ໃນຕອນເຊົ້າຂອງ ວັນທີ 15 ກໍລະກົດ 2020 ທີ່ ສູນການຝຶກອົບຮົມ ແລະ ຮ່ວມມືສາກົນ (ICTC), ຄະນະຊີ້ນຳລະດັບຊາດ ເພື່ອການຈັດຕັ້ງປະຕິບັດ ເປົ້າໝາຍການພັດທະນາ ແບບຍືນຍົງ ຢູ່ ສປປ ລາວ ໄດ້ຈັດກອງປະຊຸມທົບທວນ ປະຈຳຮອບວຽນ 3 ປີຂຶ້ນ, ຊຶ່ງຄັ້ງນີ້ເປັນຄັ້ງທີ 2 ໂດຍພາຍໃຕ້ ການເປັນປະທານຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ, ທັງເປັນປະທານ ຄະນະຊີ້ນໍາລະດັບຊາດ ເພື່ອຈັດຕັ້ງ ປະຕິບັດເປົ້າໝາຍ ການພັດທະນາແບບຍືນຍົງ (ປພຍ ຫລື SDGs) ຢູ່ ສປປ ລາວ, ມີບັນດາທ່ານລັດຖະມົນຕີ, ຮອງລັດຖະມົນຕີ ແລະ ຜູ້ຕາງໜ້າຈາກບັນ ດາກະຊວງ, ອົງການທຽບເທົ່າກະຊວງ ແລະ ຂະແໜງການທີ່ກ່ຽວຂ້ອງ ເຂົ້າຮ່ວມ.

ທ່ານນາຍົກລັດຖະມົນຕີ ໄດ້ກ່າວເປີດກອງປະຊຸມ ໂດຍໄດ້ເນັ້ນເຖິງຄວາມສຳຄັນໃນການຈັດ ຕັ້ງປະຕິບັດ ວາລະ 2030 ເພື່ອການພັດທະນາແບບຍືນຍົງ ຂອງວົງຄະນາຍາດສາກົນ ເພື່ອພ້ອມກັນສູ້ຊົນແກ້ໄຂບັນຫາ ທີ່ເປັນສິ່ງທ້າທາຍອັນສຳຄັນ ຂອງໂລກໃນປັດຈຸບັນ, ຊຶ່ງປະກອບຢູ່ໃນທັງໝົດ 17 ເປົ້າໝາຍ ແລະ ພິເສດສຳລັບ ສປປ ລາວ ແມ່ນໄດ້ມີອີກໜຶ່ງ ເປົ້າໝາຍແຫ່ງຊາດນັ້ນກໍ່ຄື ເປົ້າໝາຍທີ 18 ຊີວິດປອດໄພຈາກລະເບີດບໍ່ທັນແຕກ. ກອງປະຊຸມຄັ້ງນີ້, ໄດ້ພ້ອມກັນສະຫລຸບຕີລາຄາຄືນ ແລະ ສັງລວມບັນດາຄວາມຄືບໜ້າ ແລະ ສິ່ງທ້າທາຍຕ່າງໆ ໃນການຈັດຕັ້ງປະຕິບັດ ປພຍ ຕະຫລອດໄລ ຍະ 3 ປີ ທີ່ຜ່ານມາ (2017 – 2020) ນັບຕັ້ງແຕ່ກອງປະຊຸມ ຄັ້ງປະຖົມມະລຶກ ໃນປີ 2017, ໂດຍສະເພາະ ໃນທ່າມກາງທີ່ສະພາບ ການຂອງໂລກ ມີຄວາມສັບສົນ ແລະ ມີສິ່ງທ້າທາຍອັນໃຫຍ່ຫລວງ, ເປັນຕົ້ນແມ່ນ ຜົນກະທົບຈາກການ ລະບາດຂອງພະຍາດ ໂຄວິດ-19 ຊຶ່ງສ້າງຜົນກະທົບ ອັນໃຫຍ່ຫລວງ ໃຫ້ແກ່ເສດຖະກິດ-ສັງຄົມ ຂອງປະເທດຕ່າງໆ ໂດຍສະເພາະປະເທດ ກຳລັງພັດທະນາ.

ສະນັ້ນກອງປະຊຸມຄັ້ງນີ້, ຈຶ່ງມີຄວາມສໍາຄັນ ສໍາລັບບັນດາກະຊວງ ແລະ ຂະແໜງການກ່ຽວຂ້ອງ ໂດຍສະ ເພາະຈຸດ ປະສານງານ ປພຍ ແຕ່ລະກະຊວງ ເພື່ອຮ່ວມກັນຖອດຖອນບົດຮຽນ, ແລກປ່ຽນປະສົບການ, ຕີລາຄາຈຸດດີຈຸດອ່ອນ ແລະ ຍົກໃຫ້ເຫັນບັນດາສິ່ງທ້າທາຍ ໃນສະພາບການດັ່ງກ່າວ ແລະ ພ້ອມກັນກຳນົດທິດທາງ ແລະ ມາດຕະການ ໃນການແກ້ໄຂ ບັນດາສິ່ງທ້າທາຍ ເພື່ອໃຫ້ບັນລຸ ປພຍ ຕາມຄຳຂວັນທີ່ວ່າ “ ພວກເຮົາພ້ອມກັນກ້າວໄປ ”.

