ສູນເລືອດແຫ່ງຊາດ ຮ່ວມກັບ ອົງການກາແດງລາວ ໄດ້ຈັດກິດຈະກຳ ບໍລິຈາກເລືອດຊ່ວຍເຫຼືອສັງຄົມ ເນື່ອງໃນໂອກາດສະເຫຼີມສະຫຼອງ ວັນບໍລິຈາກເລືອດໂລກ 14 ມິຖຸນາ ພາຍໃຕ້ຄຳຂວັນ “ເລືອດປອດໄພຊ່ວຍໃຫ້ຄົນເຈັບປອດໄພ, ບໍລິຈາກເລືອດປະກອບສ່ວນເຮັດໃຫ້ສັງຄົມມີສຸຂະພາບທີ່ດີ” ຊຶ່ງມີຜູ້ເຂົ້າຮ່ວມບໍລິຈາກເລືອດ ຫຼາຍກວ່າພັນຄົນ.

ທ່ານ ຈັນທະລາ ສຸກສາ ຄອນ ຫົວໜ້າສູນເລືອດແຫ່ງຊາດ ກ່າວວ່າ: ວັນທີ 14 ມິຖຸນາ ຂອງທຸກໆປີ ເປັນວັນຜູ້ບໍລິຈາກເລືອດໂລກ  ຊຶ່ງຢູ່ປະເທດຕ່າງໆໃນທົ່ວໂລກ ໄດ້ພ້ອມກັນຈັດຕັ້ງສະເຫຼີມສະຫຼອງ ເພື່ອເປັນການສະແດງຄວາມຂອບໃຈຕໍ່ຜູ້ບໍລິຈາກເລືອດ ທີ່ເຂົາເຈົ້າໄດ້ມອບຂອງຂວັນ ທີ່ມີຄ່າທີ່ສຸດຕໍ່ຊີວິດ ນັ້ນຄືການບໍລິຈາກເລືອດດ້ວຍຄວາມສະໝັກໃຈ ເພື່ອຊ່ວຍເຫຼືອຄົນເຈັບ ແລະ ສ້າງຄວາມສຳນຶກ

ໃນເລື່ອງຄວາມຈຳເປັນຂອງການບໍລິຈາກເລືອດປະຈຳ ແລະ ສະໝຳສະເໝີ. ເລືອດ ແລະ ຜະລິດຕະພັນເລືອດ ທີ່ໄດ້ຮັບບໍລິຈາກໃນແຕ່ລະປີ ຢູ່ທົ່ວໂລກສາມາດຊ່ວຍຊີວິດຄົນເຈັບ ໄດ້ຫຼາຍລ້ານຄົນ ສຳລັບ ສປປ ລາວ ສະຖິຕິໃນປີ 2019 ມີຄົນເຈັບທີ່ໃຊ້ເລືອດ ເຂົ້າໃນການປິ່ນປົວ ກວມເອົາ 40.587 ເທື່ອຄົນ. ແມ່ຍິງທີ່ໄດ້ຮັບຜົນກະທົບຈາກການເກີດລູກ, ເດັກນ້ອຍທີ່ເປັນພະຍາດເລືອດຈາງຂັ້ນຮ້າຍແຮງ, ພະຍາດໄຂ້ຍຸງ, ໄຂ້ເລືອດອອກ, ການຂາດສານອາຫານ, ການຜ່າຕັດຊະນິດຕ່າງໆ ການບໍລິຈາກເລືອດສາມາດຊ່ວຍເຫຼືອຄົນເຈັບ ແລະ ກອບກູ້ຊີວິດຄົນໄດ້.

ທ່ານ ຄຳຮຸ່ງ ເຮືອງວົງສີ ປະທານອົງການກາແດງລາວ ໃຫ້ຮູ້ວ່າ: ການບໍລິຈາກເລືອດສາມາດຕອບສະໜອງໃຫ້ແກ່ຄົນເຈັບໄດ້ພຽງພໍ, ປອດໄພ ແລະ ທັນເວລາ ໂດຍມີເປົ້າໝາຍໃຫ້ໄດ້ 60.700 ຖົງໃນປີ 2020 ແລະ ມີການເພີ່ມຂຶ້ນໃນແຕ່ລະປີ ເພື່ອໃຫ້ບັນລຸຄາດໝາຍ ໃຫ້ມີການບໍລິຈາກເລືອດຢ່າງຕໍ່າ 1% ຂອງປະຊາກອນຕໍ່ປີ, ທ່ານ ຍັງຮຽກຮ້ອງ ໃຫ້ປະຊາຊົນລາວບັນດາເຜົ່າ ໃນຂອບເຂດທົ່ວປະເທດ ຈົ່ງສືບຕໍ່ປຸກລະດົມນໍ້າໃຈປະກອບສ່ວນ ບໍລິຈາກເລືອດຊ່ວຍເຫຼືອສັງຄົມ ເພື່ອໃຊ້ເຂົ້າໃນການຮັກສາຄົນເຈັບ ແລະ ຜູ້ຕ້ອງການເລືອດ ເພື່ອຊ່ວຍຊີວິດຂອງເຂົາເຈົ້າ.  ພິທີດັ່ງກ່າວ ໄດ້ຈັດຂື້ນໃນວັນທີ 12 ມິຖຸນານີ້ ທີ່ສູນການຄ້າລາວ-ໄອເຕັກມໍ.

Medialaos MMD