ປະຈໍາວັນທີ 15 ພຶດສະພາ ປີ 2020

ທ່ານ ຮສ ດຣ. ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ ຜູ້ປະຈໍາການ ຄະນະສະເພາະກິດ ຖະແຫຼງຂ່າວໃຫ້ຊາບວ່າ:

  • ສະພາບການເຝົ້າລະວັງ COVID-19 ຢູ່ ສປປ ລາວ ຮອດ 5 ໂມງແລງ ຂອງວັນທີ 14 ພຶດສະພາ 2020
  • ວຽກງານຈຸດຜ່ານດ່ານ
  • ຈໍານວນຜູ້ເດີນທາງເຂົ້າມາ ມີທັງໝົດ 2,335ຄົນ
  • ຈຸດຜ່ານດ່ານລາວ-ໄທ ທັງໝົດ 1,362 ຄົນ, ໃນນັ້ນ ມີແຮງງານລາວກັບມາຈາກປະເທດໄທ ຜ່ານດ່ານຊ່ອງເມັກ ແຂວງຈຳປາສັກ 21 ຄົນ, ເຫຼືອນັ້ນ ແມ່ນຜູ້ຂັບລົດຂົນສົ່ງສິນຄ້າ.
  • ຈຸດຜ່ານດ່ານລາວ-ຈີນ ທັງໝົດ 23 ຄົນ,ໃນນີ້ມີພະນັກງານຈີນ 6 ຄົນ ມາເຮັດວຽກຊົ່ວຄາວ ຢູ່ບໍລິສັດ  DMC, ທີ່ເຫຼືອແມ່ນຜູ້ຂັບລົດຂົນສົ່ງສິນຄ້າ.
  • ຈຸດຜ່ານດ່ານລາວ-ຫວຽດ ທັງໝົດ 911 ຄົນ, ໃນນັ້ນມີ 11 ຄົນເປັນພະນັກງານສະພາແຫ່ງຊາດທີ່ໄປອົບຮົມຢູ່ຫວຽດນາມກັບຄືນມາເຫຼືອນັ້ນແມ່ນຄົນຂັບລົດຂົນສົ່ງສິນຄ້າ
  • ຈຳນວນຜູ້ເດີນທາງຜ່ານສະໜາມບິນສາກົນວັດໄຕ 39 ຄົນ ເຊີ່ງເປັນການນຳ ສສ ຫວຽດນາມ ທີ່ເຂົ້າມາຮ່ວມໄຫວ້ອາໄລງານປະນາກິດສົບການນຳຂັ້ນສູງຂອງ ສປປ ລາວ ແລະ ທັງໝົດໄດ້ກັບແລ້ວ.
  • ໃນທຸກດ່ານ ແມ່ນໄດ້ກວດວັດອຸນຫະພູມຮ່າງກາຍ ແລະ ບໍ່ມີຄົນເປັນໄຂ້.
  • ສຳລັບແຮງງານລາວ ຈຳນວນ 21 ຄົນ ທີ່ຜ່ານດ່ານຊ່ອງເມັກ ແຂວງຈຳປາສັກ ແມ່ນມີຖິ່ນຖານມາຈາກ ແຂວງຈຳປາສັກ 16 ຄົນ, ແຂວງສະຫວັນນະເຂດ 4 ຄົນ ແລະ ສາລະວັນ 1 ຄົນ.  
  • ແຮງງານທັງໝົດໄດ້ເກັບຕົວຢ່າງມາກວດ ແລະ ນຳສົ່ງໄປຈຳກັດບໍລິເວນຢູ່ສູນຂອງແຂວງ ຈົນກ່ວາຈະຄົບກຳນົດ 14 ວັນ.
  • ການເຝົ້າລະວັງ ແລະ ວິເຄາະ
  • ໃນວັນທີ 14 ພຶດສະພາ 2020, ໄດ້ເກັບຕົວຢ່າງມາກວດທັງໝົດ 112 ຄົນ, ໃນນັ້ນ ມີກໍລະນີສົງໄສ 20 ຄົນ ເກັບຕົວຢ່າງມາກວດຫາເຊື້ອຄືນຂອງຜູ້ຕິດເຊື້ອທີ່ນອນປິ່ນປົວຢູ່ໂຮງໝໍມິດຕະພາບ 05 ຄົນ (ນ້ຳເບີ 07, 10, 16, 17 ແລະ 18) ແລະ ທີ່ປິ່ນປົວຫາຍດີອອກໂຮງໝໍ ແລ້ວມີອາການໄຂ້ 01 ຄົນ ແລະ ແຮງງານລາວທີ່ກັບມາຈາກປະເທດໄທ 86 ຄົນ, ລາຍລະອຽດຂອງແຮງງານດັ່ງກ່າວແມ່ນ:
  • ສະຫວັນນະເຂດ 20 ຄົນ
  • ຈຳປາສັກ 14 ຄົນ
  • ຄຳມ່ວນ 12 ຄົນ
  • ອຸດົມໄຊ  10 ຄົນ
  • ນະຄອນຫຼວງວຽງຈັນ 08 ຄົນ
  • ໄຊຍະບູລີ    07 ຄົນ
  • ຫຼວງພະບາງ  04 ຄົນ
  • ແຂວງວຽງຈັນ 04 ຄົນ
  • ຫຼວງນ້ຳທາ   03 ຄົນ
  • ບໍລິຄຳໄຊ    02 ຄົນ
  • ສາລະວັນ         02 ຄົນ
  • ຜົນກວດທັງໝົດຂອງມື້ວານນີ້ ບໍ່ພົບເຊື້ອ.
  • ໝາຍຄວາມວ່າໃນວັນທີ 14 ພຶດສະພາ 2020 ບໍ່ມີຜູ້ຕິດເຊື້ອໃໝ່.
  • ສັງລວມການກວດວິເຄາະ ແຕ່ເດືອນມັງກອນ ຮອດ ວັນທີ 14 ພຶດສະພາ2020 ໄດ້ເກັບຕົວຢ່າງມາກວດທັງໝົດ ມີ 4,204 ຕົວຢ່າງ, ກວດພົບເຊື້ອສະສົມ 19 ຄົນ (33 ມື້ແລ້ວທີ່ບໍ່ພົບຜູ້ຕິດເຊື້ອໃໝ່).
  • ການຕິດຕາມຜູ້ເດີນທາງມາຈາກຕ່າງປະເທດໂດຍສະເພາະແຮງງານລາວ ຢູ່ສະຖານທີ່ຈຳກັດບໍລິເວນຕ່າງໆຂອງແຂວງ
  • ປະຈຸບັນນີ້ທົ່ວປະເທດ ມີສູນຈໍາກັດບໍລິເວນ ທັງໝົດ 66  ສູນ, ມີຜູ້ຈຳກັດບໍລິເວນຢູ່ສູນ 2,236 ຄົນ, ໄດ້ເກັບຕົວຢ່າງມາກວດວິເຄາະ ທັງໝົດ ແລະ ບໍ່ມີຜູ້ຕິດເຊື້ອ.
  • ການຕິດຕາມປີ່ນປົວຄົນເຈັບຢູ່ໂຮງໝໍ
  • ປັດຈຸບັນ, ມີຜູ້ນອນຕິດຕາມຢູ່ໂຮງໝໍມິດຕະພາບ 5 ຄົນ ຍີງ 04 ຄົນ ທັງໝົດເຫັນວ່າມີອາການປົກກະຕິ.
  • ການຕິດຕາມສະພາບການລະບາດຂອງປະເທດໃກ້ຄຽງ ແລະ ການລະບາດຢູ່ໃນໂລກ ເຫັນວ່າ:
  • ມາຮອດເວລາ 6:00 ໂມງເຊົ້າ ຂອງວັນທີ 15 ພຶດສະພາ 2020, ທົ່ວໂລກມີການລາຍງານການລະບາດ ທັງໝົດ 213 (ປະເທດ/ເຂດ)

