ເພື່ອເປັນໂຄສະນາຜົນສໍາເລັດໃນການຈັດຕັ້ງປະຕິບັດມາດຕະການຄວບຄຸມ ປ້ອງກັນ ແລະ ແກ້ໄຂການລະບາດຂອງພະຍາດ COVID-19 ຜົນສໍາເລັດ ສິ່ງທ້າທາຍ ແລະ ແຜນການຕໍ່ໜ້າ ໃນການເຝົ້າລະວັງບໍ່ໃຫ້ໂຄວິດ-19 ກັບມາລະບາດໃນປະເທດລາວອີກ ສູນຂ່າວສານການແພດສຸຂະສຶກສາ ກະຊວງສາທາລະນະສຸກ ຮ່ວມກັບກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແລະ ອົງການຢູນີເຊັບ ໄດ້ຈັດທີມນັກຂ່າວຈາກສູນກາງ ຊຶ່ງລວມມີ: ສື່ໂທລະພາບ, ວິທະຍຸ, ສື່ສິງພິມ ແລະ ສື່ສັງຄົມອອນລາຍ ລົງເກັບກຳຂໍ້ມູນເພື່ອຂຽນຂ່າວ ທີ່ແຂວງຫຼວງນໍ້າທາ ໃນລະຫວ່າງວັນທີ 15 – 20 ມິຖຸນາ 2020.

ສື່ມວນຊົນຈາກສູນກາງປະກອບມີ: ໂທລະພາບແຫ່ງຊາດ, ວິທະຍຸກະຈາຍສຽງແຫ່ງຊາດ, ສື່ ປກສ, ໜັງສືພິມພາສາຕ່າງປະເທດ, ໜັງສືພິມກອງທັບ, ແລະ ວິທະຍຸ CRI ໄດ້ລົງເຄື່ອນໄຫວເຮັດວຽກຢູ່ແຂວງຫຼວງນໍ້າທາ.

ທ່ານ ວິສິດ ຄໍາລືຊາ ຫົວໜ້າສູນສື່ສານເພື່ອສຸຂະພາບ-ສຸຂະສຶກສາ ໄດ້ກ່າວເຖິງຈຸດປະສົງຂອງການມາເຮັດວຽກຂອງນັກຂ່າວໃນຄັ້ງນີ້ ເພື່ອໃຫ້ບັນດາສື່ນໍາເອົາຜົນການຈັດຕັ້ງປະຕິບັດມາດຕະການຕ່າງໆ ໃນການຄວບຄຸມ ປ້ອງກັນ ແລະ ແກ້ໄຂການລະບາດຂອງ COVID-19 ໂດຍສະເພາະແມ່ນການຈັດຕັ້ງປະຕິບັດມາດຕະການ ຂອງຄະນະສະເພາະກິດຂັ້ນແຂວງ ແລະ ຂະແໜງການອ້ອມຂ້າງໄປໂຄສະນາ ເຜີຍເຜີຍແຜ່.

