ສະພາການຄ້າ ແລະ ອຸດສາຫະກຳ ແຫ່ງຊາດລາວ ໃນນາມ ສະພາທີ່ປຶກສາທຸລະກິດ ອາຊຽນລາວ ໄດ້ຮ່ວມກັບໂຄງ ການແຜນງານເຊື່ອມໂຍງເສດຖະກິດອາຊຽນຂອງ ສປປ ລາວ ເພື່ອການພັດທະນາດ້ານທຸລະກິດ ແລະ ການຄ້າ (RELATED) ຂອງ GIZ ປະຈຳລາວ ຈະຈັດງານຊີງລາງວັນທຸລະກິດອາຊຽນດີເດັ່ນ ຂອງ ສປປ ລາວ 2020 (ASEAN Business Award Laos 2020) ຫຼື ABA Laos 2020 ຂຶ້ນ ຊຶ່ງມີຈຸດປະສົງມອບລາງວັນທຸລະກິດອາຊຽນດີເດັ່ນ ຂອງ ສປປ ລາວ ຊຶ່ງລາງວັນດັ່ງກ່າວນີ້ແມ່ນຢູ່ພາຍໃຕ້ອົງປະກອບວຽກງານຂອງພາກພື້ນ ກອງປະຊຸມສຸດຍອດທຸລະກິດ ແລະ ການລົງທຶນອາຊຽນ ແລະ ການຈັດງານທຸລະກິດດີເດັ່ນຂອງອາຊຽນ. ບັນດາວຽກງານເຫຼົ່ານີ້ແມ່ນຢູ່ພາຍໃຕ້ການຊີ້ນຳ ແລະ ຈັດຕັ້ງປະຕິບັດຂອງສະພາທີ່ປຶກສາທຸລະກິດອາຊຽນ.

ງານຖະແຫຼງຂ່າວກ່ຽວກັບງານດັ່ງກ່າວ ໄດ້ຈັດຂຶ້ນໃນວັນທີ 16 ມິຖຸນານີ້ ທີ່ສະພາການຄ້າ ແລະ ອຸດສາຫະກຳແຫ່ງຊາດລາວ ໂດຍການເຂົ້າຮ່ວມຂອງ ທ່ານ ສະຫວັນຄອນ ຣາຊມຸນຕຣີ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ປະທານສະມາຄົມນັກຂ່າວແຫ່ງຊາດລາວ, ທ່ານ  ທະນົງສິນ  ກັນລະຍາ   ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ ແລະ ທ່ານ ນາງ  ຢັນເຊິນ ທີ່ປຶກສາແຜນງານເຊື່ອມໂຍງເສດຖະກິດອາຊຽນ ຂອງ ສປປ ລາວ ເພື່ອການພັດທະນາດ້ານທຸລະກິດ ແລະ ການຄ້າ.

ທ່ານ  ທະນົງສິນ  ກັນລະຍາ ໄດ້ກ່າວວ່າ: ການຊີງລາງວັນທຸລະກິດອາຊຽນດີເດັ່ນ ແຫ່ງ ສປປລາວ 2020 (ABA Laos 2020 ເປັນງານມອບລາງວັນທີ່ເປີດກວ້າງຕໍ່ສະມາຊິກສະພາການຄ້າ ແລະ ອຸດສາຫະກຳ ແຫ່ງຊາດລາວ ແລະ ທຸກໆຫົວໜ່ວຍທຸລະກິດໃນຂອບເຂດທົ່ວປະເທດ ທີ່ດຳເນີນທຸລະກິດຖືກຕ້ອງຕາມກົດໝາຍ,  ບໍ່ວ່ານ້ອຍ ຫຼື ໃຫຍ່ກໍສາມາດສົ່ງເຂົ້າສະໝັກແຂ່ງຂັນເອົາລາງວັນໄດ້ ໂດຍຂໍ້ມູນເພີ່ມເຕີມກ່ຽວກັບຂັ້ນຕອນສະໝັກ ສາມາດຕິດຕໍ່ໄດ້ທີ່ສະພາການຄ້າ ແລະ ອຸດສາຫະກຳແຫ່ງຊາດລາວ ຫຼື ຜ່ານທາງເວັບໄຊ www.lncci.la/aba2020 ແລະ ສາມາດຍື່ນແບບຟອມສະໝັກຜ່ານອີເມວ [email protected] ແຕ່ນີ້ຈົນເຖິງວັນທີ 14 ສິງຫາ 2020 ຊຶ່ງທຸລະກິດທີ່ຊະນະເລີດໄດ້ຮັບລາງວັນ ຈາກ ABA Lao 2020 ຈະຖືກສົ່ງເຂົ້າແຂ່ງຂັນຕໍ່ໃນລະດັບອາຊຽນ ຊຶ່ງຈະໄດ້ພົບກັບບັນດາຫົວໜ່ວຍທຸລະກິດທີ່ມີຊື່ສຽງໃນລະດັບພາກພື້ນ. ການປະກາດຜົນຜູ້ທີ່ໄດ້ຮັບລາງວັນລະດັບພາກພື້ນແມ່ນຈະໄດ້ຈັດຂຶ້ນໃນໄລຍະການຈັດກອງປະຊຸມສຸດຍອດທຸລະກິດ ແລະ ການລົງທຶນອາຊຽນ (ASEAN Business & Investment) ແລະ ກອງປະຊຸມສຸດຍອດອາຊຽນ (ASEAN Summit)  ຄັ້ງທີ 36 ປີ 2020, ທີ່ປະເທດຫວຽດນາມ.

