ຖອດບົດຮຽນຈາກການຈັດຕັ້ງປະຕິບັດຄຳສັ່ງ ເລກທີ 06/ນຍ ຍ້ອນອ່ານບໍ່ລະອຽດ; ບໍ່ເຂົ້າໃຈເລິກ ເວລາຈັດຕັ້ງປະຕິບັດຈຶ່ງເກີດປະກົດການຫຍໍ້ທໍ້ ໂດຍສະເພາະແມ່ນ ແຈ້ງການເລື່ອງເກັບຄ່າທຳນຽມ ເຂົ້າ-ອອກຂອງປະຊາຊົນໃນບ້ານ; ການແຈ້ງການເກັບເງິນເປັນກອງທຶນ; ແຈ້ງການປັບໃໝຜູ້ລະເມີດຄຳສັ່ງ…ເຫຼົ່ານີ້ເປັນຕົ້ນ.

ສະນັ້ນ, ໃນການຈັດຕັ້ງປະຕິບັດມາດຕະການຜ່ອນຜັນຂອງຄະນະສະເພາະກິດ ນັບແຕ່ວັນທີ 4 ຫາ ວັນທີ 17 ພຶດສະພາ 2020 ກໍ່ຄືແຈ້ງການ ເລກທີ 524/ຫສນຍ ລົງວັນທີ 01 ພຶດສະພາ 2020 ນັ້ນ ຕ້ອງໄດ້ຟັງໃຫ້ແຈ້ງ; ອ່ານໃຫ້ເຂົ້າໃຈ ເວລາປະຕິບັດຈຶ່ງຖືກຕ້ອງຄົບຖ້ວນຕາມເນື້ອໃນຈິດໃຈຂອງແຈ້ງການດັ່ງກ່າວ.

ແຈ້ງການສະບັບດັ່ງກ່າວ ພໍສະຫຼຸບໃຈຄວາມສຳຄັນໄດ້ດັ່ງນີ້: ພັກ-ລັດ ແລະ ປະຊາຊົນບັນດາເຜົ່າໃນທົ່ວປະເທດຕ້ອງສືບຕໍ່ຍົກສູງຄວາມຮັບຜິດຊອບໃນການຕິດຕາມການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດ ໂຄວິດ -19 ດ້ວຍຄວາມເປັນເຈົ້າການ ແລະ ໃຫ້ຖືເອົາທິດທາງການຊີ້ນຳໃນການແກ້ໄຂວຽກງານນີ້ເປັນວຽກສຳຄັນ ແລະ ເປັນບູລິມະສິດກ່ອນໝູ່ໃນໄລຍະນີ້, ປຽບເໝືອນການຊີ້ນຳ-ນຳພາໃນພາວະສົງຄາມ, ພ້ອມນີ້ ຍັງສືບຕໍ່ປະຕິບັດຢ່າງເຂັ້ມງວດບັນດາມາດຕະການປ້ອງກັນການຕິດເຊື້ອ ເປັນຕົ້ນແມ່ນ: ການຮັກສາໄລຍະຫ່າງ 1 ແມັດຂຶ້ນໄປ, ລ້າງມືໃສ່ສະບູ ແລະ ນ້ຳສະອາດ ຫຼື ເຈວລ້າງມື, ໃສ່ຜ້າອັດປາກ-ດັງ, ວັດແທກອຸນຫະພູມ ແລະ ອະນາໄມສະຖານທີ່ຕາມຄຳແນະນຳຂອງຄະນະສະເພາະກິດວາງອອກ.

ກ່ຽວກັບມາດຕະການຜ່ອນຜັນທີ່ໃຫ້ຊຸມຊົນໄດ້ກັບມາໃຊ້ຊີວິດຕາມປົກກະຕິເທື່ອລະກ້າວ ແຕ່ຕ້ອງປະຕິບັດຕາມມາດຕະການປ້ອງກັນການຕິດເຊື້ອທີ່ລະບຸໄວ້ຂ້າງເທິງຢ່າງເຂັ້ມງວດ ການອະນຸຍາດມີຄື:

  • ອະນຸຍາດໃຫ້ສຳນັກງານອົງການຂອງ ພັກ-ລັດ, ສຳນັກງານຂອງບໍລິສັດເປີດດຳເນີນການໄດ້ໂດຍໃຫ້ພະນັກງານ, ລັດຖະກອນ ໝູນວຽນກັນມາເຮັດວຽກເປັນປົກກະຕິ.
  • ອະນຸຍາດໃຫ້ປະຊາຊົນ, ພະນັກງານ, ລັດຖະກອນ, ທະຫານ, ຕຳຫຼວດ, ຜູ້ປະກອນການ, ຊາວຕ່າງດ້າວ ແລະ ຊາວຕ່າງປະເທດທີ່ອາໄສຢູ່ ສປປ ລາວ ສາມາດອອກຈາກເຮືອນ ແລະ ເດິນທາງພາຍໃນນະຄອນຫຼວງວຽງຈັນ ແລະ ແຂວງໄດ້ຕາມຄວາມຈຳເປັນ.
  • ອະນຸຍາດໃຫ້ມີການຝຶກອົບຮົມ ແລະ ການປະຊຸມເປັນທາງການພາຍໃນນະຄອນຫຼວງວຽງຈັນ ແລະ ພາຍໃນແຂວງ.
  • ອະນຸຍາດໃຫ້ອອກກຳລັງກາຍ ຫຼື ຫຼີ້ນກິລາກາງແຈ້ງ ທີ່ບໍ່ເປັນທີມໃກ້ຊິດກັນ ເຊັ່ນ: ອອກກຳລັງກາຍ(ຍ່າງ-ແລ່ນ), ຂີ່ລົດຖີບ, ເຕັ້ນອາໂຣບິກ, ຕີກ໊ອບ.
  • ອະນຸຍາດໃຫ້ຫ້າງຮ້ານຕ່າງໆ ເຊັ່ນ: ຮ້ານອາຫານ, ຮ້ານຂາຍຂອງກິນສຸກ, ຮ້ານຂາຍເຄື່ອງຍ່ອຍ, ຮ້ານຕັດຜົມ, ຮ້ານເສີມສວຍ, ຕະຫຼາດສົດ, ສູນການຄ້າ, ຮ້ານຄ້າຂາຍຍົກ, ຂາຍຍ່ອຍ, ຮ້ານຊຸບເປີມາເກັດ, ຮ້ານກາເຟ, ຮ້ານສ້ອມແປງລົດ, ຮ້ານລ້າງ-ອັດສີດ, ໂຮງງານນ້ຳດື່ມ, ໂຮງງານນ້ຳກ້ອນ ດຳເນີນກິດຈະການໄດ້.
  • ບັນດາໂຮງງານ, ໂຄງການລົງທຶນ ທີ່ເປັນກິດຈະການຂະໜາດໃຫຍ່ຂອງພາກທຸລະກິດຕ່າງໆທີ່ສາມາດປະຕິບັດຖືກຕ້ອງຕາມເງື່ອນໄຂ-ມາດຕະການຕາມຄຳແນະນຳ ເລກທີ 031/ສພກ ແມ່ນສາມາດເປີດດຳເນີນກິດຈະການໄດ້.
  • ກະຊວງສຶກສາທິການ ແລະ ກິລາ, ກະຊວງປ້ອງປະເທດ ແລະ ກະຊວງປ້ອງກັນຄວາມສະຫງົບ ກະກຽມເປີດໂຮງຮຽນຄືນ ໃນຊັ້ນປະຖົມສຶກສາ ປີທີ 5, ມັດທະຍົມສຶກສາ ປີທີ 4 ແລະ ປີທີ 7 ແລະ ໂຮງຮຽນໃນຂົງເຂດປ້ອງກັນຊາດ ແລະ ປ້ອງກັນຄວາມສະຫງົບ ເລີ່ມແຕ່ວັນທີ 18 ພຶດສະພາ 2020 ເປັນຕົ້ນໄປ.
  • ອະນຸຍາດໃຫ້ຊາວຕ່າງປະເທດ ທີ່ໄດ້ມາເຮັດວຽກ, ອອກແຮງງານ ແລະ ສຶກສາຢູ່ ສປປ ລາວ ກັບຄືນປະເທດຕາມຈຸດປະສົງ. ສຳລັບນັກສຶກສາລາວ ແລະ ແຮງງານລາວ ທີ່ຕ້ອງການກັບຄືນໄປຮຽນຕໍ່ ຫຼື ອອກແຮງງານຢູ່ຕ່າງປະເທດ ແມ່ນສາມາດເດີນທາງໄປໄດ້ຕາມລະບຽບການຂອງປະເທດເຈົ້າພາບ.

ມາດຕະການທີ່ລະບຸໃນນີ້ ແມ່ນຈຳເປັນຕ້ອງປະຕິບັດ ສ່ວນກ່ຽວກັບການດຳເນີນການເລື່ອງອື່ນທີ່ບໍ່ຢູ່ໃນແຈ້ງການສະບັບນີ້ ແມ່ນສືບຕໍ່ປະຕິບັດຄືດັ່ງໃນໄລຍະທີ່ຜ່ານມາ. ໃນມາດຕະການຜ່ອນຜັນເຫຼົ່ານີ້ ຍັງລະບຸວ່າ ເປັນການປະຕິບັດຊົ່ວຄາວໃນລະຫວ່າງ ວັນທີ 4-17 ພຶດສະພາ 2020 ເທົ່ານັ້ນ.

ດັ່ງນັ້ນ ຈຶ່ງຂໍຮຽກຮ້ອງໃຫ້ຜູ້ກ່ຽວຂ້ອງ ເປັນຕົ້ນ: ເຈົ້າໜ້າທີ່ຈັດຕັ້ງປະຕິບັດ ກໍ່ຄືຄົນທົ່ວໄປທີ່ຖືກປະຕິບັດຕ້ອງໄດ້ສຶກສາຂໍ້ມູນໃຫ້ລະອຽດຈຶ່ງບໍ່ເກີດຄວາມຜິດພາດ ກາຍເປັນປະກົດການຫຍໍ້ທໍ້…

ໂດຍ: ທິດດີ