ປະຈຸບັນເຖິງວ່າ ສປປ ລາວ ຈະຍັງບໍ່ພົບກໍລະນີຜູ້ຕິດເຊື້ອພະຍາດໂຄວິດ-19 ເປັນເວລາ ກວ່າ 3 ເດືອນແລ້ວ ແຕ່ໃນຂະໜະດຽວກັນພະຍາດດັ່ງກ່າວກໍ່ຍັງສືບຕໍ່ແຜ່ລາມໄປທົ່ວໂລກ ແລະ ມີຜູ້ຕິດເຊື້ອເພີ່ມຂຶ້ນເລື້ອຍໆ ເຖິງ 13 ລ້ານກວ່າຄົນ ແລະ ເສຍຊີວິດແລ້ວ 5 ແສນກວ່າຄົນ. ເຊິ່ງລັດຖະບານລາວກໍ່ຍັງສືບຕໍ່ເອົາໃຈໃສ່ບັນຫາດັ່ງກ່າວເປັນບັນຫາສຳຄັນ ແລະ ມີການອອກແຈ້ງການ ແລະ ມາດຕະການຜ່ອນຜັນອອກມາໃນແຕ່ລະໄລຍະ ເພື່ອປ້ອງກັນພະຍາດໂຄວິດ-19 ກັບມາລະບາດອີກໃນຮອບທີ 2.

ທ່ານ ບຸນທະວີ ຈະເລີນຜົນ ອຳນວຍການໂຮງໝໍແຂວງອັດຕະປື ໄດ້ໃຫ້ສຳພາດຕໍ່ສື່ມວນຊົນ ໃນວັນທີ 9 ກໍລະກົດ 2020 ນີ້ວ່າ: ພາຍຫຼັງທີ່ພະຍາດໂຄວິດ-19 ເຂົ້າມາລະບາດ ໃນ ສປປ ລາວ ທາງໂຮງໝໍແຂວງອັດຕະປືກໍ່ໄດ້ເອົາໃຈໃສ່ຕິດຕາມ ແລະ ປະຕິບັດຕາມແຈ້ງການ ແລະ ມາດຕະການທີ່ທາງຂັ້ນເທິງໄດ້ວາງອອກຢ່າງເຄັ່ງຄັດ. ໄດ້ມີການຝຶກອົບຮົມເພື່ອເພີ່ມຄວາມຮູ້ໃຫ້ກັບພະນັກງານແພດໝໍ ແລະ ບຸກຄະລາກອນທົ່ວແຂວງ ເພື່ອເພີ່ມຄວາມຮູ້ໃນການປ້ອງກັນພະຍາດດັ່ງກ່າວ ບໍ່ໃຫ້ແພ່ລາມເປັນວົງກວ້າງ.
ມີການກະກຽມສະຖານທີ່ຫຼາຍຈຸດພາຍໃນແຂວງ ເພື່ອກັກກັນຜູ້ທີ່ຕ້ອງສົງໃສທີ່ມາຈາດເຂດທີ່ມີການລະບາດ ຕາມກຳນົດເວລາທີ່ກຳນົດໄວ້ 14 ວັນ, ມີການກະກຽມສະຖານທີ່ເພື່ອຮອງຮັບຜູ້ປ່ວຍ ກໍລະນີຫາກພົບຜູ້ທີ່ຕິດເຊື້ອ ແລະ ຍາດພີ່ນ້ອງ ຫຼື ຄົນທີ່ໃກ້ຊິດກັບຜູ້ປ່ວຍ ຢູ່ທີ່ຢຮງໝໍແຂວງອັດຕະປື.

