ໃນຕອນແລງຂອງວັນທີ 18ສິງຫາ 2020 ທີ່ກະຊວງແຜນການ ແລະ ການລົງທຶນ, ທ່ານ ປອ ກິແກ້ວ ຈັນທະບູລີ, ຮອງລັດຖະມົນຕີ ກະຊວງແຜນການ ແລະ ການລົງທຶນ ໄດ້ຕ້ອນຮັບການຢ້ຽມຂໍ່ານັບ ທ່ານ ນາງປີອາ ບະຣິດໂຕ (Pia Britto) ຜູ້ຕາງໜ້າຂອງອົງການ UNICEF ຄົນໃໝ່ ປະຈຳ ສປປ ລາວ.

ໃນໂອກາດນີ້, ທ່ານ ປອ ກິແກ້ວ ຈັນທະບູລີ, ຮອງລັດຖະມົນຕີ ກະຊວງແຜນການ ແລະ ການລົງທຶນ ໄດ້ສະແດງຄວາມຍິນດີຕ້ອນຮັບອັນອົບອຸ່ນມາຍັງທ່ານ ທ່ານ ນາງປີອາ ບະຣິດໂຕ, ຜູ້ຕາງໜ້າຂອງອົງການ UNICEF ຄົນໃໝ່ ປະຈຳ ສປປ ລາວ, ພ້ອມທັງສະແດງຄວາມຂອບໃຈຕໍ່ການຮ່ວມມືແລະການຊ່ວຍເຫຼືອຂອງອົງການ UNICEF ຕໍ່ສປປລາວໃນໄລຍະຜ່ານມາໂດຍສະເພາະແມ່ນການຈັດຕັ້ງປະຕິບັດບັນດາໂຄງການ ແລະ ກິດຈະກຳຕ່າງໆ ພາຍໃຕ້ແຜນງານຂອງອົງການUNICEF ທີ່ສອດຄ່ອງກັບແນວທາງນະໂຍບາຍຂອງພັກແລະລັດຖະບານເປັນຕົ້ນແມ່ນບັນດາໜ້າວຽກບູລິມະສິດຕິດພັນກັບການສົ່ງເສີມແລະປົກປ້ອງເດັກນ້ອຍກໍຄືການຮັບປະກັນໃຫ້ເດັກນ້ອຍລາວທຸກຄົນໄດ້ຮັບການພັດທະນາແລະມີອະນາຄົດທີ່ດີ.

ສຳລັບທິດທາງການຮ່ວມມືໃນຕໍ່ໜ້າ, ທັງສອງຝ່າຍຈະໄດ້ສືບຕໍ່ສຸມໃສ່ການຈັດຕັ້ງປະຕິບັດແຜນການຮ່ວມມືລະຫວ່າງອົງການ UNICEF ແລະ ລັດຖະບານ ສປປ ລາວ ສົກປີ 2017 – 2021 ຊຶ່ງກວມເອົາ 5 ຂົງເຂດເປົ້າໝາຍຄື: ວຽກງານສາທາລະນະສຸກ ແລະ ໂພຊະນາການ; ນ້ຳສະອາດ ແລະ ວຽກງານສຸຂະອະນາໄມ ແລະ ການປ່ຽນແປງຂອງດິນຟ້າອາກາດ; ການສຶກສາ; ການປົກປ້ອງເດັກ; ແລະ ວຽກງານອື່ນໆທີ່ປິ່ນອ້ອມໂດຍຖືສຳຄັນການມີສ່ວນຮ່ວມຂອງທຸກພາກສ່ວນໃນສັງຄົມ ແລະ ການພັດທະນາ ຄົນລາວ ລຸ້ນ ປີ 2030 Lao Generation 2030.

ແຜນການຮ່ວມມືດັ່ງກ່າວແມ່ນມີຄວາມສຳຄັນຍິງໃນການປະກອບສ່ວນຊ່ວຍສະໜັບສະໜູນການປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປິຄັ້ງທີ 8, ເວົ້າລວມ ກໍ່ແມ່ນການປະກອບສ່ວນເຂົ້າໃນການຈັດຕັ້ງຜັນຂະຫຍາຍເປົ້າໝາຍການພັດທະນາແບບຍືນຍົງ (SDGs)ແຕ່ນີ້ຮອດປີ 2030.
ໃນໂອກາດດຽວກັນນີ້, ທ່ານ ນາງປີອາ ບະຣິດໂຕ ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຂອງທ່ານ ປອ ກິແກ້ວ ຈັນທະບູລີແລະ ຢືນຢັນວ່າ ອົງການ UNICEF ຈະສືບຕໍ່ໃຫ້ການຮ່ວມມືຢ່າງເຕັມສ່ວນ ກັບ ລັດຖະບານ ສປປ ລາວ ໃນການຈັດຕັ້ງປະຕິບັດແຜນການຮ່ວມມື ລະຫວ່າງ ອົງການ ແລະ ລັດຖະບານລາວ ໃຫ້ໄດ້ຮັບໝາກຜົນສູງສຸດ.