ໄລຍະ5ປີຜ່ານມາ ອົງການຈັດຕັ້ງສາກົນ ທີ່ບໍ່ຂຶ້ນກັບລັດຖະບານ (INGOs) ໄດ້ເຂົ້າມາປະຕິບັດວຽກງານກ່ຽວກັບການພັດທະນາຫຼາຍຂົງເຂດ ຢູ່ແຂວງສາລະວັນ ໂດຍສ່ວນໃຫຍ່ແມ່ນປະຕິບັດຢູ່ໃນຂົງເຂດສຶກສາ, ສາທາ, ກະສິກຳ, ແຮງງານ, ສະພາ, ອົງການຈັດຕັ້ງມະຫາຊົນ ແລະ ອື່ນໆ. ເຊີ່ງມີຈຳນວນທັງໝົດ 26 ອົງການ, 38 ໂຄງການ ລວມມີມູນຄ່າໃນການຮ່ວມມືທັງໝົດ 77 ລ້ານກວ່າໂດລາສະຫະລັດ.

ທ່ານ ສີສຸພັນ ເທບວົງສາ ຫົວໜ້າພະແນກການຕ່າງປະເທດ ໄດ້ຜ່ານບົດສະຫຼຸບການຈັດຕັ້ງປະຕິບັດ ແລະການຄຸ້ມຄອງອົງການຈັດຕັ້ງສາກົນ ທີ່ບໍ່ສັງກັດລັດຖະບານ ປະຈຳປີ 2020. ໂຄງການທີ່ຍັງສືບຕໍ່ຈັດຕັ້ງປະຕິບັດຢູ່ແຂວງສາລະວັນ ມາຮອດປີ 2020 ຈຳນວນ 38 ໂຄງການ, ໃນນັ້ນຂົງເຂດສາທາລະນະສຸກ 12 ໂຄງການ ມູນຄ່າ 25 ລ້ານໂດລາສະຫາລັດ, ສຶກສາທິການ ແລະກິລາ 9 ໂຄງການ ມູນຄ່າ 25 ລ້ານກວ່າໂດລາສະຫະລັດ, ກະສິກຳ-ປ່າໄມ້ 6 ໂຄງການ ມູນຄ່າ 16 ລ້ານກວ່າໂດລາສະຫະລັດ, ແຮງງານ-ສະຫວັດດີການສັງຄົມ 7 ໂຄງການ ມູນຄ່າ 5 ລ້ານກວ່າໂດລາສະຫະລັດ, ອົງການຈັດຕັງກຳມະບານ, ຊາວໜຸ່ມ, ຍຸຕິທຳ ແລະສະພາປະຊາຊົນແຂວງ ພາກສ່ວນລະ 1 ໂຄງການ. ແຂວງສາລະວັນ ຍັງມີຄວາມຕ້ອງການທາງດ້ານທຶນຮອນ, ການຊ່ວຍເຫຼືອ ທີ່ຈະຕ້ອງໄດ້ສຸມໃສ່ເຂົ້າໃນແຜນພັດທະນາເສດຖະກິດ-ສັງຄົມ, ເປັນການຊຸກຍູ້ເຮັດໃຫ້ແຜນພັດທະນາຂອງແຂວງ ບັນລຸຕາມຈຸດປະສົງ ແລະ ເປົ້າຫມາຍ ໃນການແກ້ໄຂບັນຫາຄວາມທຸກຍາກຂອງປະຊາຊົນ ໃຫ້ດີຂື້ນເທື່ອລະກ້າວ ພາຍໃຕ້ລະບຽບ ແລະ ຫຼັກການຂອງ ພັກ-ລັດ. ສຳລັບແຜນການປະຕິບັດໃນຕໍ່ໜ້າ ສືບຕໍ່ເພີ່ມທະວີການດຶງດູດການຊ່ວຍເຫຼືອ ແລະ ການຮ່ວມມື ຈາກອົງການ INGO ເຂົ້າໃນການພັດທະນາ ໃຫ້ຫຼາຍຂຶ້ນ, ສືບຕໍ່ປະສານກັບພາກສ່ວນທີ່ກ່ຽວຂ້ອງເມືອງ, ແຂວງ ແລະກະຊວງ ເພື່ອຄຸ້ມຄອງຕິດຕາມການຈັດຕັ້ງປະຕິບັດກິດຈະກຳຂອງແຕ່ລະໂຄງການຊ່ວຍເຫຼືອ ໃຫ້ຮັດກຸມ ແລະມີປະສິດທິຜົນດີຂຶ້ນ, ສືບຕໍ່ເຜີຍແຜ່ບັນດານິຕິກຳການຮ່ວມມື ແລະຄຸ້ມຄອງ ແລະປັບປຸງການປະສານງານແຕ່ລະຂັ້ນໃຫ້ເຂັ້ມແຂງ ແລະສອດຄ່ອງກັບແຜນພັດທະນາເສດຖະກິດສັງຄົມຂອງແຂວງ ແລະວຽກງານອື່ນໆ ໃຫ້ໄດ້ຮັບຜົນສຳເລັດຂຶ້ນຕື່ມອີກ. ພ້ອມດຽວກັນນັ້ນ ປະທານກອງປະຊຸມກໍ່ໄດ້ມີຄຳຖາມເຈາະຈີ້ມກ່ຽວກັບບາງວຽກງານ, ໂຄງການ, ຂະແໜງການທີ່ຍັງບໍ່ໄດ້ຮັບຜົນສຳເລັດ ພ້ອມທັງໄດ້ຮ່ວມກັນຄົ້ນຄວ້າ, ປືກສາຫາລື, ປະກອບຄຳຄິດຄຳເຫັນຕື່ມອີກ.

ກອງປະຊຸມສະຫຼຸບການຈັດຕັ້ງປະຕິບັດ ແລະການຄຸ້ມຄອງອົງການຈັດຕັ້ງສາກົນ ທີ່ບໍ່ສັງກັດລັດຖະບານ (INGOs) ປະຈຳປີ 2020 ຈັດຂຶ້ນໃນວັນທີ 16 ມີນານີ້, ທີ່ພະແນກການຕ່າງປະເທດແຂວງ, ໂດຍການເຂົ້າຮ່ວມ ຂອງ ທ່ານ ສົມໃຈ ອຸ່ນຈິດ ຮອງເຈົ້າແຂວງສາລະວັນ ຜູ້ຊີ້ນຳວຽກງານວັດທະນະທຳ-ສັງຄົມ, ທັງແມ່ນປະທານຄະນະກຳມະການຄຸ້ມຄອງອົງການຈັດຕັ້ງສາກົນ ທີ່ບໍ່ສັງກັດລັດຖະບານ, ມີ ທ່ານ ສີສຸພັນ ເທບວົງສາ ຫົວໜ້າພະແນກການຕ່າງປະເທດແຂວງ, ມີຮອງເລຂາທິການສະພາແຫ່ງຊາດປະຈຳເຂດເລືອກຕັ້ງທີ 14 ແລະ ສະພາປະຊາຊົນແຂວງ, ຮອງເຈົ້າເມືອງ 8 ຕົວເມືອງ, ຫົວໜ້າພະແນກ-ຮອງພະແນກການ, ອົງການທຽບເທົ່າອ້ອມຂ້າງແຂວງເຂົ້າຮ່ວມ.

ພາບ-ຂ່າວ: ທິດລານີ ໂຄດໂຍທາ.