ມີເດຍລາວແຂວງສາລະວັນ ໂດຍ: ກິນດາວັນ ອ້ວນນາຄູ ພິທີມອບ-ຮັບ ໃບຢັ້ງຢືນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ຄັ້ງທີ II ປະຈໍາປີ 2020 ໃຫ້ 7 ໜ່ວຍພັກ ທີ່ຂຶ້ນກັບຄະນະພັກຮາກຖານພະແນກສາທາລະນະສຸກແຂວງສາລະວັນ ໄດ້ຈັດຂຶ້ນໃນວັນທີ 25 ມິຖຸນາ 2021, ຢູ່ທີ່ຫ້ອງປະຊຸມຂອງພະແນກ, ໂດຍການເຂົ້າຮ່ວມຂອງ ສະຫາຍ ສົມໃຈ ອຸ່ນຈິດ ຄະນະປະຈໍາພັກແຂວງ ຮອງເຈົ້າແຂວງ ຜູ້ຊີ້ນໍາວຽກງານວັດທະນະທໍາ-ສັງຄົມ, ສະຫາຍ ດຣ ອາຄົມ ລໍ່າວິຈິດ ກໍາມະການພັກແຂວງ ເລຂາຄະນະພັກຮາກຖານ ຫົວໜ້າພະແນກສາທາລະນະສຸກແຂວງ ມີບັນດາສະຫາຍຕາງໜ້າຈາກພະແນກການທີ່ກ່ຽວຂ້ອງ, ສະຫາຍເລຂາໜ່ວຍພັກ, ຄະນະພັກ ແລະ ສະມາຊິກພັກພາຍໃນພະແນກເຂົ້າຮ່ວມ.

ສະຫາຍ ດຣ ບຸນກອງ ໄຊສົມບັດ ເລຂາໜ່ວຍພັກອະນາໄມສົ່ງເສີມສຸຂະພາບ, ອາຫານ ແລະ ຢາ ໄດ້ຕາງໜ້າຂຶ້ນຜ່ານບົດສະຫຼຸບ ການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2020, ຊື່ງໄດ້ຈັດຕັ້ງປະຕິບັດວຽກງານດັ່ງກ່າວມີຜົນສຳເລັດໃນແຕ່ລະດ້ານ ສາມາດປະຕິບັດໄດ້ຕາມເນື້ອໃນມາດຖານເງື່ອນໄຂ ຂອງຄະນະພັກຂັ້ນເທິງວາງອອກກໍ່ຄື: ທິດທາງແຜນການຂອງໜ່ວຍພັກຕົນກໍານົດໄວ້ ແລະ ໄດ້ປະເມີນນຳພາດ້ານຄຸນທາດການເມືອງ, ດ້ານແນວຄິດ, ດ້ານການຈັດຕັ້ງ, ດ້ານແບບແຜນການນຳພາ, ດ້ານປະຕິບັດໜ້າທີ່ການເມືອງ ໄດ້ເປັນຢ່າງດີ ໂດຍໄດ້ຖືເອົາການສຶກສາອົບຮົມການເມືອງ-ແນວຄິດ, ເຊືີ່ອມຊຶມບັນດາມະຕິ, ຄຳສັ່ງ, ແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ສະເເດງອອກໃນການຈັດຕັ້ງປະຕິບັດວຽກງານວິຊາສະເພາະຢູ່ບັນດາໜ່ວຍງານທີ່ຂຶ້ນກັບການນໍາພາຂອງແຕ່ລະໜ່ວຍພັກ ແນໃສ່ສ້າງໃຫ້ພະນັກງານສະມາຊິກພັກ ມີຄຸນທາດການເມືອງໜັກແໜ້ນ, ພັດທະນາຂະແໜງການຂອງຕົນໃຫ້ມີບາດກ້າວ ຂະຫຍາຍຕົວຢ່າງຕໍ່ເນືອງ, ເອົາໃຈໃສ່ຕິດຕາມ, ກວດກາ ແລະ ແກ້ໄຂຜົນການດໍາເນີນຊີວິດການເມືອງດ້ວຍຄວາມຮັບຜິດຊອບສູງ ແລະ ສໍາເລັດ, ປັບປຸງກໍ່ສ້າງໜ່ວຍພັກ ຂອງຕົນໃຫ້ມີຄວາມປອດໃສ, ເຂັັ້ມແຂງ, ໜັກແໜ້ນ, ສະມາຊິກພັກແຕ່ລະສະຫາຍ ໄດ້ຍົກສູງສະຕິຕໍ່ການຈັດຕັັ້ງ, ເປັນເຈົ້າການປະຕິບັດລະບຽບຂອງພັກ, ກົດໝາຍຂອງລັດວາງອອກຢ່າງເຂັັ້ມງວດ, ເປັນແບບຢ່າງນໍາໜ້າ-ນໍາພາ ມະຫາຊົນ ປະຕິບັດໜ້າທີີ່ການເມືອງທີ່ຂັ້ນເທິງມອບໝາຍໃຫ້ໃນແຕ່ລະໄລຍະໃຫ້ມີຜົນສໍາເລັດ.

7 ໜ່ວຍພັກ ທີ່ໄດ້ຮັບການຢັ້ງຢືນເປັນໜ່ວຍພັກປອດໃສ ເຂັ້ມແຂງ ໜັກແໜ້ນ ຄັ້ງທີ II ຕໍ່ເນື່ອງ ປະຈໍາປີ 2020 ມີຄື: ໜ່ວຍພັກຫ້ອງການບໍລິຫານພະແນກສາທາ, ໜ່ວຍພັກອະນາໄມ ແລະ ສົ່ງເສີມສຸຂະພາບອາຫານ ແລະ ຢາ, ໜ່ວຍພັກກັນພະຍາດ ຄວບຄຸມພະຍາດຕິດຕໍ່, ໜ່ວຍພັກຫ້ອງການບໍລິຫານໂຮງໝໍແຂວງ, ໜ່ວຍພັກປິ່ນປົວພາຍໃນໂຮງໝໍແຂວງ, ໜ່ວຍພັກປິ່ນປົວພາຍນອກໂຮງໝໍ ແລະ ໜ່ວຍພັກສູນອົບຮົມ ຮສຂ (ໂຮງຮຽນແພດ).

ຈາກນັ້ນ, ກໍ່ໄດ້ມີພິທີມອບ-ຮັບ ໃບຢັ້ງຢືນໜ່ວຍພັກ, ປອດໃສ, ເຂັ້ມແຂງ ແລະ ໜັກແໜ້ນ ຄັ້ງທີ II ປະຈຳປີ 2020 ໃຫ້ 7 ໜ່ວຍພັກ, ໃຫ້ກຽດມອບໂດຍ: ສະຫາຍ ສົມໃຈ ອຸ່ນຈິດ ຮອງເຈົ້າແຂວງໆສາລະວັນ, ຮັບໂດຍ: ສະຫາຍເລຂາໜ່ວຍພັກ 7 ໜ່ວຍພັກ.