ມີສະຖານທີ່ສຳລັບປິ່ນປົວຄົນປ່ວຍກໍລະນີມີຜູ້ຕິດເຊື້ອໂຄວິດ-19 ທັງຫ້ອງຕຽງລວມສຳລັບຜູ້ປ່ວຍທຳມະດາ 13 ຕຽງ ແລະ ຫ້ອງແຍກສຳລັບຜູ້ທີ່ຕິດເຊື້ອຂັ້ນຮຸນແຮງ 4 ຫ້ອງ. ມີຫ້ອງພັກສຳລັບກັກໂຕແພດໝໍທີ່ປິ່ນປົວຄົນຕິດເຊື້ອດັ່ງກ່າວ ກ່ອນກັບບ້ານ. ເຊິ່ງໄດ້ຮັບການຊີ້ນຳ ແລະ ຊຸກຍູ້ຈາກກົມປິ່ນປົວ ກະຊວງສາທາລະນະສຸກ ໂດຍກົງ. ສຳລັບແຂວງອັດຕະປືກໍ່ພົບບາງກໍລະນີຜູ້ຕ້ອງສົງໃສ ເປັນຄົນລາວ 4 ຄົນ ທີ່ມາຈາກເຂດທີ່ມີການຕິດເຊື້ອ ແລະ ຄົນຈີນ 2 ຄົນ, ໄດ້ມີການນຳເອົາຕົວຢ່າງໄປກວດຢູ່ແຂວງຈຳປາສັກ ໃຊ້ເວລາໃນການກວດກາ 2 ວັນຈຶ່ງຮູ້ຜົນ ແຕ່ປາກົດວ່າບໍ່ພົບເຊື້ອພະຍາດໂຄວິດ-19 ເຊິ່ງຖືວ່າໃຊ້ເວລາດົນພໍສົມຄວນ.
ມີການຈັດຕັ້ງກຳລັງໃນການປະຈຳການ ໂດຍທີມແພດທັງໝົດ 137 ທ່ານ ໄດ້ແບ່ງເປັນແຕ່ລະທີມ ປະກອບມີ ທ່ານໝໍ 1 ທ່ານ ແລະ ແພດຜູ້ຊ່ວຍ 4 ທ່ານ ໝູນປ່ຽນກັນປະຈຳການໃນແຕ່ລະວັນ ແຕ່ກໍ່ຖືວ່າຍັງບໍ່ພຽງພໍ ຖ້າທຽບໃສ່ມາດຕະຖານທີ່ທາງກະຊວງສາທາລະນະສຸກໄດ້ວາງອອກ.
ມີການກວດກາ, ວັດແທກອຸນຫະພູມ, ແນະນຳໃຫ້ລ້າງມືໃຫ້ສະອາດດ້ວຍເຈວລ້າງມື ແລະ ຮັກສາໄລຍະຫ່າງ ລະຫວ່າງແພດໝໍ , ຄົນປ່ວຍ ແລະ ຍາດພີ່ນ້ອງຂອງຄົນປ່ວຍ ທຸກຄັ້ງ ກ່ອນເຂົ້າໂຮງໝໍ ເພື່ອເປັນການປ້ອງກັນການກະຈາຍຂອງເຊື້ອພະຍາດດັ່ງກ່າວ.
ທ່ານຍັງໃຫ້ຮູ້ຕື່ມອີກວ່າ ທາງໂຮງໝໍ ໄດ້ຮັບການສະໜອງອຸປະກອນ ແລະ ເຄື່ອງມືໃນການປ້ອງກັນພະຍາດດັ່ງກ່າວຈຳນວນໜຶ່ງ ຈາກທາງສູນກາງ ແລະ ກໍ່ໄດ້ຮັບຈາກພາກສ່ວນສັງຄົມຊ່ວຍຊຸກຍູ້ຈຳນວນໜຶ່ງ. ນອກຈາກນີ້ທາງໂຮງໝໍກໍ່ໄດ້ນຳໃຊ້ງົບບໍລິຫານຂອງໂຮງໝໍເອງ ໃນການຊື້ເຄື່ອງສະແກນພະຍາດຈຳນວນ 02 ເຄື່ອງໃນໄລຍະທີ່ມີການລະຍາດເບື້ອງຕົ້ນ ກ່ອນທີ່ຈະໄດ້ຮັບການຊ່ວຍເຫຼືອຈາກທາງສູນກາງໃນໄລຍະຕໍ່ມາ. ສ່ວນພາຫະນະໃນການທຽວຮັບໃຊ້ກໍ່ຍັງບໍ່ພຽງພໍ ແຕ່ກໍ່ພະຍາຍາມໝູນໃຊ້ພາຫະນະ ແລະ ອຸປະກອນ ທີ່ມີຢູ່ ໃຫ້ເກີດປະໂຫຍດສູງສຸດ.

ເຄື່ອງຊ່ວຍຫາຍໃຈທີ່ທາງໂຮງໝໍແຂວງມີ 3 ເຄື່ອງທີ່ຍັງໃຊ້ໄດ້ ເຊິ່ງຖືວ່າບໍ່ພຽງພໍ ຖ້າຫາກເກີດກໍລະນີການລະບາດ ຈຳນວນຫຼາຍ, ເຄື່ອງເອັກສະເລອະໄວຍະວະພາຍໃນ ທາງໂຮງໝໍແມ່ນຍັງບໍ່ມີ ເຊິ່ງຖືວ່າເປັນອຸປະກອນທີ່ສຳຄັນຫຼາຍສົມຄວນໃນການຮັບໃຊ້ຜູ້ປ່ວຍ.
ທ້ານຍັງກ່າວຕື່ມວ່າ ທາງໂຮງໝໍມີຄວາມຍິນດີ ຖ້າຫາກທາງພາກສ່ວນໄດທີ່ຈະປະກອບສ່ວນຊ່ວຍສະໜອງອຸປະກອນຕ່າງໆ ເພື່ອຊ່ວຍເຫຼືອວຽກງານຕ້ານການລະບາດໂຄວິດ-19 ໃນຄັ້ງນີ້ ທາງໂຮງໝໍຍິນດີຕ້ອນຮັບ ແລະ ຈະນຳໄປໃຊ້ໃຫ້ເກີດປະໂຫຍດສູງສຸດ.
ໃນນາມຄະນະແພດໝໍ ຂໍຮຍກຮ້ອງໃຫ້ ພໍ່ແມ່ປະຊາຊົນ ມີສ່ວນຮ່ວມນຳກັນ ໃນການປ້ອງກັນພະຍາດໂຄວິດ-19 ເພື່ອບໍ່ໃຫ້ກັບມາລະບາດອີກ. ໂດຍການປະຕິບັດຕາມຄຳແນະນຳ ທີ່ທາງກະຊວງສາທາລະນະສຸກໄດ້ກຳນົດໄວ້ ເປັນຕົ້ນແມ່ນການລ້າງມືໃຫ້ສະອາດຫຼັງຈາກເຮັດກິດຈະກຳຕ່າງໆ, ໃສ່ຜ້າອັດປາກ-ດັງ ແລະ ຮັກສາໄລຍະຫ່າງທາງສັງຄົມ.