ຕ້ອງຍອມຮັບໃນຄວາມເກັ່ງຂອງແພດລາວເຮົາທີ່ສາມາດປິ່ນປົວຜູ້ຕິດເຊື້ອ Covid -19 ໄດ້ອອກໂຮງໝໍແລ້ວ 8 ຄົນ ແລະ ຍັງ 11 ຄົນ ຈະໄດ້ສືບຕໍ່ຕິດຕາມປິ່ນປົວຢ່າງໃກ້ຊິດ.

          ນັບແຕ່ເດືອນມັງກອນ ຮອດວັນທີ 27 ເມສາ 2020 ໄດ້ເກັບຕົວຢ່າງມາກວດທັງໝົດ 1.917 ຕົວຢ່າງ; ກວດພົບເຊື້ອສະສົມ 19 ຄົນ ແລະ 17 ມື້ແລ້ວທີ່ບໍ່ມີຜູ້ຕິດເຊື້ອເພິ່ມ.

          ໃນເວລາປະເທດເຮົາເຝົ້າລະວັງການແຜ່ລະບາດຂອງ Covid -19 ນັ້ນ; ຫຼາຍຄົນໃນສັງຄົມມີຄວາມເປັນຫ່ວງໃນຫຼາຍດ້ານ ເປັນຕົ້ນແມ່ນ ປະສົບປະການ ແລະ ສີມືໃນການຮັບມືກັບພະຍາດ Covid -19.

          ໃນຂະນະດຽວກັນນັ້ນ ກໍ່ມີຂ່າວລື, ຂ່າວປັ່ນປ່ວນຫຼາຍຂ່າວ…ເຈັບແສບທີ່ສຸດແມ່ນ ນັກຂ່າວໂທລະພາບຊ່ອງໜຶ່ງຂອງປະເທດໄທອອກມາຈີກປາກຮ້ອງວ່າ: ລະບົບສາທາສະນະສຸກຂອງລາວບໍ່ທັນສະໄໝ ບໍ່ມີຄວາມສາມາດກວດພົບພະຍາດ Covid -19 ຍັງບໍ່ເວົ້າເຖິງການປິ່ນປົ່ວ.

          ສຸດທ້າຍແພດລາວພວກເຮົາກໍ່ສາມາດເຮັດໄດ້ຢ່າງສຳເລັດຜົນໃນເບື້ອງຕົ້ນ ເຊິ່ງໃນນັ້ນກໍມີການປະກອບສ່ວນຊ່ວຍເຫຼືອຈາກເພື່ອນມິດສາກົນ ແລະ ເພື່ອນມິດຍຸດທະສາດ ເປັນຕົ້ນ ແມ່ນອົງການອະນາໄມໂລກ; ແພດຜູ້ຊ່ຽວຊານຈາກ ສປ ຈີນ; ແພດຜູ້ຊ່ຽວຊານຈາກ ສສ. ຫວຽດນາມ.

          ແຕ່ທັງນັ້ນ ທັງນີ້ກໍ່ຕ້ອງຍົກໂປ້ໃຫ້ແພດໝໍລາວເຮົາທີ່ສາມາດຮັບມືໄດ້ເປັນຢ່າງດີໃນທີ່ຜ່ານມາບໍ່ມີຜູ້ຕິດເຊື້ອເສຍຊີວິດ ເຊິ່ງເປັນເລື່ອງຍາກທີ່ປະເທດຕ່າງໆເຮັດໄດ້ໜ້ອຍທີ່ສຸດ…ຊົມເຊີຍແພດລາວ; ແພດປະຕິວັດ…

ໂດຍ: ທິດດີ.