ນສູນກາງ ກໍ່ຄືທ້ອງຖີ່ນຕ່າງກໍ່ຕິດຕາມກວດກາຜູ້ຄົນທີ່ມີກໍລະນີສົງໃສ; ຜູ້ເດີນທາງມາຈາກຕ່າງປະເທດຢ່າງເຂັ້ມງວດ… ອາດເວົ້າໄດ້ວ່າຢູ່ທຸກດ່ານເຂົ້າ-ອອກປະເທດ; ຢູ່ໂຮງໝໍເມືອງ-ແຂວງ ລ້ວນແຕ່ມີເຈົ້າໜ້າທີ່ແພດໝໍ ກໍ່ຄືຄະນະສະເພາະກິດເຝົ້າລະວັງ ແລະ ລາຍງານຜົນການກວດສອບໃຫ້ສັງຄົມໄດ້ຮັບຮູ້ຢ່າງທັນການ. ພວກເພີ່ນເຮັດວຽກຫາມເວັນ ຫາມຄືນ ບຸກບືນ ສູ້ຊົນແທ້ໆ… ສົມຄວນທີ່ສັງຄົມຍ້ອງຍໍຊົມເຊີຍ.

        ນອກຈາກແພດໝໍແລ້ວ ເຈົ້າໜ້າທີ່ປ້ອງກັນຊາດ-ປ້ອງກັນຄວາມສະຫງົບ ພວກເພີ່ນກໍ່ເຮັດວຽກຢ່າງຂະຫຍັນຂັນແຂງ ບໍ່ວ່າຢູ່ຊາຍແດນຫ່າງໄກສອກຫຼີກ ກໍ່ຄືຢູ່ເທດສະບານເມືອງໃນທົ່ວປະເທດ ກໍ່ໄດ້ມີການກວດກາ ແລະ ປ່າວເຕືອນໃຫ້ພໍ່ແມ່ປະຊາຊົນບໍ່ໃຫ້ອອກຈາກບ້ານ-ຈາກເຮືອນ ໂດຍສະເພາະຢູ່ນະຄອນຫຼວງ ເຂັ້ມງວດແທ້ໆ. ບໍ່ທໍ່ນັ້ນ ບັນດາອາສາສະໝັກ ແລະ ອຳນາດການປົກຄອງທຸກຂັ້ນ ກໍ່ເຂົ້າຮ່ວມຂະບວນການນີ້ຢ່າງເປັນເຈົ້າການ ແລະ ເຂັ້ມແຂງ ໂດຍບໍ່ຢ້ານກົວຕໍ່ພະຍາດໂລຄາ ພຽງແຕ່ໄດ້ຊ່ວຍໃຫ້ພໍ່ແມ່ປະຊາຊົນເຂົ້າໃຈເຖີງໄພອັນຕະລາຍຈາກການລະບາດຂອງພະຍາດ Covid-19.

        ສາມາດເວົ້າໄດ້ວ່າ ຂະບວນການສະກັດກັ້ນ ແລະ ກັນການລະບາດຂອງພະຍາດ Covid-19 ຢູ່ປະເທດເຮົາ ເປັນຂະບວນເຂັ້ມແຂງເດີນໄປຕາມການຕີຈັງຫວະຂອງການຈັດຕັ້ງ. ປະຕິບັດເຂັ້ມງວດຄຳສັ່ງເລກທີ 06/ນຍ ຂະບວນການນີ້ໜ້າຍ້ອງຍໍສັນລະເສີນ; ຂໍເປັນກຳລັງໃຈໃຫ້ທຸກທ່ານທີ່ເຂົ້າຮ່ວມຂະບວນການນີ້ ຈົ່ງເຂັ້ມແຂງທາງຈິດໃຈ ແລະ ຮ່າງກາຍ ພາບແພ້ສັດຕູໂຕຮ້າຍກາດຄືພະຍາດ Covid-19 ໄດ້ຢ່າງຮາບຄາບ.

ໂດຍ: ທິດດີ.