ປະຈຸບັນ ປະເທດເຮົາກຳລັງໄດ້ຮັບອິດທິພົນຂອງລົມພາຍຸໝູນເຂດຮ້ອນໂພດູ ແລະ ລົມພະ ຍຸດີເປຣຊັນ ນັບແຕ່ທ້າຍເດືອນສິງຫາເປັນຕົ້ນມາ ແລະ ຍັງຈະແກ່ຍາວຮອດວັນທີ 8 ກັນ ຍາ, ຊຶ່ງຈະເຮັດໃຫ້ເຂດພາກກາງ ແລະ ພາກໃຕ້ເກີດມີຝົນໜັກຫາປານກາງ, ປະຈຸບັນ 6 ແຂວງຂອງລາວ ໂດຍເລີ່ມຈາກແຂວງຄຳມ່ວນ, ສະຫວັນນະເຂດ, ຈຳປາສັກ, ສາລະວັນ, ເຊ ກອງ ແລະ ອັດຕະປື ແມ່ນຮັບຜົນກະທົບໜັກຈາກສະພາບນ້ຳຫ້ວຍ, ນ້ຳເຊຍຶ່ງຂຶ້ນຖ້ວມ ບ້ານເຮືອນ, ທີ່ທຳການຜະລິດຂອງປະຊາຊົນ ບາງຈູດຖືກຕັດຂາດຈາກພາຍນອກ.

ຕໍ່ກັບໄພນ້ຳຖ້ວມທີ່ລາວພວມປະເຊີນຢູ່ ໂດຍສະເພາະແມ່ນບັນດາ 6 ແຂວງດັ່ງກ່າວ, ກະ ຊວງສາທາລະນະສຸກ ຍິ່ງວິຕົກໜັກ, ເນື່ອງຈາກພະຍາດທີ່ຈະມາກັບສະພາບນ້ຳຖ້ວມ ແລະ ພາຍຫຼັງນ້ຳຫຼຸດລົງ ເປັນຕົ້ນແມ່ນ: ພະຍາດຖອກທ້ອງ, ຕາແດງ, ຕຸ່ມເປື່ອຍ, ຕີນຫໍ ແລະ ໄຂ້ຍຸງລາຍ. ໂດຍສະຖິຕິທີ່ໜ່ວຍງານກ່ຽວຂ້ອງໄດ້ເກັບມາແຕ່ຕົ້ນປີຮອດວັນທີ 4 ກັນຍາ 2019, ທົ່ວປະເທດມີຜູ້ຕິດເຊື້ອໄຂ້ຍຸງລາຍທັງໝົດ 28,85 ພັນຄົນ ແລະ ເສຍຊີວິດແລ້ວ 61 ຄົນ.

ທ່ານ ດຣ ວັນນະໄຊ ຊາດຕິກຸນ ຮອງຫົວໜ້າພະແນກສາທາລະນະສຸກແຂວງຈຳປາສັກ ໃຫ້ຮູ້ ວ່າ: ເພື່ອຮັບມືກັບສະພາບໄພນ້ຳຖ້ວມທີ່ກຳລັງເກີດຂຶ້ນໃນປະຈຸບັນ ພະແນກສາທາແຂວງ ໄດ້ແຕ່ຕັ້ງທີມງານວິຊາການ, ທີມງານແພດໝໍລົງຊຸກຍູ້ຊ່ວຍເຫຼືອປະຊາຊົນໃນເຂດຍົກ ຍ້າຍໃນແຕ່ລະເມືອງ ໂດຍສົມທົບກັບຄະນະກຳມະການຂັ້ນເມືອງຕາມແຈ້ງການຂອງຂັ້ນ ເທິງ ເພື່ອປະຈຳແຕ່ລະຈຸດ, ເມືອງລະ 2 ທີມ, ທີ່ເປັນທີມສາມາດຕອບໂຕ້ໄດ້ໄວ ແລະ ຈັດຕັ້ງ ປະຕິບັດໃນການກະກຽມຄວບຄຸມພະຍາດໄຂ້ຍຸງລາຍ, ໃຫ້ຂໍ້ມູນດ້ານສຸຂະສຶກສາປະຊາຊົນ ໃຫ້ການປ້ອງກັນພະຍາດຕ່າງໆທີ່ຈະເກີດຈາກນ້ຳ, ລວມທັງວຽກສຸຂະອະນາໄມ ຕະຫຼອດໄລ ຍະທີ່ຢູ່ໃນສູນພັກຊົ່ວຄາວ. ນອກຈາກນັ້ນ ຍັງມີທີມແພດລົງໄປກວດເປັນປະຈຳ ເພື່ອປ້ອງ ກັນພະຍາດໂລກຜິວໜັງ, ໄຂ້ຫວັດ, ໄອ ແລະ ອື່ນໆ ຖ້າຮ້າຍແຮງແມ່ນຈະໄດ້ນຳສົ່ງໂຮງໝໍ ທີ່ມີທ່າແຮງໃນຂັ້ນເມືອງ ຫຼື ຂັ້ນແຂວງ. ພ້ອມນັ້ນກໍຍັງໄດ້ກຽມສານທີ່ຈະຊ່ວຍໃນການບຳ ບັດນ້ຳໃຊ້, ມີອຸປະກອນໃຊ້ນ້ຳ, ແນໃສ່ໃຫ້ປະຊາຊົນມີນ້ຳສະອາດໃຊ້ໃນຊີວິດປະຈຳວັນ ແລະ ພາຍຫຼັງນ້ຳຫຼຸດລົງພະແນກສາທາຍັງຈະສຸມໃສ່ວຽກອະນາໄມ ສົ່ງເສີມດ້ານສຸຂະພາບ, ປ້ອງ ກັນພະຍາດຕ່າງໆທີ່ຈະມາກັບນ້ຳ, ຕິດຕາມຊັກວັກຊິນປ້ອງກັນປະຊາຊົນທີ່ໄດ້ຮັບຜົນກະ ທົບ, ໃຫ້ຂໍ້ມູນການນຳໃຊ້ນ້ຳສະອາດ ຕະຫຼອດຮອດກິນສະອາດ ແລະ ນຸ່ງສະອາດ.

ແຕ່ງເຖິງຢ່າງໃດກໍຕາມ ສິ່ງທີ່ພະແນກສາທາຍັງຂາດແມ່ນນ້ຳສະອາດ ທີ່ຈະນຳໄປແຈກ ຢາຍໃຫ້ປະຊາຊົນ, ອຸປະກອນການແພດຈຳນວນໜຶ່ງທີ່ໃຊ້ໃນພາກສະໜາມແມ່ນຍັງບໍ່ພຽງ ພໍ. ເນື່ອງຈາກດຽວນີ້ໂຮງໝໍເມືອງ, ສຸກສາລາເມືອງຫຼາຍຈຸດຖືກນ້ຳຖ້ວມ ແລະ ສ້າງຄວາມ ເສຍຫາຍສົມຄວນ.

ແຫຼ່ງຂໍ້ມູນຈາກ: ໜັງສືພິມ ເສດຖະກິດ-ສັງຄົມ