ມາຮອດປັດຈຸບັນ, ສປປ ລາວ ໄດ້ເຊື່ອມສານ ປພຍ ເຂົ້າໃນແຜນພັດທະນາ ເສດຖະກິດ-ສັງ ຄົມແຫ່ງຊາດ 5 ປີ ຄັ້ງທີ VIII ແລະ ຈະສືບຕໍ່ເຊື່ອມສານເຂົ້າໃນ ແຜນພັດທະນາ ເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ໃນຕໍ່ໜ້າ ໂດຍໄດ້ສຳເລັດການ ເຊື່ອມສານທັງໝົດ 238 ຕົວຊີ້ບອກ ຂອງ ປພຍ ແລະ ມອບໝາຍໃຫ້ແຕ່ກະຊວງ ແລະ ຂະແໜງການກ່ຽວຂ້ອງ ຮັບຜິດຊອບ. ນອກຈາກນັ້ນ, ກອງປະຊຸມຍັງໄດ້ມີ ການຮັບຮອງເອົາ ແຜນປະຕິບັດແຫ່ງຊາດ ເພື່ອຈັດຕັ້ງປະຕິບັດວາລະ 2030 ເພື່ອການພັດທະນາແບບຍືນຍົງ, ຊຶ່ງໃນນັ້ນປະກອບມີ ແຜນດໍາເນີນງານການສື່ສານ, ໂຄສະນາ ແລະ ເຜີຍແຜ່ ປພຍ ແລະ ຮັບຮອງເອົາການກະກຽມໃຫ້ແກ່ ຮ່າງບົດລາຍງານ ແຫ່ງຊາດແບບສະໝັກໃຈ ສະບັບທີ 2 ຂອງ ສປປ ລາວ ໃນປີ 2021. ກອງປະຊຸມ ໄດ້ມີການເປີດຕົວນຳໃຊ້ແອັບພລິເຄເຊີນ ປພຍ (SDGs Application) ຢ່າງເປັນທາງການ ຢູ່ ສປປ ລາວ ເພື່ອເພີ່ມຊ່ອງ ທາງການເຂົ້າເຖິງ ແຫລ່ງຂໍ້ມູນໃຫ້ວ່ອງໄວ ແລະ ທັນການ.

ຕອນທ້າຍກອງປະຊຸມ, ທ່ານນາຍົກລັດຖະມົນຕີ ໄດ້ເນັ້ນຢ້ຳເຖິງຄວາມສຳຄັນ ຂອງການຈັດຕັ້ງປະຕິບັດ ປພຍ ຢູ່ ສປປ ລາວ ໂດຍໄດ້ໃຫ້ທິດຊີ້ນຳໃນການ ສືບຕໍ່ເຊື່ອມສານ ປພຍ ເຂົ້າໃນແຜນພັດທະນາ ເສດຖະກິດ-ສັງຄົມແຫ່ງຊາດ ສະບັບທີ IX ທີ່ກຳລັງຢູ່ໃນຂັ້ນຕອນ ການກະກຽມຮ່າງໃນປັດ ຈຸບັນ, ພ້ອມທັງສືບຕໍ່ຄົ້ນຄວ້າ ສຸມໃສ່ແກ້ໄຂສິ່ງທ້າທາຍຕ່າງໆ ທີ່ເປັນອຸປະສັກ ເພື່ອບັນລຸບັນດາວຽກງານຂອງ ປພຍ ໃຫ້ໄດ້ຕາມເປົ້າໝາຍ ແລະ ນຳເອົາ ສປປ ລາວ ໃຫ້ຫລຸດພົ້ນອອກຈາກສະຖານະພາບ ປະເທດດ້ອຍພັດທະນາ (LDCs) ໃນອະນາຄົດ. ທ່ານນາຍົກລັດຖະມົນຕີ ຍັງໄດ້ຮຽກຮ້ອງເຖິງການ ມີສ່ວນຮ່ວມຢ່າງຕັ້ງໜ້າ ຈາກທຸກພາກສ່ວນ ນັບແຕ່ຂັ້ນສູນກາງ ລົງຮອດທ້ອງຖິ່ນ ໃນການຈັດຕັ້ງຜັນຂະຫຍາຍ ເພື່ອບັນລຸເປົ້າໝາຍ ແລະ ຄາດໝາຍຂອງ ປພຍ ຕາມຄຳຂວັນ “ ພວກເຮົາພ້ອມກັນກ້າວໄປ ”.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)