ໃນຕອນເຊົ້າຂອງວັນທີ 28 ສິງຫາ 2019 ນີ້, ທາງບໍລິສັດ ເອເຊຍກະເສດອິນຊີ ຈຳກັດ ໄດ້ມອບທຶນ ຈຳນວນ 1.000.000.000 ກີບ (ໜຶ່ງຕື້ກີບ) ໃຫ້ເມືອງຫົງສາ #ແຂວງໄຊຍະບູລີ ເພື່ອຊ່ວຍການພັດທະນາເສດຖະກິດ-ສັງຄົມຂອງເມືອງ. ເຊິ່ງພິທີດັ່ງກ່າວ ໄດ້ຈັດຂຶ້ນຢູ່ທີ່ຫ້ອງວ່າການປົກຄອງເມືອງ. ກ່າວມອບໂດຍທ່ານ ໄຊປະເສີດ ຕັ້ງຊະນະ ປະທານ #ບໍລິສັດເອເຊຍກະເສດອິນຊີ ຈຳກັດ ພ້ອມດ້ວຍທີມງານ ແລະ ກ່າວຮັບໂດຍທ່ານ ຄຳຫຼ້າ ຜິວວັນນາ ວ່າການເລຂາພັກເມືອງ ວ່າການເຈົ້າເມືອງຫົງສາ ເຂົ້າຮ່ວມເປັນສັກຂີພິຍານ, ມີກຳມະການປະຈຳພັກເມືອງ, ຫົວໜ້າຫ້ອງການ, ຫົວໜ້າກອງບັນຊາການ ປກສ-ປກຊ ແລະ ນາຍບ້ານເທດສະບານເມືອງເຂົ້າຮ່ວມ.
ໃນໂອກາດນີ້, ຜູ້ເຂົ້າຮ່ວມ ໄດ້ຮັບຟັງການຜ່ານປະຫວັດຄວາມເປັນມາຂອງບໍລິສັດດັ່ງກ່າວ. ເຊິ່ງບໍລິສັດ ເອເຊຍກະເສດອິນຊີ ຈຳກັດ ເປັນໂຮງງານປຸ໋ຍອິນຊີ-ຊີວະພາບ ຊຶ່ງເປັນຜູ້ຜະລິດ ແລະ ຈຳໜ່າຍປຸ໋ຍອິນຊີ-ຊີວະພາບ ອອກສູ່ທ້ອງຕະຫຼາດ ໃນ ສ ປປ ລາວ, ປຸ໋ຍດັ່ງກ່າວ, ແມ່ນໄດ້ຮັບການຢັ້ງຢືນ ມາດຕະຖານ ກະສິກຳອິນຊີລາວ ຈາກກົມປູກຝັງ ກະຊວງກະສິກຳ ແລະ ປ່າໄມ້. ເຊິ່ງບໍລິສັດດັ່ງກ່າວ ໄດ້ຮັບການສຳປະທານທີ່ດິນປູກຝັງ ຢູ່ເມືອງຫົງສາ ໃນເນື້ອທີ່ 700 ເຮັກຕາ ເພື່ອປູກພືດລະດູແລ້ງ-ໄມ້ໃຫ້ໝາກ ໂດຍຈະນຳໃຊ້ແຮງງານຈາກທ້ອງຖິ່ນ ຫຼື ປະຊາຊົນ ເມືອງຫົງສາຈຳນວນໜຶ່ງ ທີ່ທຳການຜະລິດ. ໃນການລົງທຶນ ທັງໝົດ 50.000.000.000 ກີບ (ຫ້າສິບຕື້ກີບ).
ທັງນີ້, ເພື່ອເປັນການເສີມຂະຫຍາຍ ແລະ ພັດທະນາພື້ນຖານໂຄ່ງລ່າງ ລວມໄປເຖິງການເກັບລາຍຮັບ ພັນທະຕ່າງໆ ເຂົ້າລັດແລ້ວ ຍັງເປັນການສ້າງເສດຖະກິດການປູກພືດກະສິກຳໃຫ້ກາຍເປັນສິນຄ້າ ເພື່ອຈຳໜ່າຍຢູ່ພາຍໃນ ແລະ ສົ່ງອອກຈຳໜ່າຍຕ່າງປະເທດ. ໃນນີ້, ຍັງເປັນການສ້າງອາຊີບ-ສ້າງວຽກເຮັດງານທຳໃຫ້ແກ່ປະຊາຊົນລາວ ເວົ້າສະເພາະ ກໍ່ແມ່ນຊາວກະສິກອນຢູ່ເມືອງຫົງສາ ໃຫ້ໄດ້ມີລາຍຮັບເພີ່ມ.