ໃນຊ່ວງໄລຍະຢ້ຽມຢາມແຂວງຫຼວງນໍ້າທາ ສື່ມວນຊົນຈາກສູນກາງ ໄດ້ມີໂອກາດສຳພາດ ທ່ານ ບຸນຍີ່ ແກ້ວຄູນເມືອງ ຮອງເຈົ້າແຂວງຫຼວງນໍ້າທາ ທັງເປັນຫົວໜ້າສະເພາະກິດຕ້ານການແຜ່ລະບາດຂອງພະຍາດໂຄວິດ-19 ແຂວງຫຼວງນໍ້າທາ ທ່ານໄດ້ກ່າວຕໍ່ສື່ມວນຊົນວ່າ: ພາຍຫຼັງພະຍາດໂຄວິດ-19 ໄດ້ລະບາດຢູ່ ສປປລາວ ແຂວງຫຼວງນໍ້າທາ ກໍ່ໄດ້ປະຕິບັດຄໍາສັ່ງຂອງນາຍົກລັດ ຖະມົນຕີ ເລກທີ 16 ຢ່າງເຄັ່ງຄັດ ແລະ ໄດ້ແຕ່ງຕັ້ງຄະນະສະເພາະກິດຢູ່ແຕ່ລະເມືອງ ເພື່ອໂຄສະນາເຜີຍແຜ່ຜົນຮ້າຍຂອງພະຍາດໂຄວິດ-19 ແລະ ວິທີປ້ອງກັນຕົນເອງ ແລະ ຄອບຄົວ ພ້ອມກັນນັ້ນກໍ່ໄດ້ກຳນົດຈຸດກ່ັນຕອງຄົນເຂົ້າ-ອອກ ຮັບເຂົ້າມາພາຍໃນລວມທັງໝົດມີ 19 ຈຸດ ແລະ ໄດ້ປິດເສັ້ນທາງດ່ານປະເພນີຄົນເຂົ້າ-ອອກເມືອງ ແລະໄດ້ປິດການສັນຈອນລະຫວ່າງບ້ານຕໍ່ບ້ານ, ໄດ້ສ່ັງໂຈະການຈັດງານດອງທີ່ມີຄົນຈໍານວນຫຼາຍເຂົ້າຮ່ວມ, ປິດຮ້ານອາຫານ, ຮ້ານກິນດື່ມ, ຮ້ານບັນເທີງ ແລະ ໄດ້ມີການປ້ອງກັນຢ່າງເຂັ້ມງວດ ໄດ້ກໍານົດເອົາໂຮງຮຽນບັນດາເມືອງເປັນບ່ອນກັກແຮງງານຈາກຕ່າງປະເທດທີ່ເຂົ້າມາລາວ ທ່ານກ່າວຕື່ມວ່າ: ພາຍຫຼັງສະຖານະການຜ່ອນຄາຍລົງ ແຂວງກໍ່ບໍ່ໄດ້ລະເຫຼີງມາດຕະການປ້ອງກັນ ແລະ ຍັງໄດ້ສືບຕໍ່ປະຕິບັດຕາມຄຳສັ່ງຂອງນາຍົກ ແລະ ແຈ້ງການຂອງກະຊວງການຕ່າງປະເທດຢ່າງເຂັ້ມງວດ ພ້ອມທັງຍັງສືບຕໍ່ປິດຮ້ານບັນເທີງ ແລະ ຫ້າມກິດຈະກໍາຊຸມນຸມຢ່າງເຂັ້ມງວດ, ສືບຕໍ່ປິດດ່ານປະເພນີດ່ານທ້ອງຖິ່ນສໍາລັບບຸກຄົນທົ່ວໄປ ແລະ ອະນຸຍາດໃຫ້ສໍາລັບລົດຂົນສົ່ງສິນຄ້າເທົ່ານັ້ນ ນອກນີ້ຍັງໄດ້ເອົາໃຈໃສ່ຄົ້ນຄວ້າຕິດຕາມກວດກາການສະເໜີຂອງບໍລິສັດ ແລະ ອົງການຈັດຕັ້ງຕ່າງໆ ໂດຍສະເພາະ ສປ ຈີນ ທີ່ມາເຮັດວຽກໃນລາວ ຕາມຂັ້ນຕອນການເຮັດວຽກຂອງຄະນະສະເພາະກິດຂັ້ນແຂວງ ໄດ້ນໍາໃຊ້ໃຫ້ໂຮງໝໍເພື່ອເປັນສະຖານທີ່ກັກກັນແຮງງານມາຈາກຕ່າງປະເທດ ແຂວງຫຼວງນໍ້າທາມີສູນກັກກັນ 1 ສູນໄວ້ສະເພາະແຮງງານຮັບໃຊ້ຄົນລາວທີ່ເຮັດວຽກຢູ່ຕ່າງປະເທດກັບຄືນມາເຮັດວຽກຢູ່ ສປປ ລາວ.

ທີມງານສື່ມວນຊົນ ຈາກສູນກາງຍັງໄດ້ສຳພາດ ທ່ານ ດຣ ຄໍາຈັນ ອິນທອງໄຊ ຫົວໜ້າພະແນກສາທາລະນະສຸກແຂວງ, ຮອງປະທານຄະນະສະເພາະກິດແຂວງຫຼວງນໍ້າທາ ທ່ານໄດ້ກ່າວຕໍ່ນັກຂ່າວວ່າ: ນັບແຕ່ໂຄວິດ-19 ລະບາດເຂົ້າມາ ສປປ ລາວ ພະແນກສາທາລະນະສຸກ ກໍ່ໄດ້ຮັບການຊີ້ນໍາຈາກກະຊວງສາທາລະນະສຸກ ດ້ານວິຊາການ ແລະ ພາຍໃຕ້ການຊີ້ນໍາຂອງອຳນາດການປົກ ຄອງແຂວງຫຼວງນໍ້າທາ ໄດ້ແຕ່ງຕັ້ງຄະນະສູນສຸກເສີນເວນຍາມຕະຫຼອດ 24 ຊົ່ວໂມງ ເພື່ອຮັບປະ ກັນການຊ່ວຍເຫຼືອໃຫ້ທ່ວງທັນເວລາ, ໄດ້ກະກຽມສະຖານທີ່ບໍລິການຢູ່ໂຮງໝໍແຂວງ, ໂຮງໝໍເສນາຮັກທະຫານແຂວງ, ໂຮງໝໍຕໍາຫຼວດ, ໂຮງໝໍສາມແຫ່ງນັ້ນໄດ້ກະກຽມສະຖານທີ່ແຍກປ່ຽວ, ສະຖານທີ່ປິ່ນປົວມີ 15 ຕຽງ ພ້ອມດ້ວຍລົດຂົນສົ່ງ ພະແນກສາທາລະນະສຸກແຂວງໄດ້ປະຕິບັດຕາມຄໍາສັ່ງ ແລະ ແຈ້ງການຂອງລັດຖະບານທີ່ວາງອອກມາແຕ່ລະໄລຍະຢ່າງເຂັ້ມງວດ ແລະ ໄດ້ລົງໂຄສະນາເຜີຍແຜ່ໂຄສະນາສຸຂະສຶກສາ ວຽກງານປ້ອງກັນ ແລະ ຄວບຄຸມ ໃຫ້ແກ່ພໍ່ແມ່ປະຊາຊົນທຸກຄົນ ເຂົ້າໃຈເຖິງຄວາມຮ້າຍແຮງຂອງພະຍາດໂຄວິດ-19 ເພື່ອປ້ອງກັນຄອບ ຄົວ ແລະ ສັງຄົມ.