–  ມີການຢັ້ງຢືນ ຜູ້ຕິດເຊື້ອພະຍາດ COVID-19 ແມ່ນ 4,518,574 (92,918 ໃໝ່)

–  ເສຍຊິວິດ 302,949 (5,184ໃໝ່) ກວມເອົາ 6,70 % ຂອງຜູ້ຕິດເຊື້ອທັງໝົດ;

–  ປີ່ນປົວຫາຍດີ 1,699,354 (44,535 ໃໝ່)  ກວມເອົາ 37,60 % ຂອງຜູ້ຕິດເຊື້ອທັງ

   ໝົດ;

–  ບັນຫາສຳຄັນ ແມ່ນມີບາງປະເທດ ຈຳນວນຜູ້ຕິດເຊື້ອມື້ດຽວ ມີເຖິງ 24,100ຄົນ ແລະ      

   ເສຍຊີວິດ 1,607ຄົນຕໍ່ມື້;

– ອັດຕາຄວາມຮ້າຍແຮງຂອງມື້ນີ້ແມ່ນ 6.70 % (ມື້ວານນີ້ 6.72 %).

  • ສະເພາະກຸ່ມປະເທດອາຊຽນກໍ່ເຫັນວ່າ ຍັງມີບາງປະເທດທີ່ມີອັດຕາການຕິດເຊື້ອໃໝ່ປະ

ຈຳວັນທີ 14 ພຶດສະພາ 2020 ສູງເຖິງ 752 ຄົນ, ໃນມື້ດຽວນີ້ຢູ່ກຸ່ມປະເທດອາຊຽນມີຜູ້ເສຍຊີວິດ 34 ຄົນ

ຂໍ້ມູນສໍາຄັນໃນມື້ນີ້ ແມ່ນການລາຍງານ ຂອງລະບົບເຝົ້າລະວັງພະຍາດ ຈາກທົ່ວປະເທດມາຫາສູນປະຕິບັດງານສຸກເສີນ ຂອງກະຊວງສາທາລະນະສຸກ ຢັ້ງຢືນວ່າ ສປປ ລາວ ບໍ່ພົບຜູ້ຕິດເຊື້ອໃໝ່ 33 ມື້ແລ້ວ (ເລິ່ມແຕ່ວັນທີ 12 ເມສາ 2020 ເປັນຕົ້ນມາ). ໄດ້ເກັບຕົວຢ່າງມາກວດທັງໝົດ ມີ 4,204 ຕົວຢ່າງ, ມີຈໍານວນຜູ້ຕິດເຊື້ອສະສົມ ທັງໝົດ 19 ຄົນ, ຍັງນອນຕິດຕາມຢູ່ໂຮງໝໍ 05 ຄົນ.

