ເນື່ອງຈາກຝົນຕົກໜັກຕິດຕໍ່ກັນເປັນເວລາຫຼາຍວັນ ສາເຫດເກີດຈາກ (ພາຍຸໝູນເຂດຮ້ອນ).ຈຶ່ງເຮັດໃຫ້ເສັ້ນທາງໃນການສັນຈອນພົບຄວາມຫຍຸ້ງຍາກລຳບາກ ແລະ ຂົວບາງບ່ອນພາຍໃນເມືອງ ນອງ ຖືກນ້ຳເຊາະເຈື່ອນ ແລະ ຕັດຂາດໄປ ເຊິ່ງຝົນໄດ້ເລີ່ມຕົກແຕ່ວັນທີ 28 ສິງຫາ 2019 ຈົນມາຮອດປັດຈຸບັນ.

ດັ່ງນັ້ນມາໃນວັນທີ 2 ກັນຍາ 2019ນີ້ ທ່ານ ແຕງອ່ອນ ຈັນທະລະນອງ ຮອງເຈົ້າເມືອງໆນອງ ພ້ອມດ້ວຍ ທ່ານ ກອງໃຊ ໄຊຍະຈັກ ຫົວໜ້າຫ້ອງການ ໂຍທາທິການ ແລະຂົນສົ່ງ ເມືອງນອງ ພ້ອມທິມງານໄດ້ລົງໄປສຳຫຼວດຈຸດທີ່ມີຄວາມສ່ຽງ ແລະໄດ້ຮັບແຈ້ງການມາ ຈາກ ທາງຄະນະຈຸດສຸມແກ້ງລີ້ນວ່າ: (ຂົວຈົມ ເຊສະໝູນ) ຢູ່ສົ້ນບ້ານ ແກ້ງລີ້ນ ໄດ້ຖືກນໍ້າເຊາະເຈື່ອນ ແລະຖືກຕັດຂາດໄປໃນຄ່ຳຄືນຂອງວັນທີ 29 ສິງຫາ 2019 ເຊິ່ງຂະໜາດຄວາມ ກ້ວາງຂອງຂົວແມ່ນ 6 ແມັດ, ຍາວ 95 ແມັດ, ຈຸດທີ່ຖືກນໍ້າຕັດຂາດແມ່ນ ຢູ່ທາງສົ້ນຂົວເບື້ອງບ້ານ ປະຈະຕຽນ ຖືກຕັດຂາດໃນໄລຍະ 30 ແມັດ, ດັ່ງນັ້ນ ທາງການນໍາຂອງເມືອງພ້ອມດ້ວຍພາກສ່ວນກ່ຽວຂ້ອງຈຶ່ງໄດ້ປຶກສາຫາລືກັນເພື່ອແກ້ໄຂເຫດການສະເພາະໜ້າ ເພື່ອໃຫ້ ປະຊາຊົນ ພາຍໃນເຂດຈຸດສຸມແກ້ງລີ້ນໄດ້ໄປມາຫາສູ່ກັນໄດ້ສະດວກ ຫຼັງຈາກນັ້ນທາງພາກສ່ວນກ່ຽວຂ້ອງຈະໄດ້ປະສານກັບ ພະແນກໂຍທາທິການແຂວງເພື່ອຫາວິທີປັບປຸງປົວແປງຂົວໃຫ້ໄດ້ທຽວໄປມາປົກກະຕິ ແລະ ກັບມາສູ່ສະພາບເດີມ.