ທ່ານເນັ້ນວ່າ ພາຍຫຼັງທີ່ລັດຖະບານປົດລ໋ອກ ສິ່ງສໍາຄັນແມ່ນໃຫ້ຮັກສາໄລຍະຫ່າງກັນ 1 ແມັດຂຶ້ນໄປ ຖ້າມີຄວາມຈໍາເປັນຕ້ອງໄປບ່ອນຊຸມຊົນຕ້ອງໃສ່ຜ້າອັດປາກ-ອັດດັງ ແຂວງຫຼວງນໍ້າທາໄດ້ຮັບການຊ່ວຍເຫຼືອຈາກປະເທດໄກ້ຄຽງ ແລະ ອົງການສາກົນ ສໍາລັບແຂວງຫຼວງນໍ້າທາ ໃນການຊ່ວຍເຫຼືອຈາກອົງການ UNICEF ແມ່ນຢ່າງມະຫາສານດ້ານສາທາລະນະສຸກ ຕາມແຜນຮ່ວມລັດຖະບານລາວ ແລະ ກະຊວງສາທາລະນະສຸກ ດ້ານວຽກງານຮັກສາສຸຂະພາບ, ວຽກງານສັກຢາກັນພະຍາດ, ໂພສະນາການ, ນໍ້າສະອາດ ແລະ ສຸຂະອະນາໄມ ແລະ ອື່ນໆ ສໍາລັບການຊ່ວຍເຫຼືອການລະບາດ ການຄວບຄຸມພະຍາດໂຄວິດ-19 ອົງການຢູນີເຊັບ ໄດ້ໃຫ້ການຊ່ວຍເຫຼືອດ້ານວັດຖຸ, ອຸປະກອນ, ແຜ່ນຜັບຄວາມຮູ້ກ່ຽວກັບພະຍາດໂຄວິດ-19, ສະປ໋ອດໂຄສະນາທາງວິທະຍຸ ແລະ ໂທລະພາບ ທີ່ກະຊວງສາທາລະນະສຸກ ສົ່ງມາແມ່ນໄດ້ຮັບຫຼາຍພໍສົມຄວນ.

ທີມງານສື່ມວນຊົນ ຍັງໄດ້ມີໂອກາດຢ້ຽມຢາມໂຮງຫມໍແຂວງຫຼວງນໍ້າທາ ເພື່ອເກັບກໍາຂໍ້ມູນການເຮັດວຽກຢ່າງຕັ້ງໜ້າຂອງແພດໝໍ ເພື່ອຄວບຄຸມພະຍາດໂຄວິດ-19 ແລະ ຊ່ວຍເຫຼືອໃຫ້ຂໍ້ມູນແກ່ປະຊາຊົນ ໃນການປ້ອງກັນຕົນເອງ ແລະ ຄອບຄົວຈາກພະຍາດດັ່ງກ່າວ ທ່ານ ດຣ ພູວຽງ ດວງດາລາ ຮອງອຳນວຍການໂຮງໝໍແຂວງຫຼວງນໍ້າທາ ໄດ້ກ່າວວ່າໃນຊ່ວງທີ່ໂຄວິດ-19 ລະບາດອົງການຢູນີເຊັບ ກໍ່ຍັງໄດ້ສືບຕໍ່ໃຫ້ການຊ່ວຍເຫຼືອໂຮງໝໍແຂວງ ດ້ານວຽກງານສັກຢາກັນພະຍາດ , ໂພສະນາການ, ວຽກງານສຸຂະອະນາໄມ ແລະ ອື່ນໆ.

