ມື້ກ່ອນໃນໜ້າອອນລາຍພວກເຮົາລົງພິມບົດໃນຫົວຂໍ້: ..“ວົງການແພດລາວກ້າວສູ່ລະດັບໂລກ..” ສະແດງຄວາມຊື່ນຊົມຍິນດີທີ່ປະເທດເຮົາບໍ່ມີຜູ້ຕິດເຊື້ອພະຍາດ Covid-19 ຕິດຕໍ່ກັນເກືອບສອງເດືອນ ແລະ ຜູ້ຕິດເຊື້ອ 19 ຄົນກໍ່ໄດ້ຮັບການປີ່ນປົວອອກໂຮງໝໍໝົດແລ້ວ.

ແລະແລ້ວໃນວັນທີ 10 ມິຖຸນາ ຜ່ານມາ; ທ່ານ ນາຍົກລັດຖະມົນຕີ ທອງລຸນ ສີສຸລິດ ກໍ່ມີຄຳຖະແຫຼງຢ່າງເປັນທາງການວ່າ: ມາຮອດວັນທີ 10 ມິຖຸນາ ຜູ້ຕິດເຊື້ອພະຍາດ Covid-19 ຢູ່ປະເທດເຮົາໄດ້ກາຍເປັນເລກ 0 ແລ້ວ.

ໃນຄຳຖະແຫຼງທ່ານໄດ້ກ່າວເຖີງສາຍເຫດທີ່ປະເທດເຮົາປອດຈາກ Covid-19 ແລະ ຕີລາຄາເບື້ອງຕົ້ນຂອງຜົນສຳເລັດຄັ້ງນີ້.

ຜູ້ຂຽນຂໍອະນຸຍາດນຳເອົາຈຸດສຳຄັນໃນຄຳຖະແຫຼງດັ່ງກ່າວມານຳສະເໜີດັ່ງນີ້:

        “…ເຖີງວ່າ ພວກເຮົາໄດ້ມີຜົນສຳເລັດໃນການປ້ອງກັນ, ຄວບຄຸມ ແລະ ແກ້ໄຂພະຍາດ Covid-19 ດັ່ງກ່າວມານັ້ນແລ້ວກໍ່ຕາມ, ແຕ່ກໍ່ໃຫ້ຖືວ່າເປັນໄຊຊະນະ ແລະ ຜົນສຳເລັດເບື້ອງຕົ້ນ ໃນບັ້ນຮົບທີໜຶ່ງເທົ່ານັ້ນ. ປະຈຸບັນ ແລະ ຕໍ່ໜ້າພວກເຮົາກໍ່ຍັງຢູ່ໃນສະພາບການທີ່ທ້າທາຍ ແລະ ຫຼໍ່ແຫຼມຫຼາຍດ້ານ ທີ່ບໍ່ອາດຈະປະໝາດ, ລະເຫຼີງ ແລະ ເຜີຕົວໄດ້ເປັນອັນຂາດ ພວກເຮົາຕ້ອງພ້ອມກັນມີສະຕິລະວັງຕົວໃຫ້ສູງກ່ວາເກົ່າ, ສືບຕໍ່ປະຕິບັດຄຳສັ່ງ, ຄຳແນະນຳ, ແຈ້ງການທີ່ອອກມາແລ້ວໃຫ້ເຂັ້ມງວດ. ລັດຖະບານຈະຕິດຕາມ, ປະເມີນສະຖານະການທຸກໆໄລຍະ ເພື່ອຈະມີການປັບປຸງ ປ່ຽນແປງໄປຕາມສະພາບການຢ່າງສົມເຫດສົມຜົນ ເພື່ອສ້າງໂອກາດໃຫ້ປະຊາຊົນ ແລະ ຜູ້ປະກອບການໄດ້ດຳລົງຊີວິດ ທຳມາຫາກິນ ແລະ ດຳເນີນກິດຈະການຢ່າງເປັນປົກກະຕິໄວເທົ່າທີ່ຈະໄວໄດ້. ແຕ່ພວກເຮົາຕ້ອງໄດ້ຕັດສິນໃຈປ້ອງກັນ, ຄວບຄຸມດ້ວຍທຸກກຳລັງແຮງ ແລະ ດ້ວຍມາດຕະການທີ່ ເໝາະສົມເພື່ອບໍ່ໃຫ້ພະຍາດ Covid-19   ກັບຄືນມາລະບາດອີກຮອບທີ 2 ຫຼື ຮອບຕໍ່ໆໄປໄດ້. ເວລາດຽວກັນນີ້ ພະຍາດຕາມລະດູການກໍ່ລະບາດ ເປັນຕົ້ນແມ່ນໄຂ້ເລືອດອອກ ກໍ່ເປັນວຽກສຳຄັນໜຶ່ງ ທີ່ຕ້ອງໄດ້ຊ່ວຍກັນປ້ອງກັນ ແລະ ແກ້ໄຂ.

