ສັງຄົມຍຸກດີຈີຕອນນີ້ ຫາກຂາດສະຕິແລ້ວ ມີໂອກາດຕົກເປັນເຫຍື່ອໂດຍຮູ້ບໍ່ທັນກົນໂກງທີ່ແອບແຝງມານຳສື່ສັງຄົມອອນລາຍ.

ໃນໜ້າອອນລາຍພວກເຮົາກໍ່ມີບົດລົງພິມຫຼາຍບົດເພື່ອເຕືອນສະຕິໃນການຫຼີ້ນຫວຍເຖື່ອນ (ຕ່າງປະເທດ) ເກມອອນລາຍເທີງໜ້າເຟສບຸກ…ລວມໄປເຖີງຜູ້ໂພສຂາຍຫວຍຕ່າງປະເທດ.

ແລະແລ້ວ ໃນຕົ້ນເດືອນມີນາ ກໍ່ປະກົດເຫັນການສ້າງເພສ Shopping online By Fingo ຂື້ນ ເພື່ອໂຄສະນາຫຼອກລວງ ອ້າງວ່າສາມາດສ້າງລາຍໄດ້ເປັນກອບເປັນກຳ ສະເລ່ຍມື້ນື່ງສາມແສນ-ຫ້າແສນກີບຕໍ່ມື້. ເພສນີ້ແມ່ນແອັບຊື້-ຂາຍແບບອອນລາຍ ແຕ່ບັງຄັບໃຫ້ມີການລົງທຶນຈ່າຍເງິນໃນນາມສະມາຊິກ ຫຼື ພາສາຕະຫຼາດເຂົາວ່າ: ແຊລູກໂສ້ນັ້ນເອງ… ພວກນີ້ແມ່ນຜິດກົດ ໝາຍທັງນັ້ນ. ກ່ອນໜ້ານີ້ ມີຫຼາຍຂະບວນການ ຫຼອກໃຫ້ເຂົ້າສູ່ການຂາຍອອນລາຍ… ສຸດທ້າຍກໍ່ຖືກຕົ້ມທັງເປັນ ຂໍໂທດເນີ ບໍ່ແມ່ນເວົ້າຫຍໍ້ຫຍັນກັນ! ຄັນແມ່ນເຮົາຕັ້ງສະຕິ ເບີ່ງເຫດ ເບີ່ງຜົນແລ້ວເຮົາກໍ່ຈະຮູ້ທັນກົນໂກງຂອງພວກເຂົາ… ຫາກວ່າເຮົາຢາກໄດ້ເກີນເຫດ ກໍ່ຍ່ອມຕົກເປັນເຫຍື່ອຂອງເຂົາ.

ໃນສູ່ມື້ນີ້ ເວລາເປີດໜ້າເຟສບຸກ ມັນຕ້ອງໄດ້ມີສະຕິໃນການເສບຂ່າວ ເພາະມັນມີຂ່າວປອມ, ຂ່າວສ້າງກະແສ ຖືວ່າໃນໜ້າເຟສບຸກນັ້ນມັນເປັນເວທີປ່ອຍຂ່າວ.. ປ່ອຍຂໍ້ມູນອອກມາໂດຍບໍ່ມີການກັ່ນຕອງ, ຈະເຊື່ອຫຼືບໍ່ ເປັນສິດຂອງຜູ້ເບີ່ງ-ຜູ້ເສບຂ່າວ ສະນັ້ນ ສະຕິສຳປະຊັນຍະຕ້ອງໝັ້ນທ່ຽງທີ່ສຸດ.

ບໍ່ແມ່ນແຕ່ການພະນັນ, ເກມອອນລາຍ, ເພສຫຼອກລວງລົງທຶນຂາຍເຄື່ອງອອນລາຍທໍ່ນັ້ນ ທີ່ມັນປັ່ນຫົວພວກເຮົາໃນໜ້າເຟສບຸກ… ແຕ່ຍັງມີແຈ້ງການທາງການ ຈາກສຳນັກງານ, ອົງການຂອງລັດ ທີ່ຫາກໍ່ເຊັນ ກໍ່ໂປໂລອອກມາອີກ. ບາງເທື່ອຕົ້ນສັງກັດ ແລະ ຜູ້ກ່ຽວຂ້ອງແຈ້ງການຍັງບໍ່ຮູ້ກໍ່ມີ.

ສະນັ້ນ ຈີ່ງຂໍຮຽກຮ້ອງໃຫ້ຕັ້ງສະຕິ ເຮົາຈຶ່ງຮູ້ທັນກົນໂກງ.

ໂດຍ: ທິດດີ