ຜູ້ຂຽນເຂົ້າໃຈວ່າ: ຫຼາຍຄົນເຝົ້າຕິດຕາມຂ່າວ ແລະ ສະພາບແຜ່ລະບາດຂອງໄວຣັດຢ່າງຈົດຈໍ່, ເຊິ່ງຫຼາຍຂ່າວທີ່ສຳຄັນ ສຳລັບສັງຄົມກໍຄື ນະໂຍບາຍລັດຖະບານທີ່ອອກມາແຕ່ລະໄລຍະເປັນຄຳສັ່ງ ຂໍ້ຫ້າມຕ່າງໆຂອງກະຊວງຕ່າງໆ, ຜູ້ຂຽນເຫັນຂ່າວຊຸດສະເພາະກິດອອກກວດບັນດາ ຮ້ານບັນເທິງ-ຮ້ານອາຫານ ທີ່ບໍ່ໃສ່ໃຈຂໍ້ແນະນຳວ່າໃຫ້ປິດ ແຕ່ຫຼາຍບ່ອນບໍ່ທັນປິດ ເຫັນວ່າດ້ານນີ້ເຮັດໄດ້ດີ, ແຕ່ເບື້ອງການຄວບຄຸມລາຄາສິນຄ້ານີ້ປະກົດຍັງມີຫາງສຽງຈົ່ມທຸກແຈທຸກມູມ.

          ຂະນະທີ່ກຳລັງຂຽນບົດນີ້ ຜູ້ຂຽນກໍໄດ້ຮັບຂ່າວທາງອອນລາຍໝູ່ຄົນໜຶ່ງເຂົ້າໄປຕະຫຼາດຂົວດິນ ເພື່ອຊື້ອາຫານມາສຳຮອງໄວ້; ຜູ້ກ່ຽວບອກວ່າ ແມ່ຄ້າຂາຍໝາກນາວໂລໜຶ່ງ ຊາວພັນກີບ ແລະ ຂີງໂລໜຶ່ງຊາວສີ່ພັນກີບ; ມັນແພງ ເພາະແມ່ຄ້າໄດ້ຂ່າວວ່າ ໝາກນາວ ແລະ ຂີງຕ້ານໄວຣັດໄດ້…! ບໍ່ພຽງແຕ່ເທົ່ານັ້ນ ບັນດາຊິ້ນ-ປາ ກໍຂ້ອນຂ້າງຖີບລາຄາຂຶ້ນສູງຈົນຕົກໃຈ ເຊິ່ງອາດຈະລວມສິນຄ້າອື່ນບາງຊະນິດນຳ, ຂ່າວ ແລະ ເຫດການແບບນີ້ຈິ່ງກາຍເປັນຫາງສຽງຈົ່ມຈາກສັງຄົມທີ່ເຈົ້າໜ້າທີ່ກ່ຽວຂ້ອງຄວນລົງກວດກາຕົວຈິງ.

          ຫາງສຽງໜຶ່ງທີ່ສັງຄົມຈົ່ມມາດົນ ກໍ່ແມ່ນໜ້າກາກອານະໄມປິດປາກ-ດັງ ທີ່ຍັງບໍ່ມີວີ່ແວວຫຼຸດລົງ ເຖິງແມ່ນວ່າພັກ-ລັດໄດ້ອອກຂໍ້ຫ້າມແລ້ວກໍ່ຕາມ ເຊິ່ງມັນກໍຮຽກຮ້ອງໃຫ້ກວດກາຕິດຕາມລາຄາຊື້-ຂາຍຕາມຮ້ານ ຫຼື ອອນລາຍຕ່າງໆ ເພາະຖືເປັນການຊ່ວຍກັນປ້ອງກັນພະຍາດ ຖ້າວ່າທຸກຄົນມີໜ້າກາກປິດປາກ-ດັງ; ເບຶ້ອງກະຊວງອຸດສາຫະກຳ ແລະ ການຄ້າ ອອກແຈ້ງການ ເລກທີ 0328 ລົງວັນທີ 26 ມີນາ 2020 ແມ່ນໄດ້ຄວບຄຸມເນື້ອໃນບໍ່ໃຫ້ຂຶ້ນລາຄາສິນຄ້າ ແລະ ສວຍໂອກາດຂາຍຍາມສະພາບວິກິດແບບນີ້, ສຳຄັນກໍແມ່ນ ຂໍ້ 4 ແຈ້ງການໄດ້ມອບໃຫ້ ພະແນກອຸດສາຫະກຳ – ການຄ້າແຂວງ ແລະ ນະຄອນຫຼວງ ເອົາໃຈໃສ່ຮັບຜິດຊອບ ແຕ່ງຕັ້ງພະນັກງານລົງກວດກາ.

          ຜູ້ຂຽນຈຶ່ງຂໍຮຽກຮ້ອງເລື້ອງການແກ້ໄຂໃນລາຄາສິນຄ້າ; ຄວບຄຸມບໍ່ໃຫ້ມີພວກສວຍໂອກາດນີ້ຈຳເປັນຮີບດ່ວນ ເພາະສັງຄົມສ່ວນໃຫຍ່ໄດ້ຮັບຜົນກະທົບທາງການເງິນ ແລະ ປາກທ້ອງ! ( ຈົບ )

ໂດຍ: ທິດດີ.