        ໃນໂອກາດນີ້ ຂ້າພະເຈົ້າຂໍຮຽກຮ້ອງມາຍັງພໍ່ແມ່ພີ່ນ້ອງ, ປະຊາຊົນລາວທຸກຖ້ວນໜ້າ ໃນທົ່ວປະເທດ ຈົ່ງສືບຕໍ່ຕິດຕາມສະພາບການຢ່າງໃກ້ຊິດ, ມີສະຕິລະວັງຕົວສູງ ປະຕິບັດຖືກຕ້ອງຕາມຂໍ້ກຳນົດ, ຂໍ້ແນະນຳທີ່ທາງການວາງອອກ ແລະ ຈະວາງອອກໃນແຕ່ລະໄລຍະຢ່າງເຄັ່ງຄັດຕໍ່ໄປ, ຢ່າລະເຫຼີງ ທັງໃຫ້ເອົາໂອກາດນີ້ໃຫ້ແຕ່ລະຄົນ, ແຕ່ລະຄອບຄົວ, ແຕ່ລະການຈັດຕັ້ງແຕ່ເທີງລົງລຸ່ມ ຕ້ອງໄດ້ປັບວິຖີຊີວິດ ຫຼື ເວົ້າຢ່າງໜຶ່ງວ່າ ການດຳລົງຊີວິດແບບໃໝ່ (New Normal) ນັ້ນ ທີ່ມີສະຕິລະວັງຕົວກ່ວາ, ກ້າວໜ້າ ທັນສະໄໝ, ສີວິໄລກ່ວາ, ປະຢັດມັດທະຍັດ ແລະ ມີລະບຽບວິໄນ ກ່ວາ… ເພື່ອບໍ່ໃຫ້ພະຍາດ Covid-19   ກັບມາສູ່ສັງຄົມເຮົາເປັນຮອບທີ 2 ອີກ ແລະ ທັງຖືເອົາໂອກາດນີ້ປັບປຸງແກ້ໄຂຈຸດອ່ອນຂໍ້ຄົງຄ້າງໃນການປະຕິບັດໜ້າທີ່ວຽກງານ, ການດຳເນີນທຸລະກິດ, ການດຳລົງຊີວິດທີ່ແນໃສ່ເຮັດໃຫ້ຊີວິດການເປັນຢູ່ຂອງແຕ່ລະຄອບຄົວ, ແຕ່ລະຄົນດີຂື້ນ ເພື່ອເອົາປະເທດຊາດຂອງພວກເຮົາປັບຕົວເຂົ້າກັບສະພາບໃໝ່ຂອງໂລກ, ຂອງພາກພື້ນ ເພື່ອແກ້ໄຂຄວາມຫຍຸ້ງຍາກຕ່າງໆ ໃຫ້ຄ່ອຍໆຕົກໄປ ນຳເອົາປະເທດຊາດຂອງພວກເຮົາກ້າວໄປໜ້າຢ່າງບໍ່ຢຸດຢັ້ງ.

ຂ້າພະເຈົ້າຂໍອວຍພອນໃຫ້ທຸກໆຄົນ ຈົ່ງມີສຸຂະພາບແຂງແຮງ, ມີຄວາມສຸກໃນຊີວິດ ແລະ ມີຜົນສຳເລັດໃນໜ້າທີ່ວຽກງານຂອງຕົນ.

        ອີກເທື່ອໜຶ່ງ ຂ້າພະເຈົ້າຂໍຂອບໃຈມາຍັງຄະນະສະເພາະກິດ ແລະ ພິເສດ ຕົວແທນອົງການອານາໄມໂລກ ທີ່ໄດ້ໃກ້ຊິດຕິດແທດ ໃຫ້ການສະໜັບສະໜູນ, ໃຫ້ການປຶກສາແກ່ພວກເຮົາຕະຫຼອດມາ. ສຳລັບຄະນະສະເພາະກິດນີ້ ຍັງບໍ່ທັນລົບລ້າງ ຈົນກ່ວາມື້ໃດຈະມີຢາວັກຊີນປ້ອງກັນພະຍາດ COVID-19.”  

                                ຢາກໃຫ້ເພື່ອຜູ້ອ່ານເຂົ້າໃຈຕາມນີ້

ໂດຍ: ທິດດີ