ໃນວັນທີ 21 ກໍລະກົດ 2020 ທີ່ຜ່ານມາ ອະນຸກຳມະການໂຄສະນາ ແລະ ຂະບວນການ ກອງປະຊຸມໃຫຍ່ຄັ້ງທີ XI ຂອງພັກ. ນຳພາໂດຍ ທ່ານ ປ້ານ ນ້ອຍມະນີ ກຳມະການສູນກາງພັກ, ປະທານສູນກາງສະຫະພັນກຳມະບານລາວ, ຮອງຫົວໜ້າໜ່ວຍງານຂະບວນການ ກອງປະຊຸມໃຫຍ່ ຄັ້ງທີ XI ຂອງພັກ ພ້ອມດ້ວຍ ທ່ານ ພົຈ. ສົມພອນ ແກ້ວມີໄຊ ປະທານສະຫະພັນນັກຮົບເກົ່າແຫ່ງຊາດ, ທ່ານ ສະຫວັນຄອນ ຣາຊມຸນຕີ ຮອງລັດຖະມົນຕີ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ພ້ອມດ້ວຍຄະນະ ລົງເຄື່ອນໄຫວຊຸກຍູ້ວຽກງານການໂຄສະນາ ແລະ ຂະບວນການ ເພື່ອກະກຽມຕ້ອນຮັບ ກອງປະຊຸມໃຫຍ່ຄັ້ງທີ XI ຂອງພັກ, ທີ່ເມືອງຄຳເກີດ ແຂວງບໍລິຄຳໄຊ.

ຄະນະດັ່ງກ່າວ ໄດ້ລົງຢ້ຽມຢາມ ແລະ ຊຸກຍູ້ຊີ້ນຳ ປະຊາຊົນທີ່ບ້ານນາຮາກ ແລະ ບ້ານໜອງອໍ້ເມືອງຄຳເກີດ ທີ່ເປັນຄອບຄົວຕົວແບບຂອງເມືອງ ໃນການຜະລິດກະສິກຳ ປູກພືດຜັກ ແລະ ປາກກ້ຽງຫວານ ໂດຍປະຕິບັດຕາມແນວທາງຂອງພັກ-ລັດ ທີ່ວາງໄວ້ ເປັນການສ້າງລາຍຮັບເຂົ້າຄອບຄົວ ເພື່ອຫຼຸດພົ້ນອອກຈາກຄວາມທຸກຍາກ.

ການຜະລິດກະສິກຳຂອງບ້ານດັ່ງກ່າວ ແມ່ນມີຄຸນນະພາບດີ ແລະ ໄດ້ຜົນຜະລິດຕາມຄາດໝາຍ ມີການໃຊ້ເຄື່ອງມືທີ່ທັນສະໄໝເຂົ້າຊ່ວຍ ເຊັ່ນ: ຈັກໄຖດິນ ເພື່ອໃຫ້ສະດວກວ່ອງໄວຊ່ວຍໃນການໄຖດິນເຮັດໜານຜັກ ໃຫ້ໄດ້ຜົນຜະລິດຕາມຄວາມຕ້ອງການຂອງຕະຫຼາດ ແລະ ປັດຈຸບັນ ຄວາມຕ້ອງການຂອງຕະຫຼາດແມ່ນນັບມື້ນັບເພິ່ມຂຶ້ນ.

Medialaos MMD