ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ແຫ່ງ ສປປ ລາວ ໄດ້​ຕ້ອນຮັບ​ການ​ເຂົ້າ​ຢ້ຽມ​ຂໍ່າ​ນັບ​ຂອງ ທ່ານ ໂມ​ເຕ​ງິ ໂທ​ຊິ​ມິດ​ຊຶ (MOTEGI Toshimitsu) ລັດຖະມົນຕີ​ຕ່າງປະເທດ​ຍີ່ປຸ່ນ ພ້ອມ​ດ້ວຍ​ຄະນະ ໃນ​ຕອນ​ບ່າຍ​ວັນ​ທີ 23 ສິງຫາ​ນີ້, ທີ່​ຫ້ອງ​ວ່າ​ການ​ສໍາ​ນັກ​ງານ​ນາຍົກ​ລັດ​ຖະ​ມົນຕີ. ໃນ​ໂອກາດ​ທີ່​ທ່ານ​ລັດຖະມົນຕີ​ຕ່າງປະເທດ​ຍີ່ປຸ່ນ ເດີນທາງ​ມາ​ຢ້ຽມຢາມ ສປປ ລາວ ໃນ​ລະຫວ່າງ​ວັນ​ທີ 22-24 ສິງຫາ 2020, ເພື່ອ​ເປັນ​ການ​ຮັດ​ແໜ້ນ​ສາຍ​ພົວພັນ​ມິດຕະພາບ ແລະ ການ​ຮ່ວມ​ມື​ອັນ​ດີງາມ​ທີ່​ມີ​ມາ​ແຕ່​ດົນ​ນານ ແລະ ການ​ເປັນ​ຄູ່​ຮ່ວມ​ຍຸດທະສາດ ລະຫວ່າງ ສປປ ລາວ ແລະ ຍີ່​ປຸ່ນ.

ໂອກາດ​ນີ້, ທ່ານນາຍົກ ລັດຖະມົນຕີ ກໍ​ໄດ້​ກ່າວ​ສະແດງ​ຄວາມ​ຊົມເຊີຍ​ຍິນດີ​ຕ້ອນຮັບ ແລະ ຕີ​ລາຄາ​ສູງ​ຕໍ່ ທ່ານລັດຖະມົນຕີ​ຕ່າງປະເທດ​ຍີ່ປຸ່ນ ພ້ອມ​ຄະນະ ທີ່​ໄດ້​ມາ​ຢ້ຽມຢາມ ສປປ ລາວ. ການ​ມາ​ຢ້ຽມຢາມ​ຄັ້ງ​ນີ້, ເປັນ​ການ​ຮັດ​ແໜ້ນ​ສາຍ​ພົວພັນ​ມິດຕະພາບ ແລະ ການ​ຮ່ວມ​ມື​ອັນ​ດີງາມ​ທີ່​ມີ​ມາ​ແຕ່​ດົນ​ນານ ແລະ ການ​ເປັນ​ຄູ່​ຮ່ວມ​ຍຸດທະສາດ ລະຫວ່າງ ສປປ ລາວ ແລະ ຍີ່ປຸ່ນ ໃຫ້​ນັບ​ມື້​ນັບ​ແໜ້ນ​ແຟ້​ນຍິ່ງ​ຂຶ້ນ. ທ່ານ ນາຍົກລັດຖະມົນຕີ ໄດ້​ສະແດງ​ຄວາມ​ຊົມເຊີຍ ແລະ ຕີ​ລາຄາ​ສູງ​ຕໍ່​ຜົນ​ຂອງ​ການ​ພົບ​ປະ​ສອງ​ຝ່າຍ ລະຫວ່າງ ລັດຖະມົນຕີ​ກະຊວງ​ການ​ຕ່າງປະເທດ​ແຫ່ງ ສປປ ລາວ ແລະ ລັດ​ຖະ​ມົນ ຕີ​ຕ່າງປະເທດ​ຍີ່ປຸ່ນ ຊຶ່ງ​ເປັນ​ການ​ສືບຕໍ່​ເພີ່ມ​ທະວີ​ຮັດ​ແໜ້ນ​ສາຍ​ພົວພັນ​ມິດຕະພາບ ແລະ ການ​ຮ່ວມ​ມື ລະຫວ່າງ ສປປ ລາວ ແລະ ຍີ່​ປຸ່ນ. ພ້ອມ​ນີ້, ທ່ານ ນາຍົກລັດຖະມົນຕີ ກໍ​ໄດ້​ກ່າວ​ສະແດງ​ຄວາມ​ຂອບ​ໃ​ຈ ມາ​ຍັງ​ລັດຖະບານ ແລະ ປະຊາຊົນ​ຍີ່ປຸ່ນ ທີ່​ໄດ້​ໃຫ້ການ​ຊ່ວຍເຫຼືອ ສປປ ລາວ ໂດຍ​ຕະຫຼອດ​ມາ ແລະ ການ​ມາ​ຢ້ຽມຢາມ​ຄັ້ງ​ນີ້, ກໍ​ໄດ້​ໃຫ້ການ​ຊ່ວຍ​ເຫຼືອ. ພາຍຫຼັງ​ການ​ພົບ​ປະ​ສອງ​ຝ່າຍ ລະຫວ່າງ​ລັດຖະມົນຕີ​ຕ່າງປະເທດ ລາວ ແລະ ລັດຖະມົນຕີ​ຕ່າງປະເທດ​ຍີ່ປຸ່ນ ໄດ້​ລົງ​ນາມ​ເອກະສານ​ແລກປ່ຽນ 2 ໂຄງການ ແລະ ໄດ້​ມອບ​ອຸປະກອນ​ການ​ແພດ​ຈຳນວນ​ໜຶ່ງ ຂອງ​ໂຄງການ​ຊ່ວຍເຫຼືອ​ອຸປະກອນ​ການ​ແພດ ໃຫ້​ແກ່ ສປປ ລາວ ເພື່ອ​ຕ້ານ​ການ​ແຜ່​ລະບາດ​ຂອງ​ພະຍາດ​ໂຄ​ວິດ-19. ທ່ານ ນາຍົກລັດຖະມົນຕີ ຍັງ​ໄດ້​ອວຍພອນ​ໃຫ້ ທ່ານ​ລັດຖະມົນຕີ​ຕ່າງປະເທດ​ຍີ່ປຸ່ນ ພ້ອມ​ຄະນະ ຈົ່ງ​ປະສົບ​ຜົນສຳເລັດ​ໃນ​ການ​ມາ​ຢ້ຽມຢາມ ສປປ ລາວ ຄັ້ງ​ນີ້ ແລະ ອວຍພອນ​ໃຫ້ ທ່ານ ພ້ອມ​ຄະນະ ກັບ​ຄືນ​ປະເທດ​ດ້ວຍ​ຄວາມ​ສະຫວັດດີ​ພາບ.
ໂອກາດ​ດຽວ​ກັນ​ນີ້, ທ່ານ ໂມ​ເຕ​ງິ ໂທ​ຊິ​ມິດ​ຊຶ ກໍ່​ໄດ້​ກ່າວ​ສະແດງ​ຄວາມ​ຂອບໃຈ ຕໍ່​ທ່ານ ນາຍົກລັດຖະມົນຕີ ທີ່​ໄດ້​ໃຫ້ການ​ຕ້ອນຮັບ​ອັນ​ອົບ​ອຸ່ນ ຄັ້ງ​ນີ້, ພ້ອມ​ກັບ​ກ່າວ​ລາຍ​ງານ​ຈຸດປະສົງ​ຂອງ​ການ​ມາ​ຢ້ຽມຢາມ ສປປ ລາວ ເພື່ອ​ເຮັດ​ໃຫ້​ສາຍ​ພົວພັນ​ມິດຕະພາບ ແລະ ການ​ຮ່ວມ​ມື​ອັນ​ດີງາມ​ທີ່​ມີ​ມາ​ແຕ່​ດົນ​ນານ ແລະ ການ​ເປັນ​ຄູ່​ຮ່ວມ​ຍຸດທະສາດ ລະຫວ່າງ ສປປ ລາວ ແລະ ຍີ່ປຸ່ນ ນັບ​ມື້​ນັບ ແໜ້ນ​ແຟ້ນ​ຍິ່ງ​ຂຶ້ນ.