(ພາບປະກອບ)

ຫ້ອງການ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເມືອງໃໝ່ ແຂວງຜົ້ງສາລີ ລາຍງານວ່າ: ທ້າຍອາທິດຜ່ານມາ ທ່ານ ນາງ ດວງຈັນ ຊາມົນຕີ ຫົວໜ້າພະແນກກະສິກຳ ແລະ ປ່າໄມ້ແຂວງ ພ້ອມດ້ວຍຫົວໜ້າຫ້ອງການກະສິກຳ ແລະ ປ່າໄມ້ເມືອງ, ມີຕາງໜ້າໜ່ວຍງານແມງໄມ້ ສູນປ້ອງກັນຜະລິດ ກົມປູກຝັງ ກະຊວງກະສິກຳ ແລະ ປ່າໄມ້ ໄດ້ຕິດຕາມການລະບາດຕັກແຕນຝູງໄມ້ປ່ອງທຳລາຍເຂົ້າໄຮ່ ແລະ ພືດອື່ນໆຂອງປະຊາຊົນ ບ້ານແສນຫຼວງ ຊຶ່ງການລະບາດດັ່ງກ່າວ ສົ່ງຜົນກະທົບໂດຍກົງຕໍ່ປະຊາຊົນ 63 ຄອບຄົວ ແລະ ເນື້ອທີ່ກວ່າ 84 ເຮັກຕາ ໂດຍຄາດວ່າມູນຄ່າເສຍຫາຍເບື້ອງຕົ້ນ 135 ລ້ານກວ່າກີບ.

ທ່ານ ວຽງສະໄໝ ສີສົງຄາມ ຫົວນ້າຫ້ອງການກະສິກຳ ແລະ ປ່າໄມ້ເມືອງໃໝ່ ກ່າວວ່າ: ຕັກແຕນຝູງໄມ້ປ່ອງ ເລີ່ມລະບາດແຕ່ປີ 2015 ແລະ ຜ່ານມາ ໄດ້ເອົາໃຈໃສ່ຊີ້ນຳປະຊາຊົນເຝົ້າລະວັງ ແລະ ສະກັດກັ້ນການລົງທຳລາຍຜົນລະປູກຂອງປະຊາຊົນ. ສຳລັບປີນີ້ໄດ້ລົງສຳຫຼວດຈຸດໄຂ່ຂອງຕັກແຕກ 24 ຈຸດ ກວມ 20 ບ້ານ. ແນວໃດກໍດີ ໄດ້ແນະນຳປະຊາຊົນນຳໃຊ້ຢາພື້ນເມືອງ, ຈັບຕັກແຕນ ແລະ ນຳໃຊ້ຢາສີດ. ຕາມຂໍ້ມູນເບື້້ອງຕົ້ນ, ຕັກແຕນຝູງໄມ້ປ່ອງໄດ້ລົງທຳລາຍເຂົ້າໄຮ່ຂອງປະຊາຊົນ 471 ຄອບຄົວ ຢູ່ 12 ບ້ານ ລວມເນື້ອທີ່ເສຍຫາຍ 168 ກວ່າເຮັກຕາ, ຜົນຜະລິດເສຍຫາຍ 303 ກວ່າໂຕ່ນ. ເພື່ອແກ້ໄຂຄວາມຫຍຸ້ງຍາກໃນຕໍ່ໜ້າ, ປະຊາຊົນໄດ້ສັກເຂົ້າໄຮ່ຄືນ ແລະ ບາງຈຸດປູກໝາກເດື່ອທົດແທນ.

Medialaos MMD (ແຫຼ່ງຂໍ້ມູນຈາກ: ໜັງສືພິມ ປະເທດລາວ)