ເພື່ອເປັນການມີສ່ວນຮ່ວມໃນການໂຄສະນາ “ກັບເຂົ້າໂຮງຮຽນຢ່າງປອດໄພ” ທີມງານນັກຂ່າວຈາກສູນກາງ ຍັງໄດ້ໄປພົບປະກັບ ທ່ານ ຄຳນ້ອຍ ແກ້ວຈັນສີ ຮອງຫົວໜ້າພະແນກສຶກສາແຂວງຫຼວງນໍ້າທາ ທ່ານໄດ້ແຈ້ງໃຫ້ຮູ້ວ່າແຂວງຫຼວງນໍ້າທາ ໄດ້ເອົາໃຈໃສ່ຢ່າງຕັ້ງຫນ້າໃນການປະຕິບັດຂໍ້ແນະນໍາກ່ຽວກັບ “ກັບເຂົ້າໂຮງຮຽນຢ່າງປອດໄພ” ໄດ້ຈັດກອງປະຊຸມຮ່ວມກັບສຶກສາທຸກໆ ເມືອງ ແລະ ໄດ້ແນະນໍາໃຫ້ເຮັດຄວາມສະອາດ ແລະ ຂ້າເຊື້ອໃນບໍລິເວັນໂຮງຮຽນ ແລະ ຫ້ອງຮຽນ ໄດ້ໃຫ້ຂໍ້ມູນກັບພໍ່ແມ່ ແລະ ເດັກ ກ່ຽວກັບມາດຕະການຄວາມປອດໄພໃນໂຮງຮຽນກໍ່ຄືການກວດອຸນຫະພູມທຸກຄົນ ກ່ອນຈະເຂົ້າມາໃນໂຮງຮຽນ, ການໃສ່ໜ້າກາກອະນາໄມ ແລະ ການລ້າງມືດ້ວຍເຈວ ຫຼື ສະບູ ແລະ ຫຼັກການການຢູ່ຫ່າງກັນຢ່າງນ້ອຍ 1 ແມັດ ຫຼັງຈາກນັ້ນທີມງານຍັງໄດ້ລົງຢ້ຽມຢາມໂຮງຮຽນອຸດົມສິນ ເພື່ອສັງເກດການກ່ຽວກັບປະຕິບັດມາດຕະການຄວາມປອດໄພຂອງໂຮງຮຽນ.

ທ່ານ ໂຫຼຍ ໄຊເມືອງນານ ຮອງຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງຫຼວງນໍ້າທາ ໄດ້ໃຫ້ສຳພາດວ່າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ໄດ້ປະກອບສ່ວນຢ່າງຕັ້ງຫນ້າໃນການໂຄສະນາໃຫ້ຄວາມຮູ້ ກ່ຽວກັບອັນຕະຫລາຍ ຂອງພະຍາດໂຄວິດ-19 ແກ່ປະຊາຊົນບັນດາເຜົ່າ ໂດຍການນໍາໃຊ້ສະປ໋ອດວິທະຍຸ-ໂທລະພາບ ນອກຈາກນີ້ວິທະຍຸໄວຫນຸ່ມແຂວງຫຼວງນໍ້າທາ ກໍ່ໄດ້ມີສ່ວນຢ່າງຫ້າວຫັນໃນການໂສະນາໃຫ້ຂໍ້ມູນແກ່ເດັກ ແລະ ໄວຫນຸ່ມ ກ່ຽວກັບພະຍາດໂຄວິດ-19.

ທີມງານສື່ມວນຊົນ ຍັງໄດ້ໄປສັງເກດການປະຕິດວຽກງານຂອງພະນັກງານດ່ານສຳຄັນຕ່າງໆ ເພື່ອສະກັດກັ້ນການແຜ່ລະບາດຂອງພະຍາດໂຄວິດ-19 ເຂົ້າມາໃນ ສປປ ລາວ ສະຖານທີ່ກັກກັນແຮງງານທີ່ເດີນທາງມາຈາກຕ່າງປະເທດ ແລະ ພະແນກໂຍທາທິການ ແລະ ຂົນສົ່ງແຂວງ ເພື່ອສອບຖາມກ່ຽວກັບມາດຕະການໃນການປ້ອງກັນເພື່ອບໍ່ໃຫ້ພະຍາດໂຄວິດ-19 ກັບມາລະບາດທີ່ ສປປ ລາວ ເປັນຄັ້ງທີ່ສອງ.

ສໍາລັບການລົງມາເກັບກຳຂໍ້ມູນເພື່ອຂຽນຂ່າວໃນຄັ້ງນີ້ແມ່ນໄດ້ຮັບການສະໜັບສະໜູນຈາກອົງການຢູນີເຊັບປະຈໍາ ສປປ ລາວ ແລະ ອົງການຢູເສດ ຫຼື USAID.