ການຈັດຕັ້ງປະຕິບັດແຈ້ງການ 524/ຫສນຍ ກ່ຽວກັບການຜ່ອນຜັນບາງມາດຕະການ ຮອດວັນທີ 17 ພຶດສະພາ ນີ້ກໍ່ຍັງພຽງແຕ່ 2-3 ວັນ ແຕ່ຍັງມີຄວາມຈຳເປັນທີ່ຈະຕ້ອງໄດ້ເອົາໃຈໃສ່ ວິທີປ້ອງກັນການຕິດເຊື້ອ ແລະ ວິທີປ້ອງກັນການແຜ່ເຊື້ອພະຍາດ ເພື່ອສະກັດກັ້ນບໍ່ໃຫ້ມີກໍລະນີໃໝ່ເກີດຂຶ້ນ. ປັດໄຈສໍາຄັນທີ່ສຸດ ແມ່ນຂຶ້ນກັບຄວາມຮັບຜິດຊອບຂອງທຸກພາກສ່ວນທີ່ເປີດການບໍລິການຄືນໃໝ່ ວ່າຈະປະຕິບັດມາດຕະການໄດ້ຖືກຕ້ອງ ເຂັ້ມງວດສ່ຳໃດ ແລະ ຂື້ນກັບພຶດຕິກໍາຂອງພວກເຮົາໝົດທຸກຄົນທີ່ຈະປັບປຸງວິຖີຊີວິດໃໝ່ຂອງຕົນ ຕາມຄຳແນະນຳຂອງຄະນະສະເພາະກິດ.

ພັກ ແລະ ລັດຖະບານໄດ້ມີຄວາມເປັນຫ່ວງເປັນໃຍ, ໄດ້ຕິດຕາມ ແລະ ໃຫ້ການຊີ້ນຳຢ່າງໃກ້ຊິດ. ເຊົ້າມື້ນີ້ກໍໄດ້ມີກອງປະຊຸມຂອງລັດຖະບານ ພາຍໃຕ້ການເປັນປະທານຂອງທ່ານ ນາຍົກລັດຖະມົນຕີ, ໄດ້ຮັບຟັງການລາຍງານປະເມີນຜົນສະພາບການລະບາດຂອງ ພະຍາດ ໂຄວິດ-19 ຢູ່ປະເທດເຮົາ, ປະເທດໃກ້ຄຽງ ແລະ ໃນໂລກ. ກອງປະຊຸມກໍ່ໄດ້ມີທິດຊີ້ນຳທີ່ຈະຜ່ອນຜັນຕື່ມອີກບາງມາດຕະການ ເພື່ອໃຫ້ມີຜົນກະທົບຕໍ່ເສດຖະກິດ-ສັງຄົມ ໜ້ອຍທີ່ສຸດ, ສ້າງເງື່ອນໄຂໃຫ້ພໍ່ແມ່ປະຊາຊົນ ໄດ້ກັບມາໃຊ້ຊີວິດຕາມປົກກະຕິເທື່ອລະກ້າວ, ລາຍລະອຽດຂໍໃຫ້ບັນດາທ່ານຕີດຕາມແຈ້ງການສະບັບໃໝ່ຂອງຫ້ອງວ່າການສຳນັກງານນາຍົກລັດຖະມົນຕີທີ່ຈະອອກໃນໄວໆນີ້.

ສະນັ້ນ, ຈຶ່ງຮຽກຮ້ອງໃຫ້ທຸກພາກສ່ວນໃນສັງຄົມ, ຊຸມຊົນ, ຄອບຄົວ ແລະ ສ່ວນບຸກຄົນ ມີຄວາມອົດທົນພະຍາຍາມ ເອົາໃຈໃສ່ຮ່ວມແຮງຮ່ວມໃຈກັນ ສືບຕໍ່ຈັດຕັ້ງປະຕິບັດຄຳແນະນຳ ແລະ ມາດຕະການຕ່າງໆ ໃຫ້ຖືກຕ້ອງ ແລະ ເຂັ້ມງວດ. ໂດຍສະເພາະ ການລ້າງມືດ້ວຍນໍ້າສະອາດ ແລະ ສະບູ ຫຼື ໃຊ້ເຈວລ້າງມື, ການປະຕິບັດໄລຍະຫ່າງທາງສັງຄົມ, ການໃສ່ຜ້າປິດປາກ-ດັງ ເວລາອອກຈາກບ້ານ ຫຼື ໄປສະຖານທີ່ບໍລິການຕ່າງໆ ໃຫ້ກາຍເປັນຄວາມຊີ່ນເຄີຍໃນການດຳລົງຊີວິດປະຈຳວັນ.