​ວັນ​ທີ 4 ສີງ​ຫາ ທີ່​ໂ​ຮງ​ແຮມ​ລາວ​ພ​ຣາ​ຊາ ໂດຍ​ມີ​ຈຸດ​ປະ​ສົງ​ເພື່ອ​ເສີມ​ສ້າງ​ການ​ຮ່ວມ​ມື​ກັນ​ໃນ​ການ​ແກ້​ໄຂ​ອັດ​ຕາ​ປົກ​ຄຸມ​ຂອງ​ການ​ໃຫ້​ວັກ​ຊີນ​ກັນ​ພະ​ຍາດ​ຕ່ຳ ຊຶ່ງ​ໄດ້​ຖືກ​ຜົນ​ກະ​ທົບ​ໂດຍ​ການ​ລ​ະ​ບາດ​ຂອງ​ເຊື້ອ​ພະ​ຍາດ ໂຄວິດ-19 ກະ​ຊວງ​ສາ​ທາ​ລະ​ນະ​ສຸກ ຈຶ່ງ​ໄດ້​ຮຽກ​ຮ້ອງ​ການ​ສະ​ໜັບ​ສະ​ໜູນ​ຈາກ​ຂະ​ແໜງ​ການ​ທີ່​ສຳ​ຄັນ​ໃນ​ວຽກ​ງານ​ການ​ບໍ​ລິ​ການ​ໃຫ້​ວັກ​ຊິນ​ກັນ​ພະ​ຍາດ ໂດຍ​ການເປັນປະທານ​ຂອງ​ທ່ານ ປະ​ນອມ ຟອງ​ມະ​ນີ ຮອງ​ຫົວ​ໜ້າກົມ​ອະ​ນາ​ໄມ ແລະ ສົ່ງ​ເສີມ​ສຸ​ຂະ​ພາບ ຊຶ່ງມີຕາງ​ໜ້າ​ອົງ​ການ​ອຸຍ​ນິ​ເຊັບ ​​ກະ​ຊວງ​ຖະ​ແຫຼງ​ຂ່າວ, ວັດ​ທະ​ນາ​ທຳ ແລະ ທ່ອງ​ທ່ຽວ ແລະ ພາກສວ່ນກ່ຽວ ຂ້ອງເຂົ້າຮ່ວມ.

ທ່ານ ປະ​ນອມ ຟອງ​ມະ​ນີ ໄດ້​ກ່າ​ວວ່າ: ວັກ​ຊີນ​ຊ່ວຍ​ຊີ​ວິດ​ໄດ້ ແຕ່​ຍັງ​ມີ​ເດັກ​ນ້ອຍຫຼາຍ​ຄົນ​ທີ່ບໍ່​ໄດ້​ຮັບ​ວັກ​ຊີນ,ການ​ລະ​ບາດ​ຂອງ​ເຊື້ອ​ພະ​ຍາດ​ໂຄວິດ-19ຍັງ​ສ້າງ​ຜົນ​ກະ​ທົບ​ຕໍ່​ອັດ​ຕາ​ປົກ​ຄຸມ​ຂອງ​ການ​ໃຫ້​ວັກ​ຊິນ​ໃນ​ທົ່ວ​ໂລກ.ການ​ລະ​ບາດນີ້​ຍັງ​ໄດ້​ກະ​ທົບ​ຕໍ່​ການ​ບໍ​ລິ​ການ​ໃຫ້​ວັກ​ຊິນ​ປະ​ຈຳ ແລະ​ການ​ບໍ​ລິ​ການ​ດ້ານ​ສຸ​ຂະ​ພາບ​ທີ່​ຈຳ​ເປັນ​ອື່ນໆ​ເຖີງວ່າ​ຈະ​ມີ​ຄວາມ​ທ້າ​ທາຍ​ເຫຼົ່າ​ນີ້ກໍ່​ຕາມ ວຽກ​ງານ​ໃຫ້​ວັກ​ຊິນ​ກັນ​ພະ​ຍາດ​ຕ້ອງ​ໄດ້​ສືບ​ຕໍ່ ແລະ ​ເພີ້ມ​ຂື້ນ ລັດ​ຖະ​ບານ ​ສ​ປ​ປ​ລາວ ​ໄດ້​ຕັ້ງ​ເປົ້າ​ໝາຍ​ສຳ​ລັບ​ເດັກ​ນ້ອຍ​ລຸ່ມ 1 ປີ ໄດ້​ຮັບ​ວັກ​ຊິນ​ຄົບ​ໃຫ້​ໄດ້ 95% ເພື່ອ​ບັນ​ລຸ​ເປົ້າ​ໝາຍນີ້ ຕ້ອງ​ໄດ້​ເຮັດ​ວຽກ​ຮ່ວມ​ກັບ​ຂະ​ແໜງ​ການ​ອື່ນໆ ​ນອກ​ເໜືອ​ຈາກ​ຂະ​ແໜງ​ການ​ສາ​ທາ​ລະ​ນະ​ສຸກ ເພື່ອ​ເສີມ​ສ້າງ​ການ​ຮ່ວມ​ມື​ກັບ​ທຸກ​ພາກ​ສ່ວນ ເພື່ອ​ຮັບ​ປະ​ກັນ​ການ​ບໍ​ລິ​ການ​ໃຫ້​ວັກ​ຊິນ​ໄປ​ຮອດ​ໄປ​ເຖີງ​ເດັກ​ນ້ອຍ​ທຸກ​ຄົນ​ຢູ່ ສ​ປ​ປ​ລາວ.

ໃນ​ກອງ​ປະ​ຊຸມ​ ໄດ້​ຮັບ​ຟັງ​ການ​ນຳ​ສະ​ເໜີ​ຍຸດ​ທະ​ສາດແຫ່ງ​ຊາດ ແລະ ແຜນ​ປະ​ຕິ​ບັດ​ງານ​ສຳ​ລັບ​ການ​ບໍ​ລິ​ການ​ແບບ​ເຊື່ອມ​ສານ​ສຸ​ຂະ​ພາບ​ຈະ​ເລີນ​ພັນ ແມ່ ເດັກ​ເກີດ​ໃໝ່ ເດັກ​ນ້ອຍ ແລະ ​ໄວ​ລຸ້ນ ສະ​ເໜີ​ຍຸດ​ທະ​ສາດ ເພື່ອ​ປັບ​ປຸງ​ການ​ສື່​ສານ​ສຳ​ລັບ​ການ​ບໍ​ລິ​ການ​ໃຫ້​ວັກ​ຊິນ​ກັນ​ພະ​ຍາດ​ໂດຍ​ຄຳ​ນືງ​ເຖີງ​ການ​ລະ​ບາດ​ຂອງ​ພະ​ຍາດ​ໂຄວິດ-19 ແລະ ​ບົດ​ບາດ​ຂອງ​ການ​ເຮັດ​ວຽກ​ຮ່ວມ​ກັນ ນຳ​ສະ​ເໜີ​ກິດ​ຈະ​ກຳ​ສື່​ສານ​ສຳ​ລັບ​ການ​ບໍ​ລິ​ການ​ໃຫ້​ວັກ​ຊິນ​ກັນ​ພະ​ຍາດ ພ້ອມນີ້​ຜູ້​ເຂົ້າ​ຮ່ວມ​ຍັງ​ໄດ້​ປືກ​ສາ​ຫາ​ລື​ກ່ຽວ​ກັບ​ການ​ເຮັດ​ຮ່ວມ​ກັນ​ສຳ​ລັບ​ວຽກ​ງານ​ການ​ບໍ​ລິ​ການ​ໃຫ້​ວັກ​ຊິນ​ກັນ​ພະ​ຍາດ.