ປະເພດລາງວັນ ສຳລັບປີ 2020 ປະກອບມີ 3 ປະເພດເຊັ່ນ: ຂະແໜງບຸລິມະສິດດີເດັ່ນ ປະກອບມີ 12 ຂະແໜງການເຊັ່ນ: ຂະແໜງກະສິກຳ, ຂະແໜງພະລັງງານ, ຂະແໜງປະມົງ, ຂະແໜງປຸງແຕ່ງອາຫານ ແລະ ເຄື່ອງດື່ມ, ຂະແໜງຫັດຖະກຳ,  ຂະແໜງ ICT, ຂະແໜງພື້ນຖານໂຄງລ່າງ, ຂະແໜງຕັດຫຍິບ,  ຂະແໜງທ່ອງທ່ຽວ, ຂະແໜງຂົນສົ່ງ ແລະ ໂລຈີດຕິກ, ຂະແໜງຂາຍ ຍົກ/ຂາຍຍ່ອຍ ແລະ ຂະແໜງຜະລິດຕະພັນໄມ້. ສຳລັບລາງວັນຂະແໜງທຸລະກິດ SME ດີເດັ່ນ  (SME Excellence Award) ປະກອບມີ 4 ຂະແໜງການເຊັ່ນ:  ລາງວັນການຂະຫຍາຍໂຕທຸລະກິດດີເດັ່ນ, ການຈ້າງງານດີເດັ່ນ, ນະວັດຕະກຳດີເດັ່ນ ແລະ ການປະກອບສ່ວນຕໍ່ສັງຄົມ  ແລະ ສຸດທ້າຍແມ່ນລາງວັນພິເສດ ປະກອບມີ 7 ລາງວັນເຊັ່ນ: ລາງວັນເພື່ອນມິດສປປລາວດີເດ່ັນ, ລາງວັນທຸລະກິດຄອບຄົວດີເດັ່ນ, ລາງວັນທຸລະກິດເພື່ອສັງຄົມແບບຍືນຍົງ, ລາງວັນທຸລະກິດສີຂຽວ, ລາງວັນທຸລະກິດລິເລີ່ມ,  ລາງວັນນັກທຸລະກິດໜຸ່ມດີເດັ່ນ ແລະ ລາງວັນຜູ້ປະກອບການແມ່ຍິງດີເດັ່ນ.

ສຳລັບຄວາມໂປ່ງໃສໃນຂັ້ນຕອນການກວດສອບແບບຟອມ ແລະ ເອກະສານຂອງຜູ້ສະໝັກ ABA Laos 2020 ແມ່ນຈະຖືກກວດສອບໂດຍບໍລິສັດ KPMG (Laos) ຫຼັງຈາກນັ້ນກອງເລຂາຮັບຜິດຊອບງານຊີງລາງວັນຈະໄດ້ເຊີນເອົາຕາງໜ້າຈາກສື່ມວນຊົນ, ຕາງໜ້າຈາກພາກລັດ,  ຕາງໜ້າພາກທຸລະກິດ ແລະ ສະຖາບັນການສຶກສາ ເພື່ອເຂົ້າມາເປັນຄະນະກຳມະການຕັດສິນໃນທຸກໆຂະແໜງ ແລະ ແຕ່ລະປະເພດລາງວັນ.

ພິທີມອບລາງວັນທຸລະກິດອາຊຽນດີເດັ່ນ ແຫ່ງ ສປປ ລາວ 2020 (ASEAN Business Award Laos 2020) ABA Laos 2020 ຈະໄດ້ຈັດຂຶ້ນໃນວັນທີ  25  ກັນຍາ 2020 ທີ່ນະຄອນຫຼວງວຽງຈັນ, ການມອບລາງວັນສຳລັບປີ  2020 ນີ້ເປັນການສ້າງແຮງບັນດານໃຈໃຫ້ແກ່ຫົວໜ່ວຍທຸລະກິດລາວ ຊຶ່ງທຸ້ມເທເຫື່ອແຮງສະຕິປັນຍາ ແລະ ອື່ນໆ ຕະຫຼອດ ປີ 2020 ແລະ ຫຼາຍປີຜ່ານມາ. ນອກນັ້ນຍັງເປັນການເຕົ້າໂຮມຫົວໜ່ວຍທຸລະກິດ ໃນ ສປປ ລາວ ເພື່ອປະກອບສ່ວນເຂົ້າໃນຂະບວນສ້າງສາພັດທະນາການເຊື່ອມໂຍງເສດຖະກິດກັບອາຊຽນ ແລະ  ເປັນບາດກ້າວສໍາຄັນໃນການເຂົ້າສູ່ຕະຫຼາດເພື່ອນບ້ານ, ຕະຫຼາດອາຊຽນ ແລະ ຕະຫຼາດໂລກອີກດ້ວຍ.

Medialaos MMD by ໜັງສືພິມ ປະຊາຊົນ